Revelation of John 17

Ŋokac moc qowi bâbâroŋko ŋewec

Eme aŋelo 7 râqâc 7 bajumbiŋ jaŋeraonec moczi norao warerâ šiŋuc nazawec: “Sasec ŋokac sâko opâ kâcɋenao ŋeekac e okacne fisicneocmu, i waretec gowatupe. Mâreŋne mâreŋne ŋic jaŋe ehec sasec eec eeŋgopieŋ â mâreŋ sâc ŋicwofuŋ jaŋe eraonec hâcne sasec-ticnere waiŋ opâ nârâ maŋsifuc ejareekac.” Iŋuc nazame maŋnane ŋerisieme mâreŋ tuhuo jowacnu rawec. Eme ira ŋokac moc honepo, e qowi mimicne bâbâroŋ moc ere faio ŋewec. Qowi sahac-ticnao šâŋe qâreŋ simbiŋne fuŋne fuŋne sâcke-fârerâ fowec. Erâ qowi hâcne e qizec-ticne 7 â šuŋene 10. Á ŋokac e ŋaqi bâbâroŋ â âmuc âmucne rojuwec, erâ erizi kiseŋ qâseŋ kiwec. Meticnezi râqâc moc golzi bakicne badomawec, i sasec-ticnere sohoŋ mamakâczi fusewec. Mai-ticnao šâŋesoŋ-ticne kecšiŋuc qâreŋkekicne fowec: “Babe hae sâko, mâreŋ sâc sasec mamakâc wiac irec neŋgocne no hâcne.” Eme ŋokac e tiriŋic â Jesure mumutaniŋfâc jaŋere soc nâku maŋne bibiriwame honepo. Honerâ bipic tatara enarewec.

Qowi qizecne 7 irec dâŋ

Eme aŋelozi šiŋuc muhuc wio-narewec: “Wemocte bipic tatara egarekac? No ŋokacte fuŋne â qowizi âsickekac ere fuŋne â qowi qizecne 7 â šuŋene 10 irec fuŋne mâmâc gazape manac. Go qowi mimicne honemec i mârâc jaha juwec, ši mi jukac, šâhec ine hârâckonec risie wefurâ sisipiric sanaŋko huocmu. Eme qowi mârâc juwec, ši mi jukac, juku ine risieocmu, i mâreŋko ŋic jaŋe honerâ mu warec ecneniŋmu. Ʒâŋe-jeŋic mâreŋ fufuaonecteaŋ juju sanaŋte papiao mi qâreŋkekicne, ŋic i jaŋe hâcne iŋuc eniŋmu. Ʒi maŋɋârâŋheczi mamanane fokac: Qizecne 7 i tiki 7, ŋokaczi ŋefackekac hâcne. 10 Eme tiki 7 izi ŋicwofuŋ 7. Ŋicwofuŋ 5 arictac embiŋ, moc ši jukac â moc juku fuaocmu. Fuarâ dameŋ bembeŋne mac juocte mucnekicne. 11 Qowi mârâc juwec, ši ine mi jukac, izi ŋicwofuŋ 7 jaŋere birio zuhuckehuc namba 8 eocmu, erâ sisipiricko huocmu.

Ʒuŋene 10 irec dâŋ

12 “Ʒuŋene 10 honemec i ŋicwofuŋ 10 jaha wâc, erâ jaŋe gie-jeŋic dameŋ šiŋuczia mi fuŋkembiŋ. Ŋicwofuŋ gie-jeŋic fuŋkerâ qowi mimicnehec dameŋ bembeŋne mac baniŋmu. 13 Jaŋe maŋ mamanasu-jeŋic mocjaha fome qowi mimicnere kiŋaŋ šoɋachec qaniŋmu. 14 Ehuc Lamahec šika gie baniŋmu. Eme Lama eki ine sanaŋkerâ jopaocmu. Eki hâcne fekicne jaŋere Fekicne â ŋicwofuŋ jaŋere Wofuŋ Sâko. Á jume jujufâc-ticne rowosâec-joparâ rocjoparâ bufuŋfâc-ticne bacjopakicne hâcne.”

Ŋokacte dâŋ

15 Iŋuc murâ šiŋuc šuhuckerâ nazawec: “Sasec ŋokac e opâ sâko irec mecnao ŋeme honemec, opâ izi ŋicne ŋicne, sahac hawari â dâŋmarac fuŋne fuŋnehec. 16 Erâ šuŋene 10 honemec, jaŋe mecne â qowi e mâmâc qaisockerâ ŋaqi wiac jâoc rofârerâ biucne nârâ siec sahacne šocko rikeniŋmu. 17 Erâ i mâc mi eniŋmu, Anutuzi maŋ jeŋicko mu qafeŋ râeme jaŋe dâŋticne reŋkehuc maŋ mocjaha efârerâ qowi kiŋaŋ qacneniŋmu. Qacnehuc juhapie Anuture dâŋ hâcne sanaŋke-fâreocmu. 18 Erâ go ŋokac honemec i hae sâko, e hâcne mâreŋ sâc ŋicwofuŋ ejareme kiŋaŋ qacneniŋte tâpiri focnekac.”

Copyright information for `KMG