Luke 7

Jesuzi kiŋaŋ motec moc hucticne bâniniŋkewec

(Mat 8: 5-13)

Jesu e ŋic mitidâŋ i jazaku jaza-fârerâ Kafanaum haeo rawec. Ira momori soŋaŋ moc ere kiŋaŋ motec hâmozo ehuc fowec. Bomboŋ e motec ere maname biaŋkewec. Irec Jesure biŋe manarâ Judaŋic micne bapa Jesu hefârepie motec huc bâniniŋkecneocte jazawec. Eme jaŋe Jesurao fisirâ šiŋuc muhuc âzâcnembiŋ: “Momori soŋaŋ e jume biaŋkeekacte dâŋticne manazemec. E maŋticne Judaŋic nâŋerea domaekac. Erâ mitific-nâŋec fuaocte ekizia moneŋ râeme sâckeme fua-nârewec.” Iŋuc muhuc âzâcnepie manarâ jaŋehec rawec. Rarâ ficticne bâqiŋkezo ehame momori soŋaŋzi âgofâcne Jesurao sorec-jopahuc dâŋ šiŋuc râeme rawec: “Wofuŋ, go ira domac, no iŋucne mac wemocte iqicnucmu. No nahacne manape mi sâckeme gorao fâzo quŋkepac hâcne. Irec go ira juhuc mâc miczi mutec kiŋaŋ motec-nane ɋiɋic qazejec. No ŋic fekicne jaŋere kiŋaŋ qaqa, eme nore wahamicne momorifâc-nane juŋgopieŋ. Eme jaŋeraonec moc `racƷ âzâcnepe raocmu, moc `warecƷ âzâcnepe wareocmu, â kiŋaŋ motec-nane `gie i bacƷ mupe baocmu.” Eme Jesu e dâŋ i manarâ momori soŋaŋ seckecnerâ ŋicguru bâjâpembiŋ jaŋerao fotikierâ šiŋuc jazawec: “No ŋazape mananiŋ, Israe ŋic ŋoŋerao mamanasiŋ sâc iŋucne mi bâfuaekopac.” Iŋuc mume momori soŋaŋ âgofâcne jaŋe risierâ ficko ferâ kiŋaŋ motec ɋiɋic qame honembiŋ.

Jesuzi motec moc hâmockonec bâɋârewec

11 Juku Jesuzi hae moc šâŋene Naiŋ ira rame motecfâcne â ŋic guru sâko bâjâpembiŋ. 12 Eme hae mendâŋko fisihame qâŋɋâŋ moc reŋke wahambiŋ. Hozec moc ŋokâ-ticne mocjaha e hâmowec, e hâcne duckeniŋte haeonec ŋic ŋokac waha-fârembiŋ. 13 Eme Wofuŋzi hozec honerâ bune sâqoreme muwec, “Mi kioc.” 14 Iŋuc murâ ra katapa bâuame badomahapie šiŋuc muwec: “Motec, no gazakopac, faharec. 15 Iŋuc âzâcneme hâmocnezi faharerâ dâŋ dâŋ ewec. Eme Jesuzi neŋgoc-ticnehec juocte râcnewec. 16 Eme ŋic jaŋe i honerâ hâwic-jopame Anutu muteŋkerâ šiŋuc mumbiŋ: “Porofete kâcɋene ŋondeŋ-nâŋecko fuawec jukac.” Á gâcnezi mumbiŋ: “Anutu e ŋicfâc-ticne jâmbomac iqic-nâpokac.” Eme irec biŋe Judaia mâreŋko â mâreŋ ŋifec â ŋifec mâmâc qâfâuckerâ rawec.

Jesuzi Johanere dâŋ muwec

(Mat 11: 2-19)

18 Johane kâpâcwâru ficko ŋehuc juhame motecfâc-ticne jaŋe wiac fuawec irec dâŋ binaŋ ecnembiŋ. 19 Eme dâŋ i manarâ motec jajahec hefârec-jofarâ Wofuŋ šiŋuc muhuc wiocnenicte sorec-jofawec: “Ware-nâreocte mukicne go hâcne me? Me mocte woŋec junšepeneŋ?” 20 Sorec-jofame motec jahe Jesurao fisirâ mupic: “Johane Miti Opâ fufuŋkezi kecšiŋuc muhuc sorec-nâfokac: Mesia ware-nâreocte mukicne go hâcne me? Me mocte woŋec junšepeneŋ?” 21 Jesu e aua dameŋ ira ŋic huc šâic bâniniŋke-jarewec â demoŋ jâpe-jarewec â šâŋe tiŋtuŋ šâŋe fifi bacjopawec. 22 Ehame ŋic jahe fisirâ wiocnepire šiŋuc jasawec: “Ŋohe rarâ wiac hone manac ekopirec irec dâŋ binaŋ Johane ecnehuc šiŋuc âzâcnenic: Tiŋtuŋzi šâŋe fitâcneŋgopieŋ, puriŋzi hata juŋgopieŋ, wicsanaŋheczi fâsâeŋgopieŋ, qepoŋzi dâŋ mamana eŋgopieŋ, hâmokicnezi ɋârerâ fahareŋgopieŋ, â waha qaqanezi Biŋebiaŋ manaŋgopieŋ. 23 Eme moc e mana gâpârehuc qiqikiŋ mi enareocmu ere manape šerine ekac.”

