Revelation of John 11

Johane ufuŋ sâc baocte mucnekicne

Eme moczi gunusâc narehuc šiŋuc nazawec: “Go fahare Anuture ufuŋ â alata sâc barâ maŋnao numuhuc jueŋgopieŋ jaŋe wosec-jopazemec. Ufuŋte hae šoŋa ine sâc mi bahuc mâc behetec fooc, i qâpuc jaŋere qikiŋnekicne. Jaŋe hâcne miti hae mosa 42 ima bahuc juniŋmu.

Mumutaniŋ ŋic jajahec fuapire hârâckonec qowizi Jofaocmu

“Eme no mumutaniŋ ŋicjahec-nane ejactepe mateŋ barâ ŋic findaŋdâŋ jazahuc juhapire šoaŋ gie bapa 1 tauseŋ â 260 tarazejec.” Jahe oliwa jâc â lambe iŋucne, jahe mâreŋte Wofuŋ ere maio domakopirec. Ŋic moc e râsi ejactezo mume micjekickonec šoc waharâ šaocmu. Irec ŋic moczi râsi ejacterâ sipirickeocmu. Ŋic jahe hoere motâc henicte tâpiri jactekicne, irec mupire hoe mi hehe mâc fohame findaŋdâŋ muhuc junicmu. Erâ mupire opâzi soc eocte irec tâpiri fojacteocmu, erâ mâreŋko wiac micne momori fuaocte mupire sâc fuaocmu. Eme miti mumutaniŋ dameŋ-jekic tarame hârâckonec qowi mimicnezi wefurâ râsi ejacterâ jofame hâmonicmu. Hâmopire ŋic jaŋe qâŋɋâŋ-jekic behec-jofapie hae sâkore hae šoŋao fonicmu. Hae irec šâŋe herâriehuc Sodom â Aigita mukicne, Wofuŋ-jekic hae ijaha maripoŋko qapie hâmowec. Eme mâreŋ sâc ŋic gâcne, sahac hawari-jeŋic fuŋne fuŋne â dâŋmarac-jeŋic fuŋne fuŋne, izi qâŋɋâŋ-jekic šoaŋ gie bapa jahec â moc â moc nâfocne honec-jofahuc juniŋmu, erâ gâcnezi ducjofazo mupie qatara-jareniŋmu. 10 Eme porofete jahe ŋic boc bâšâic-jopapicte mâreŋne mâreŋne ŋic šeri bubiaŋ ehuc boreŋ nareŋ gareŋ eniŋmu.

11 Eme šoaŋ gie bapa jahec â moc â moc nâfocne tarame Anuturaonec juju bâbâfua mâro qâŋɋâŋ-jekicko rašime ɋârerâ faharepic. Faharepire ŋic jaŋe honerâ bipic-jeŋic tarawec. 12 Ehame sambâŋkonec wiwira kâcɋene jaherao šiŋuc wahawec: “Ŋohe šira wefunic.” Eme râsifâc-jekic honec-jofahapie karorac maŋko sambâŋko fepic. 13 Eme dameŋ ijaha sambâŋko fepire izia homeŋ sâko bawec. Bame hae sâkoo fic gâcne, teŋkonec wâŋ irec sâc, herickehuc ŋic 7 tauseŋ jopame hâmombiŋ. Eme ɋâricne jumbiŋ jaŋe hâwic-jopame Anutu sambâŋ rune muteŋkembiŋ.

14 Tucwipezi jei jahec â moc wirawec, ine jajahecte fârine fuawec, mocjahare fokac ine biac fuaocmu.

Aŋelo namba 7 eki qeŋ qame wiac fuawec

15 Eme aŋelo namba 7 eki qeŋ qawec. Qeŋ qame sambâŋko micfânâŋ sâko embiŋ, ehuc šiŋuc mumbiŋ: “Ʒi mâreŋ sâko mâreŋ irec Wofuŋ jujure tâpiri i Wofuŋ-nâŋec â Kristo-ticne ere meo fekac, eme e guriŋ bapa gie barašihuc juocmu sanaŋ.” 16 Eme ŋicqizec 24 Anuture maio eri ŋeŋe-jeŋicko ŋembiŋzi waha fodaperâ Anutu šiŋuc muhuc daŋge nunumu ecnembiŋ:

17 “Wofuŋ Anutu bapafâre, jumeŋzi juekic,
nâŋe go daŋge mumuteŋ egareŋgopeneŋ.
Go tâpiri sâkoge qaratietec fuakac,
ehuc Wofuŋ giege fuŋkerâ bataniŋkekic.
18 Ŋicne ŋicne kimbeŋ qapie gore kimbeŋzi fuakac.
Erâ hâmokicne jaŋere dâŋ mutaracmurâ dameŋ maickekac.
Erâ kiŋaŋ qaqafâcge, porofete â mitiŋic,
â araŋ bagareeŋgopieŋ fekicne wahakicne,
jaŋe furine jarecmurâ dameŋne maickekac,
â mâreŋ sipirickeeŋgopieŋ jaŋe sipiric-jopacmurâ
irec dameŋ mâmâc maickekac.”
19 Jaŋe iŋuc epie sambâŋko Anuture ufuŋ aŋkeme qorac tapa katapa ufuŋmaŋko tâtâc fuawec. Eme izia bâbâric â micfânâŋ â ɋuŋ parandaŋ â homeŋ â hoe sanaŋ hâhâwicne fuawec.

Copyright information for `KMG