Luke 9

Motecfâcne giedâŋ mujarewec

(Mat 10: 1, 5-14” Maò 6: 7-13)

Jesu e aposolo 12 hefârec-jopame fisipie ŋic demoŋ jâpe-jareniŋte â huc bâniniŋke-jareniŋte tâpiri qikiŋne-jarewec. Erâ ŋic Anuture uucmaŋ irec dâŋ jazahuc huchec ɋiɋicne bacjopaniŋte sorec-joparâ dâŋ šiŋuc mutâcne-jarewec: “Ŋoŋe hatao gunu me he me nânâ me moneŋ me ŋaqi jajahec mi bajunšepieŋ. Hae mocko fisirâ fic feniŋmu ijaha ŋeŋe juju eku waha ranšepieŋ. Erâ mocko fisipie qikiŋ-ŋopapie hae i râpeckerâ gâc wândoc kike-ŋeŋickonec âteickepie wahame jaŋe fuŋne-jeŋic mananšepieŋ.” Iŋuc muhuc jazame jaŋe šawierâ rambiŋ. Ehuc haene haene jufârehuc ŋic miti jazambiŋ â huc šâic bâniniŋke-jarembiŋ.

Herodezi Jesure biŋe manawec

(Mat 14: 1-2” Maò 6: 14-16)

Ŋicwofuŋ Herode e Jesuzi wiac ewec bawec, irec biŋe maname quŋkewec. I ŋic jaŋe kecšiŋuc mumbiŋte ewec: “Johane e hâmockonec ɋârewec juhuc wiac i bakac.” Gâcnezi ine mumbiŋ, “Eliazi mocwâc fuawec jukac.” Á gâcnezi ine mumbiŋ, “Porofete mimiŋne moczi ɋârewec jukac.” Mupie manarâ Herodezi šiŋuc muwec: “Johane e noni mupe upene hetâcnembiŋ. Ehame mozi iŋuc eme biŋene manaekopac?” Iŋuc murâ Jesu honeocte boc ecnewec.

Jesuzi ŋic 5000 nânâ gumec-jopawec

(Mat 14: 13-21” Maò 6: 30-44” Joh 6: 1-15)

10 Eme aposolo jaŋe juku risierâ gie bambiŋ irec dâŋ binaŋ Jesu ecnembiŋ. Dâŋ binaŋ ecnepie Jesuzi rocjopame Besaida hae mâreŋko buc juniŋte rambiŋ. 11 Rapie ŋic jaŋe honec-joparâ bâjâpec-jopambiŋ. Erâ Jesurao fisipie âgo ejareme jumbiŋ. Juhapie Anuture uucmaŋ irec dâŋ jazawec, â huc šâichec ɋiɋicne bacjopawec. 12 Iŋuc ehuc juhame šoaŋ ŋetarazo eme motecfâcne jaŋe erao rarâ šiŋuc âzâcnembiŋ: “Ʒira tuhuo juŋgopeneŋte go ŋic râec-jopatec hae ŋerakac ira rarâ fic â nânâ bâfuanšepieŋ.” 13 Mupie šiŋuc jazawec: “Ŋaŋac moc nânâ gumec-jopaniŋ me!” Eme jaŋe šiŋuc âzâcnembiŋ: “Poroŋ memoc â opâ qowi jajahec iŋuc mac fonârekac. Irec weniŋuc enaŋ? Haeo rarâ ŋic guru sâko ši jaŋere nânâ sâcne furine banaŋmu me?” 14 Ŋic 5 tauseŋ jumbiŋte motec jaŋe iŋuc mumbiŋ. Mupie šiŋuc jazawec: “Ŋic ejarepie birine birine 50 qâzuckerâ ŋeranšepieŋ.” 15 Mume jaŋe ejarepie iŋuc epie 16 poroŋ memoc â opâ qowi jajahec rorâ sambâŋko fime fehame jambuŋkewec. Jambuŋkerâ poroŋ bazurâ motec jareme jaŋe bârâwiŋnerâ ŋic jarembiŋ. 17 Eme jaŋe mâmâc sasawa nâ gapec efârembiŋ. Eme tiwâne ŋerawec, i ropie hurâ sasac 12 fusewec.

Petorozi Jesure fuŋne mujaŋgeŋkewec

(Mat 16: 13-23” Maò 8: 27-33)

18 Juku Jesu e motecfâc-ticne jaŋehec buc juhuc nunumu gie bawec. Eku wio-jarerâ muwec: “Ŋic jaŋe nore mo mueŋgopieŋ?” 19 Wio-jareme šiŋuc âzâcnembiŋ: “Gâcne jaŋe Johane Miti Opâ fufuŋke mugareeŋgopieŋ, gâcne jaŋe Elia mugareeŋgopieŋ, â gâcne jaŋe porofete mimiŋne moczi ɋârewec jukac, iŋuc mugareeŋgopieŋ.” 20 Mupie jaŋacne indiŋ-joparâ muwec, “Á ŋoŋe ine nore mo mueŋgopieŋ?” Eme Petorozi šiŋuc muwec: “Go Anuturaonec Kristo jâmbâŋ.” 21 Mume ŋic moc mi mufua-jareniŋte mic muac sanaŋne ejarewec. 22 Erâ šiŋuc šuhuckerâ Jazawec: “Ŋic Fâri Wâtuŋnezi Juku šâic serereŋ bocjaha manaocmu. Soŋaŋ â taha bapa micne â miti qaqazu jaŋe e kiarao qikiŋnepie qame hâmorâ šoaŋ jahec â moc eha fahareocmu.”

