Romans 10

Anutuzi kiŋ tatarare hata bâfuawec i Judaŋic jaŋe qikiŋnembiŋ

Qomâfâc-nane, Judaŋic âgofâc-nane biaŋkeniŋte maŋnanezi boc enareme Anutu irec numucneekopac. Jaŋe Anutu kiŋaŋ qacneniŋte šoɋac ehuc jueŋgopieŋ i honeekopaczi mukopac. Erâ i hatane kâuc bahuc eeŋgopieŋ. Jaŋe Anuturaonec kiŋfâsâc eere hata fokac i kâuc baeŋgopieŋte jaŋac tiŋke biaŋ eniŋte giene baeŋgopieŋ. Irec Anutu tiŋne rune mi dapecnembiŋ. Ŋiczi mamanasiŋhec erâ kiŋfâsâc bâfuanaŋte Kristozi sâcmutâc dâŋte hata hebâzicke-nârewec.

Mose e dâŋ šiŋuc qâreŋkewec: “Ŋic moc e sâcmutâc dâŋte tiŋke biaŋ hata âteocmuzi juju bâfuaocmu.” Á mamanasiŋte tiŋke biaŋ eere dâŋ ine kecšiŋuc fokac: “Go maŋgezi šiŋuc mi muzemec: Mozi sambâŋko ferâ Kristo bawahaocmu, me mozi hârâcko hurâ Kristo hâmokicne jaŋeraonec jowa wefuocmu?” Iŋuc mâcne, tiri papiao kecšiŋuc mukicne: “Miti i šoricko mi fokac, i mumugao â mamanagao râekicne.” I mamanasiŋte dâŋ ŋaza qazuc eeŋgopeneŋ irec mukicne. Jesu e Wofuŋ-nane i mumugao foocmu â Anutuzi Jesu hâmockonec bâɋâre-narewec i mamanagao foocmu eme biaŋkerâ jucmu. 10 Maŋzi Jesu manasiŋkehuc kiŋfâsâc ezo, â miczi e mutaniŋkehuc biaŋkezo. 11 Eme irec hâcne miti papiao kecšiŋuc qâreŋkekicne: “E manasiŋkeocmuzi mi qurutuaocmu.” 12 Judaŋic â Grikŋic bârâwiŋ mi eŋgopeneŋ, e mocjahazi Wofuŋ junâre-fâreekac, erâ wiac fuŋne fuŋne hezu henâreekac. 13 Irec hâcne šiŋuc mukicne: “Wofuŋte šâŋe riwaseckeocmuzi biaŋkerâ juocmu.” 14 Ririwasecke i e mi manasiŋkeeŋgopieŋzi wemocko eniŋmu? Anutu mamanasiŋke i dâŋticne mi manaeŋgopieŋzi wemocko eniŋmu? Anutu dâŋticne mamana i biŋe mumu tâmiric wemocko eniŋmu? 15 Á biŋe mumu i moczi jaza sorec mi ejarehame wemocko fuaniŋmu? Dâŋqâreŋ šiŋuc hâcne fokac: “Biŋebiaŋ mumuŋic jaŋere kike fânâŋzi maŋ baafec bâfuaekac.”

Anutuzi Judaŋic bâipiec-jopawec

16 Biŋebiaŋ ine ŋic gâcnezi mana rereŋ mi embiŋ. Jesajazi wâc šiŋuc muwec: “Wofuŋ, biŋedâŋ muhaŋnekicne i mozi mana šakiewec?” 17 Irec šiŋuc manazo: Mamanasiŋ i miti mu manacte fârine, â miti mu manac i Kristore micte fuaekac. 18 Hâc, eme šiŋuc muhuc wiokopac: Jaŋe miti mi manambiŋ me? Iŋuc mâcne,

“Micfânâŋ-jeŋiczi mâreŋ sâcke-fârewec
â dâŋjeŋiczi mâreŋ qaŋeŋnao fisiwec.”
19 Eme mocwâc wiohuc mukopac: Israe ŋic jaŋe mi mecne mana-hâmombiŋ? Iŋuc mâcne, qanaŋ Mosezi šiŋuc qâreŋkewec i mupe:

“No ŋic omane rocjopape siric-ŋopapie iiŋguuŋ ejarenšepieŋ;
ŋicguru mutucne hefârec-jopape buŋeŋic gâpârezejec.”
20 Eme šâhec Jesajazi dâŋ bâutuckehuc kecšiŋuc muwec:

“Mi basacnuhuc jumbiŋzi bâfuacnumbiŋ,
nore mi muhuc jumbiŋ jaŋe maic-jopapo.”
21 Erâ Israe ŋic jaŋere ine šiŋuc mu qâreŋ ewec: “No ŋicguru mana qâomane â mickobacne dameŋ šora meoric qajarehuc jupo.”

Copyright information for `KMG