Revelation of John 14

Lama â kikefuŋfâc-ticne Zioŋ tikio domambiŋ

Eme no šâŋe firâ mi Lama Zioŋ tikio domame honezepac i¡ Erâ ehec ŋic 144 tauseŋ mâmâc domambiŋ. Mai-jeŋicko e jahacne šâŋe qâreŋ â Mamac-ticnere šâŋe qâreŋ fowec. Eme sambâŋkonec dâŋfânâŋ manapo, i opâ sâro fânâŋ iŋucne â ɋuŋ fânâŋ sâko iŋucne. Erâ dâŋfânâŋ i manape musi tinac ewec, ŋic bocjaha musi bapie fânâŋkeekac iŋuc tinac manapo. Jaŋe eri ŋeŋere maŋfuŋko â wiac jujune 4 â ŋicqizec jaŋere maio gae ɋâricne moc heeŋgopieŋ. Gae i ŋic gâcnezi he manac eene mi ewec, ŋic 144 tauseŋ, mâreŋŋic gâcne jaŋeraonec furi bacjopakicne, jaŋe sawa mamanane. Jaŋe hâcne ŋokacko mi sâqorehuc maŋɋaɋac jaha jumbiŋ” jaŋe hâcne Lama jume ju ecneeŋgopieŋ” jaŋe hâcne mâreŋŋic gâcne jaŋeraonec Anuture â Lamare qaqasune bâbâni rocjopakicne. Erâ micjeŋickonec burecdâŋ moc mi wahawec, jaŋe bahacmâc.

Aŋelo jahec â moc jaŋere dâŋ wiwira fuawec

Eme no aŋelo moc honepo, e faic sawao fotâcnehuc rawec. E mâreŋŋic jaŋere Biŋebiaŋ fofo sanaŋ, mâreŋ sâc ŋic sahac hawari-jeŋic â dâŋmarac-jeŋic fuŋne fuŋne, jaŋere bajuwec. Eki wiwic jaha wirahuc šiŋuc muwec: “Ŋoŋe Anutu araŋ bacnehuc sâsenšepieŋ, okac dameŋ-ticne maickekac hâcne. Sambaŋ â mâreŋ, hâwec â opâ šâŋe bâfuawec e mu wâwâsic ecnenšepieŋ.” Iŋuc murâ rame râpefuŋnao aŋelo moczi warerâ šiŋuc wirawec: “Babe hae sâko tâtiekac, tâtie-jâmbâŋkekac, hae irec rune mâreŋ sâc ŋicne sasecte waiŋ opâ momori gumec-jopahuc jumbiŋ hâcne.” Eme râpefuŋnao aŋelo âgo-ticne moczi warerâ dâŋ hahaŋne bahuc šiŋuc muwec: “Moc e qowi mimicne e jahacne me hawari-ticne dieŋzi hecneocmu â mai-ticnao me meticnao maqâreŋ roocmu, 10 e Anutuzi kimbeŋ-ticnere waiŋ opâ momori jâmbâŋ, opâ jâmbâŋhec mi bâsifuckekicne, i râqâc-ticnaonec gumeme tiri aŋelo â Lama jaŋere maio šocbâruŋko hurâ šâic serereŋ mana rahuc juocmu. 11 Eme šoczi ŋic iŋucne šâfitac-jopame irec hosâcne ŋezume ŋezu fehuc foocmu sanaŋ. Irec ŋic qowi mimicne â hawari-ticne dieŋzi hecnembiŋ jaŋe mecne, â šâŋe qâreŋ-ticne bajumbiŋ jaŋe mâmâc šâiczi mi behec-jopame ŋeŋe mana tâmiric ŋafe furec šušuhuc jaha mana rahuc juniŋmu.” 12 Dameŋ ira hâcne Anuture sâcmutâc dâŋ reŋkehuc Jesure miti hâwicmâc bajueŋgopieŋ tiriŋic i jaŋe sasanaŋ bâfuanšepieŋ.

Mitio hâmokicne jaŋere dâŋ

13 Eme sambâŋkonec dâŋ moc šiŋuc wahame manapo: “Go dâŋ ši qâreŋkec: Dameŋ ši fuŋkerâ, Wofuŋtao qohotahuc hâmoniŋmu jaŋere bubiaŋ manazo. Mârozi mukac, jâmbomac, jaŋe neneŋ gie-jeŋic hetararâ ŋemanahuc biaŋ-jopaocmu. Erâ juju bapa-jeŋicte fârinezi rapie raocmu.”

Mâreŋkonec mitiŋic rocjopazo irec sâsâc fuawec

14 Eme no fipe feme karorac qaŋqaŋ ututuŋ fuame honepo. Erâ karorac faio moc ŋewec, e hawari-ticne ŋic iŋucne. Qizec-ticnao ŋicwofuŋ du golzi bakicne roŋewec â meticnezi sâqe mictara baŋewec. 15 Ehame ufuŋkonec aŋelo moczi waharâ karorac faio ŋewec, e šiŋuc wiracnewec: “Go sâqegezi gie fârine qa roro ec, mâreŋko giere fârine woze-fârewecte qa roro ezore dameŋne maickekac hâcne.” 16 Iŋuc mume karorac faio ŋeweczi sâqe-ticne wickeme mâreŋko fârine qafârewec.

Sâqocne bapa okacne fisi-jareocmu irec sâsâc fuawec

17 Eme aŋelo moczi sambâŋko ufuŋkonec wahawec, e iŋuc jaha sâqe mictara bajuwec. 18 Warehame âgo-ticne moczi alata ŋeweckonec warewec. E šocte soŋaŋzi âgo-ticne sâqe mictara bajuwec e šiŋuc wiracnewec: “Go sâqege mictara mâreŋko waiŋ fârine qâtâcne-fârec, hândâŋne qeue-fârekac hâcne” 19 Mume aŋelo âgo-ticnezi sâqe wickeme mâreŋko waiŋ hândâŋne nâtâcneme Anutu kimbeŋ-ticnere katapa sâko irec maŋko beheme hufârewec. 20 Erâ hae râpeo âte pisickepie katapa maŋkonec socsâko wahahuc fowec. Wahaku šâkâŋne fuarâ becâsic mecqaŋeŋ-jeŋicko qawec. Á šâkâŋ rereŋ šoric-ticnere sâc ine 300 kilometa iŋuc ŋerawec.

Copyright information for `KMG