Maŋ qâqâtâc mi qaisockezo

(Mat 16: 24-28” Maò 8: 34 ­ 9: 1)

23 Jesu e ŋic mâmâc sâko-jeŋic šiŋuc jazawec: “Ŋic moczi no bâjâpecnuzo murâ maŋ sahac-ticnere dâŋ râpeckerâ maripoŋ-ticne šoaŋne šoaŋne hâporâ bâjâpecnuzejec. 24 Moc e juju-ticne sakareme sifuckecneocmu â moc e nore erâ qikiŋneme fuacneocmu. 25 Moc e mâreŋte wiac sasawa hure-fâreku kinduŋ bânduŋ bajuhame juju-ticne kihâmome sipirickeme wemo wiac fârine focneocmu? 26 Moc e no nahacnere me miti-nanere maname mimi gaŋgaŋnehec eocmu, ine Ŋic Fâri Wâtuŋnezi Juku Mamac-ticne â tiri aŋelo jaŋere huririzi uucne erao riŋkehame sambâŋ tatamac-ticnehec fisirâ ŋic iŋucnere iŋuc Jaha maname mimi gaŋgaŋnehec eocmu. 27 No ine jâmbomac ŋazape mananiŋ: Domaŋgopieŋ ši jaŋeraonec gâcne hâmoc mi bâfuahapie Anuture Wofuŋ qâreŋ fua taniŋkeme honenšoŋgopieŋ.”

Jesuzi sambâŋ hawari ewec

(Mat 17: 1-9” Maò 9: 2-9)

28 Jesu e dâŋ i murâ juhame šoaŋ gie bapa 8 tarame numuocte Petoro â Johane â Jakobo rocjopame tikio fembiŋ. 29 Ferâ numuhame šâŋe mai-ticne hawarine fuŋmoc ewec. Ehame ŋaqi-ticne tamaerâ ɋaɋac taeŋne jâmbâŋ ewec. 30 Eme mi ŋic jajahec fuarâ ehec dâŋ muc manac enšepieŋ i¡ Ŋic šâŋe-jekic Mose â Elia. 31 Jahe sambâŋ tatamac-jekichec fisirâ Jesu Jerusalem haeo mâreŋko juju-ticne jutararâ raocmu irec dâŋ mumbiŋ. 32 Muhapie Petoro â âgo jahec-ticne jaŋe guŋ te mâretec ejare-bipieme šâŋe fitâcnerâ Jesu huriri qâreŋ-ticnehec â ŋic jahec ehec domapire honec-jopambiŋ. 33 Eme jahe razo epire Petorozi Jezu šiŋuc âzâcnewec: “Qaqazu, sowine šira juŋgopeneŋ. Irec manatec boze jahec â moc banaŋ, gore moc, Mosere moc â Eliare moc.” E dâŋ mi mana tarahuc iŋuc muwec. 34 Muhame karorac moczi waharâ sâoc-jopawec. Sâoc-joparâ foŋjopame motec jaŋe me kike fâfâc ehuc domambiŋ. 35 Eme karorac maŋko dâŋ šiŋuc fuawec: “Keci joroc Ŋokâ-nane, ŋoŋe dâŋticne mananšepieŋ.” 36 Eme dâŋ mana manahuc šâŋe firâ Jesu buc domame honembiŋ. Eme motec jaŋe wiac honembiŋ i dameŋ ira ŋic mi jajaza mâc maŋkerâ jumbiŋ.

Motec jaŋe demoŋ moc jâpe-bipiembiŋ

(Mat 17: 14-21” Maò 9: 1, 4-29)

37 Hae fureme tikionec wahapie ŋic guru sâkozi ehec bâbâfuac embiŋ. 38 Eme izia ŋic jaŋere ŋondeŋkonec moczi šiŋuc muhuc Jesu wâsickewec: “Qaqazu, go dâŋnane manarâ ŋokâ-nane bafickec, e mocjaha mae. 39 Manakic, demoŋ moczi hâpome ɋeŋfâfâc jaha owackeekac. Erâ ro fârec ecneme mic tâferu-ticne wefuekac. Eme demoŋzi motec jâpec mi bebehe ba âkejac ecneku mâretec bâdockeekac. 40 Eme motecfâcge jaŋe jâpecneniŋte numu-jarepe eipiembieŋ.” 41 Mume Jesuzi šiŋuc muwec: “O ŋicguru mamanasiŋ tâmiric â maŋsanaŋ, no ŋoŋehec hati jurâ ju ehuc âsi qataŋ eŋarepemu me? Ŋokâge bawarec.” 42 Eme motec Jesurao barahame demoŋzi fâreme mi kikene miŋgeŋkewec. Eme Jesuzi demoŋ dâŋ mucneme wiseme motec biaŋkeme mamac-ticne râcnewec. 43 Eme ŋic jaŋe Anutu tâpiri sâko-ticnere fuŋne honerâ warecke sâqorembiŋ.

