Revelation of John 3

Maŋ hâmocne mi juzo

“Sarde haeonec kikefuŋ aŋelo-jeŋicte dâŋ kecšiŋuc qâreŋkec: `Anuture mâro 7 â bâpiŋ 7 bajuekaczi gore šiŋuc mukac: No eebapagere fuŋne manakopac, ŋic jaŋe honecgupie ɋâricne jukomec tinac ekac, maŋge ine hâmoc qâŋɋâŋne fokac. Irec go ɋârerâ ŋic gâcne hâmozo eŋgopieŋ jaŋe maŋjeŋic âke ɋârezemec. Manakic, no Anuture maio eebapage honepe mi sâckekac. Go wiac gare tahac ekicne â gaza qazuc ekicne, i heɋârerâ aimuŋ bajuhuc maŋge bârisiezemec. Mi ɋâretecne ine râsi fifisi tinac fisi-garepemu, go šâfo-nane moc mi manahaŋtec biac fisipemu hâcne. Sarde haeo ira ŋicfâcge gâcne juŋgopieŋ, jaŋe ŋaqi-jeŋic sohoŋ mi ruacnembiŋ. Eme iŋucnezi juku ŋaqi qaŋqaŋ rojuhuc nohec ŋeŋe juju eniŋmu. Jaŋe iŋuc eniŋte mana-jarepe sâckekac. Moc e sasanaŋ gie baraku batarame ŋaqi qaŋqaŋ râcnepe rojuocmu, â šâŋe-ticne juju sanaŋ papiao mi hetâmirepemu, aricne, no šâŋe-ticne Mamac-nanere maio â aŋelofâc-ticne jaŋere maio mutaniŋkepemu. Mârozi kikefuŋ dâŋ jazakac, i hazecneheczi manazejec.'

Miti paŋnea bajupene Wofuŋzi eesâicko dopec-nâpoocmu

“Filadefia haeonec kikefuŋ aŋelo-jeŋicte dâŋ kecšiŋuc qâreŋkec: `Tiri juju â mume sasanaŋ, Dawidire ki bajuhuc motâc bâŋgoroŋkeme moczi mi basanaŋkeocmu, me basanaŋkeme moczi mi bâŋgoroŋkeocmu, eki hâcne gore šiŋuc mukac: No eebapagere fuŋne manakopac. Manakic, no maigao motâc moc baandaŋke-garepo i moczi moc sâcne mi hebâzicke-gareocmu. Go tâpiri piticne sawa fogarekac i manakopac, erâ sifu dâŋnane paŋnea bajuhuc šâŋe biŋe-nane mi behemeŋ. Manakic, Sataŋte guruonec ŋic gâcne jaŋe Judaŋic fârine aricne, racne juhuc burec eeŋgopieŋ, eme no jaŋe ejarepe gorao fisirâ dieŋzi hegarehuc, âgo bacgupo i hone taranšepieŋ. 10 Go woŋec-nane tatakic tâmiric jucmurâ mugarekicne, dâŋnane i paŋnea bajumeŋte noni eesâic dameŋ maicguzacte sabecgupemu. Eesâic i mâreŋ sâc ŋic jaŋerao mâmâc fua-fâreocmu. 11 No biac fâpemu, irec go wiac fogarekac i paŋnea bajuhaŋtec moczi eriduge mi gowac rozejec. 12 Moc e sasanaŋ gie baraku batarame e Anutu-nanere ufuŋko safatariŋ âkendâŋnepemu. Eme e ira domahuc juocmu sanaŋ. Erâ ere faio Anutu-nanere šâŋe qâreŋkepemu, erâ Anutu-nanere hae ere šâŋe iŋuc jaha ere faio qâreŋkepemu, i Jerusalem hae ɋâricne hâcne, sambâŋkonec Anutu-naneraonec wahaocmu, erâ no nahacne šâŋe ɋâri i iŋuc jaha ere faio qâreŋkepemu. 13 Mârozi kikefuŋ dâŋ jazakac, i hazecneheczi manazejec.'

Dodo horaŋne mi juzo

14 “Laodikea haeonec kikefuŋ aŋelo-jeŋicte dâŋ kecšiŋuc qâreŋkec: `Dâŋte mamacne â mumutaniŋ fârine â mume sasanaŋ, e Anuturaonec wiac fuawec irec fuŋqizecne juekaczi gore šiŋuc mukac: 15 No eebapagere fuŋne manakopac. Go mâteŋne mi juekic â fârone mi juekic i manakopac. Mâteŋne me fârone juzo murâ junšaŋ me¡ 16 Mâteŋne â fârone ŋondeŋ-jekicko dodo horaŋne juekicte micnaneonec maŋucgupe wahacmu. 17 Go gahacnere šiŋuc muekomec, no mâriri bocjaha fonarekac, no wiac wemo afecne hurepo, irec wiac moc mi basapemu. Go fuŋnege kâuc baekic, ehuc qarâ suriŋne, huacbucne, tac qararacne, tiŋtuŋne â biuctac juekic, i mi mana tarakomec. 18 Irec go gazape manac: Go noraonec šuŋe kizukicne furine barâ boreŋhec ezemec, â ŋaqi qaŋqaŋ furine barâ hetec huŋ mimige sâockezejec, erâ šâŋere wokemaŋ furine barâ šâŋege ruacnerâ fiɋaɋackezemec. 19 No âgo bacjopaekopac jaŋe mu bâtiŋ â qa bâtiŋ ejare-fâreekopac. Irec go šoɋac erâ maŋge bârisiezemec. 20 Manakic, no motâc râpeo domahuc heickekopac, eme moc e dâŋnane manarâ motâc ronareme ere ficko ferâ suanšeŋ nâ gumec ecnepemu. 21 Moc e sasanaŋ gie baraku batarame noni hefârepe nore eri ŋeŋeo mâmâc ŋenacmu, no iŋuc jaha sasanaŋ gie baraku batarape Mamac-nanezi ere eri ŋeŋeo ŋepemurâ hefârecnuwec. 22 Mârozi kikefuŋ dâŋ jazakac, i hazecneheczi manazejec. Ž ”

Copyright information for `KMG