Revelation of John 7

Ŋic mai-jeŋicko maqâreŋ bajarekicne

Eme no šâŋe firâ aŋelo 4 honec-jopapo, jaŋe mâreŋ tuturuŋne 4 ira doma rahuc mâreŋte mâŋâŋ 4 badomambiŋ. Mâreŋko me hâwecko me jâcko mâŋâŋ moc mi qaocte iŋuc embiŋ. Ehame šoaŋ wewefunaonec aŋelo moc wefume honepo. E Anutu jujune eraonec maqâreŋ bajuwec. Bajuhuc aŋelo 4 mâreŋko â hâwecko ima baniŋte mujarekicne jaŋe wiwic jaha wira-jarehuc šiŋuc muwec: “Ŋoŋe mâreŋko me hâwecko me jâcko ima biac mi banšepieŋ, nâŋe qanaŋ Anuture ŋicfâc mai-jeŋicko maqâreŋ râenaŋmu.” Iŋuc mume ŋic maqâreŋhec jaŋere šare kecšiŋuc mupie manapo: “Israe guru sâc jaŋeraonec 144 tauseŋ maqâreŋ râe-jarekicne. Judare guruonec 12 tauseŋ maqâreŋ-jeŋichec, Rubeŋte guruonec 12 tauseŋ, Gade ere guruonec 12 tauseŋ, Ase ere guruonec 12 tauseŋ, Naftali ere guruonec 12 tauseŋ, Manase ere guruonec 12 tauseŋ, Simeoŋ ere guruonec 12 tauseŋ, Lewi ere guruonec 12 tauseŋ, Isasa ere guruonec 12 tauseŋ, Sebuloŋ ere guruonec 12 tauseŋ, Josefe ere guruonec 12 tauseŋ, Benjamiŋ ere guruonec 12 tauseŋ, ŋic iŋuczi maqâreŋ-jeŋichec embiŋ.”

Ŋicguru hâhâwicne Anuture maio domambiŋ

Wiac i hone manac efârerâ moc honepo, mâreŋ sâc irec ŋic tucne, sahac hawari-jeŋic fuŋne fuŋne â dâŋ marac-jeŋic fuŋne fuŋne, guru sokawec jâmbâŋ, ŋic moczi mi wowosene, jaŋe eri ŋeŋere â Lamare maŋfuŋko domapie honec-jopapo. Jaŋe ŋaqi qaŋqaŋhec sasawa, 10 erâ mejeŋiczi šariŋ badomahuc dâŋ hahaŋne bahuc šiŋuc mumbiŋ: “Bâbâpiaŋ i Anutu-nâŋec eri ŋeŋeo ŋekac erao â Lamarao fokac.” 11 Eme aŋelo sasawa eri ŋeŋe â ŋicqizec â wiac jujune 4 orâŋ-jopahuc domambiŋ, jaŋe eri ŋeŋe maŋfuŋnao fodaperâ Anutu nunumu mumuteŋ ecnehuc šiŋuc mumbiŋ: 12 “Jâmbomac¡ Mumuteŋ â eri qaraweŋ â maŋɋârâŋ â daŋge mumu â šâŋe rara â tâpiri â sasanaŋ i Anutu-nâŋec focnekaczi focne rahuc juzejec sanaŋ. Jâmbomac.”

Jaŋe šâic busâqoc maŋnaonec

13 Eme ŋicqizec jaŋeraonec moczi wio-narerâ muwec: “Ŋaqi qaŋqaŋhec i mo jaŋe? Wenirec warembiŋ?” 14 Wio-nareme dâŋ šiŋuc bâtikiecnepo: “Ŋicbomboŋ-nane, i goki manakic.” Eme nazawec: “Jaŋe šâic busâqoc maŋnaonec warembiŋ â ŋaqi-jeŋic Lamere soczi šure ɋaɋackembiŋ.

15 Irec ši Anutu eri ŋeŋe-ticnere maŋfuŋko juhuc
ŋafe furec ufuŋ-ticnao kiŋaŋ qacneeŋgopieŋ.
Ehame eri ŋeŋeo ŋeekaczi qâtec-jopahuc sâoc-jopaocmu.
16 Eme nânâ opâre mocwâc mi hâmoniŋmu;
šoaŋzi mi rikec-jopaocmu â šâic fâro mi fua-jareocmu.
Ŋeŋe šâšâŋiŋko Lama domakac eki hâcne soŋaŋ-jopaocmu,
ehuc juju opâ šâkâŋnao amec-jopa rahuc juocmu;
erâ Anutuzi šâŋeuc-jeŋic bâkereŋke-fâreocmu.”
Copyright information for `KMG