Hâmoocte mufua-jarewec

(Mat 17: 22-23” Maò 9: 30-32)

Eme ŋic jaŋe Jesuzi wiac ewec bawec irec wareckehuc juhapie Jesuzi motecfâcne bucko šiŋuc jazawec:
44 “Dâŋ ši ŋazape manapaŋkeniŋ, Ŋic Fâri Wâtuŋne e ŋic jaŋere meo feocte dameŋ bembeŋkezo ekac.” 45 Iŋuc muhuc jazame motec jaŋe dâŋ i manapie qeŋ bipinehec eme fuŋne kâuc bambiŋ. Erâ wiocneniŋte hâwic-jopame behembiŋ.

Micne jujure dâŋ

(Mat 18: 1-5” Maò 9: 33-40)

46 Motec jaŋe nâŋâcnaonec mozi micne sâko jukac muhuc hehefaric embiŋ. 47 Iŋuc epie Jesuzi maŋjeŋicte fuŋne manarâ motec piticne moc rorâ maŋfuŋnao râerâ 48 šiŋuc jazawec: “Moczi motec piticne kecšiŋucne moc nore erâ mamac rau ecneocmu, e no mamac rau enareocmu. Á no mamac rau enareocmuzi sorecnuwec e mâmâc mamac rau ecneocmu. Erâ ŋoŋeraonec moczi wahakicne jâmbâŋ juocmu, ere fekicne muzo.”

49 Eme Johanezi šiŋuc âzâcnewec: “Qaqazu, nâŋe ŋic moc gore šâŋe muhuc demoŋ jâpec-jopame honembeneŋ, erâ e nâŋerao šuhuckerâ go mi bâjâpecguekacte qataracnembeneŋ.” 50 Mume Jesuzi šiŋuc âzâcnewec: “Mi qataracnezo. Gie-ŋeŋic mi hetâtiecmuzi âgo babafic-ŋeŋic eocmu.”

Samaria ŋic Jesu fic sakarecnembiŋ

51 Jesu e sambâŋko risiocte dameŋ bembeŋkezo ehame Jerusalem haeo raocte mupaŋkewec. 52 Mupaŋkerâ kiŋaŋ sorec-jopame bâniembiŋ. Bânierâ raku Samaria ŋic jaŋere hae mocko fisirâ Jesure biŋe fic moc bâfuaniŋte jazambiŋ. 53 Eme Jesu e Jerusalem haeo raocmu, iŋuc manarâ fic sakarembiŋ. 54 Fic sakarepie motec jahec-ticne Jakobo â Johane jahe i manarâ Jesu wiocnerâ mupic: “Wofuŋ, go manatec mupere sambâŋkonec šoc waharâ šacjopazejec me?” 55 Mupire forisierâ qatara-jactewec. 56 Eme hae mocko rambiŋ.

Jesu bâjâpezore dâŋ

(Mat 8: 19-22)

57 Rahapie ŋic moczi bâfuac-joparâ Jesu šiŋuc âzâcnewec: “Go ira me ira razo mutecne bâjâpecgupemu.” 58 Mume Jesuzi šiŋuc âzâcnewec: “Qowi jaŋe hawec-jeŋichec, â sawa wipe jaŋe sareŋ-jeŋichec, Ŋic Fâri Wâtuŋne e ine fofo roŋgâŋ basaekac.” 59 Eme Jesuzi ŋic moc bâfuarâ šiŋuc âzâcnewec: “Go ware bâjâpecnuc.” Mume ŋic e šiŋuc âzâcnewec: “Wofuŋ, manatec qanaŋ rarâ mamac-nane duckezepac.” 60 Eme Jesuzi šiŋuc âzâcnewec: “Behec-jopatec qâŋɋâŋzia qâŋɋâŋfâc-jeŋic buc ducjopanšepieŋ. Go ine rarâ Anuture uucmaŋ irec dâŋ muromackezemec.” 61 Ŋic moczi ine Jesu šiŋuc âzâcnewec: “Wofuŋ, no bâjâpecguzore enarekac. Erâ manatec qanaŋ risierâ wiacfâc-nane mâzoc-joparâ warezepac.” 62 Mume Jesuzi šiŋuc âzâcnewec: “Moc e woke guriŋne bahuc rârâpe fiocmu, iŋucnezi Anuture uucmaŋko gie bapare sâc mi eocmu.”

Copyright information for `KMG