Revelation of John 15

Kiruŋzi hâwec irec mecnao gae hembiŋ

Eme sambâŋko mâsi qâreŋ sâko bipinehec moc honepo. Aŋelo 7 jaŋe wiac micne momori 7 badomambiŋ. Wiac i mimic fuahame Anuturaonec okacne fisi taraocte mukicne. Erâ hâwec moc honepo, i kiruŋzi barâ šocbâruŋhec bâbâsifuc ekicne tinac fome honepo. Erâ qowi mimicne ere dâŋ â hawari â šare qâreŋ i sanaŋkerâ qikiŋnembiŋ ŋic i jaŋe kiruŋzi hâwec irec mecnao Anuturaonec musi badomapie honec-jopapo. Jaŋe Anuture kiŋaŋŋic Mose â Lamare gae kecšiŋuc muhuc heeŋgopieŋ:

“O Wofuŋ Anutu bapafâre,
go gie fekicne â bipinehec baekic.
Ŋicne ŋicne jaŋere Wofuŋ Sâko,
go hatage tiŋne â fâri fideteŋ.
Wofuŋ go mozi araŋ mi bagareocmu
â mozi šâŋege mi mumbiaŋkeocmu?
Go mocjahazi tiri hâcne.
Irec ŋicne ŋicne gorao warerâ dieŋzi hegareniŋmu.
Go bâbâtiŋ gie fârine batec fuŋne taniŋkekac hâcne.”

Aŋelo 7 râqâc-jeŋichec fuambiŋ

Eme no šâŋe firâ honehape sambâŋko ufuŋ qoruc boze-ticnehec irec motâc aŋkewec. Aŋkeme aŋelo 7 wiac micne momori 7 bajumbiŋ, jaŋe ufuŋkonec wahambiŋ. Jaŋe ŋaqi ɋaɋacne qaŋqaŋ rojumbiŋ, â amec-jeŋicko umbika golzi bakicne fowec. Eme wiac jujune 4 domambiŋ jaŋeraonec moczi aŋelo 7 râqâc 7 golzi bakicne jare-fârewec. Râqâcmaŋko ine Anutu juju sanaŋ runere kimbeŋ fusucmarâ fowec. Eme ufuŋmaŋko Anutu tatamac-ticnere â tâpiri-ticnere hosâc fuarâ fusucma-fârewec. Eme aŋelo 7 jaŋe wiac micne momori 7 mi bâfua tarahapie ufuŋko fefere hata mi fuawec.

Copyright information for `KMG