24 Eme Johanere motec jahec jahe risierâ rahapire Jesu e ŋic jumbiŋ jaŋe Johanere šiŋuc jazawec: “Ŋoŋe mâreŋ tuhuo wemo honeniŋte rambiŋ? Saparac moc mâŋâŋzi batac bawarec eme honeniŋte rambiŋ me? 25 Me ŋic moc ŋaqi-ticne eri qaraweŋnehec honezo rambiŋ? Manaŋgopieŋ, ŋic ŋaqi eri qaraweŋnehec rojueŋgopieŋ jaŋe ŋicwofuŋ ficko wiac âmbâŋ nâhuc foeŋgopieŋ. 26 Me porofete moc honeniŋte rambiŋ? No ŋazape mananiŋ, ŋic honembiŋ e porofete gâcne jaŋere sâc mâcne, e sâc moc. 27 Ere hâcne dâŋqâreŋ moc kecšiŋuc fokac:

`Manakic, no biŋe mumu ŋicnane sorepe fâ maigao fuaocmu,
erâ hatage bâšâwehuc bânie-gareocmu.'
28 No jâmbomac ŋazape, ŋokackonec fuakicne gâcne sasawa jaŋeraonec moczi Johane mi qâhuckekac. Á Anuture uucmaŋ fua tâcneme maŋnao wahakicne juocmuzi sifu e qâhuckeocmu.” 29 Ŋic sasawa erâ takesi roro mâmâc jaŋe dâŋ manarâ Johanere Miti Opâ ruambiŋko Anuture dâŋ dopeckepie fâri fideteŋ ewec. 30 Farisaio â sâcmutâc mamana saric jaŋe ine Johanere Miti Opâ qikiŋnehuc Anuture dâŋ râpeckepie jaŋerao fârimâc ewec.

31 “Ŋicguru ši weni jaŋehec sâc hecjopape? Jaŋe weni jaŋe iŋucne? 32 Jaŋe naru motec iŋucne. Naru motec jaŋe haeo šoŋao ŋehuc dâŋ šiŋuc mutâc muwarec eeŋgopieŋ: `Gae hepene wemocte mi woŋgopieŋ'” `Ki makuc hepene wemocte mi kioŋgopieŋ! Ž 33 Johane Miti Opâ fufuŋke e gie-ticne fuŋkerâ nânâ qowi mi nâhuc sowa jume honerâ mumbiŋ: `E demoŋzi ecnekac. Ž 34 Ŋic Fâri Wâtuŋne eki waharâ nânâ qowi nâme honerâ muŋgopieŋ, `Kec e ŋic nâ âmbâŋne, takesi roro â sâqocne bapa Jaŋere âgo. Ž 35 Anuture mamana biri ine qâjâpecfâcne jaŋe fuŋne-ticne hewirickepie fâri fideteŋ ewec.”

Ŋokac moczi Jesu kike-ticne ruacnewec

36 Farisaio moczi Jesu nânâre hefâreme ficticnao ferâ nânâ teboo ŋewec. 37 Eme hae irec ŋokac sâqocne moczi Jesu e farisaiore ficko feme biŋe manarâ opâ âsu biaŋ moc kiruŋhec baferâ 38 râpefuŋnao domahuc kiome šâŋeuc-ticnezi kikene ruacneme qizec susuc-ticnezi bâkereŋkewec. Erâ kike-ticne muduckerâ opâ âsu ruacnewec. 39 Ŋokac iŋuc eme farisaio Jesu hefârewec eki honerâ maŋnezi šiŋuc muwec: “Ŋokac šizi wiac ecnekac e sâqocne, Jesu e porofete jurâ muzac fuŋne-ticne mana tarazac.” 40 Eme Jesuzi šiŋuc âzâcnewec: “Simoŋ, no dâŋ moc gazape manac.” Âzâcneme muwec, “Qaqazu, mutec manape.” 41 Eme Jesuzi šiŋuc muwec: “Moneŋŋic moczi ŋic jajahec moneŋ jaba jactewec, moc 500 kina râcnewec â moc 50 kina. 42 Eme okacne bazucnenicte moneŋ basapire tofa-ticne qikiŋne-jactewec. Eme jaheraonec mozi moneŋŋicte bubiaŋ fekicne bajuocmu, go more mukomec?” 43 Wiocneme Simoŋ šiŋuc muwec: “Moneŋ bocjaha qikiŋnecnewec ere mukopac.” Mume Jesuzi šiŋuc âzâcnewec: “Go sâcne mukomec.” 44 Iŋuc murâ ŋokacto forisierâ Simoŋ šiŋuc âzâcnewec: “Ŋokac kecši honekomec? No ficgao wefupe go kike šušure opâ mi râe-naremec, ŋokac eki ine kike-nane šâŋeuc-ticnezi ruacnerâ qizec susucnezi bâkereŋkekac. 45 Goki mi muducnumec, ŋokac eki ine kike-nane šoɋac erâ muduckekac. 46 Goki qizec-nane wokemaŋ opâzi mi ruacnemec, ŋokac eki ine kike-nane opâ âsu biaŋzi ruacnekac. 47 Irec gazakopac, ŋokac e maŋjauŋ bocjaha enarekacte fuŋne-ticne šiŋuc manac: E sâqocne bocjaha bâtâmirecnekicne. Moc e sâqocne afecne bâtâmirecnekicnezi maŋjauŋ afecne eocmu.” 48 Iŋuc murâ ŋokac šiŋuc âzâcnewec: “Sâqocnege bâtâmire-garekicne hâcne.” 49 Iŋuc mume ŋic nânâ mâmâc nâhuc ŋembiŋ jaŋe maŋjeŋiczi šiŋuc mumbiŋ: “E mo ŋic mo, irec sâqocne bâtâmirekac?” 50 Eme Jesuzi ŋokac šiŋuc âzâcnewec: “Mamanasiŋgere biaŋkekomec, buge âke mâteŋkeha ra juzemec.”

Copyright information for `KMG