Revelation of John 8

Aŋelo 7 jaŋe qeŋ jarekicne

Eme Lama e sâfâ namba 7 bâhockeme sambâŋko niniŋ qiririŋ fuarâ fohame haæ aua qâririŋ ewec. I tarame aŋelo 7 Anuture maŋfuŋko domambiŋ jaŋe honec-jopahape gâcnezi qeŋ 7 jarembiŋ. Eme aŋelo moczi râqâc golzi bakicne ihec warerâ ra alata maŋfuŋko badomame gâcnezi ira hosâc âsu biaŋ bocjaha râepie huwec. Hume eri ŋeŋe mainao alata golzi bakicne ŋewec irec fainao râehuc mitiŋic jaŋere nunumuo šuhuckewec. Ehame meticnaonec hosâc âsu biaŋ izi mitiŋic jaŋere nunumu bafickehuc Anuturao fewec. Aŋelo e iŋuc erâ alataonec šoc kine rorâ râqâc-ticne bâfuserâ mâreŋko hoŋkeme huwec. Hume ɋuŋ parandaŋ â bâbâric â homeŋ fuawec.

Aŋelo 4 jaŋe qeŋ qapie mâreŋko wiac fuawec

Eme aŋelo 7 qeŋ jarekicne jaŋe qeŋ qaniŋte šawiembiŋ. Ehuc aŋelo namba wâŋ eki qeŋ qame hoe sanaŋ â šoc sochec bâsifuckekicne izi mâreŋko hewec. Heme mâreŋ tucne šoczi šawec â jâc tucne â sopâc kecɋaŋ sasawa šoczi šafârewec.

Eme aŋelo namba 2 eki qeŋ qawec. Qeŋ qame wiac moc tiki sâko iŋucne šocbâruŋnehec hâwecko rucnewec. Rucneme hâwec tucne soc efârewec. Eme hâwec qowi tucne hâmo-fârembiŋ â woke tucne šaŋke-fârewec.

10 Eme aŋelo namba 3 eki qeŋ qawec. Qeŋ qame bâpiŋ sâko moc sambâŋkonec tara waharâ ine waha iŋucne bâruŋkehuc opâ gâcnao huwec. 11 Bâpiŋ šâŋene Hâtâqiŋqiŋ. Eme irec opâ gâcne hâtâ qiŋqiŋne eme ŋic jaŋe nâpie hâtâc-jopame bocjaha hâmombiŋ.

12 Eme aŋelo namba 4 eki qeŋ qawec. Qeŋ qame šoaŋ mosa â bâpiŋ gâcne ira sâwec fuame tatamac-jeŋic pitiwawec. Tatamac-jeŋic gâkowawecte hae burec burec sawa furewec â ŋafeo iŋuc jaha mosa bâpiŋ buburecne tamaewec.

13 Eme no šâŋe firâ tucwipe sâko moc honepo. E sawao faic jâmbâŋ juhuc wiwic jaha šiŋuc wirawec: “Jei, jei, jei, aŋelo jahec â moc jaŋere qeŋ fokac, i qapie mâreŋŋic jaŋe weniŋuc eniŋmu!”

Copyright information for `KMG