Romans 13

Kia gawamaî jaŋere dâŋ

Ŋic mâmâc sasawa kia gawamaî jaŋere dâŋ reŋkenšepieŋ. Kia gawamaî gie i Anuturaonec. Juraŋgopieŋ jaŋe Anuture micte juraŋgopieŋ hâcne. Irec moc e kia gawamaî jaŋere dâŋ qâsuahuc Anuture dâŋ qâsuaocmu. Erâ qâsuaniŋmu jaŋe okacne roniŋmu. Ebapa-jeŋic biaŋne jaŋe kia gawamaî jaŋere mi hâwic-jopaekac, sâqocne baeŋgopieŋ jaŋe ine hâwic-jopaekac. Irec go hâhâwic tâmiric juzo murâ wiac biaŋne ezemec. Wiac biaŋne etec gore manapie sâckeocmu. Kia gawamaî jaŋe Anuture kiŋaŋ qaqa hâcne, ŋezicgupie juhâmocmurâ mujarekicne. Go sâqocne bacmuo ine hâwicguzejec, jaŋe šika maŋgâŋ mi bajueŋgopieŋ. Jaŋe Anuture kiŋaŋ qaqazi sâqocne bapa jaŋerao bâbâtiŋ gie bahuc okacne jareniŋmu. Irec dâŋjeŋic reŋke-jâmbâŋkezo, erâ i okacnere hâhâwicte sawa mâcne, gahacne maŋzi tutuc qagarezacte wâc dâŋjeŋic reŋkezemec. Jaŋe Anutuzi soŋaŋ gie mujarewec i baeŋgopieŋte hâcne ŋoŋe takesi moneŋ râeeŋgopieŋ.

Ââgo erâ maŋjauŋ eec ezo

Eme ŋoŋe wiac mukicne sâc ejarenšepieŋ: Takesi jajarere mukicne jaŋe takesi jarenšepieŋ, kiŋaŋ qaqajarere mukicne jaŋe kiŋaŋ qajarenšepieŋ, araŋ babajarere mukicne jaŋe araŋ bajarenšepieŋ, sâsâsec-jopare mukicne jaŋe sâsec-jopanšepieŋ. Wiac omanere tofa bazupie tarazejec, maŋjauŋte tofa mocjaha babazuc epie tatarane ine mi fokac. Maŋjauŋhec juekaczi sâcmutâc dâŋ reŋkekac muzo. Sâcmutâc dâŋ šiŋuc mukicne: Ŋowe ŋonâŋ ŋohe bebehec mi ezepirec, go šika mi qazemec, go fiuc mi rozemec, go andac mi ezemec, sâcmutâc dâŋ i erâ gâcne i mâmâc sasawa qâhâckerâ qizecne šiŋuc mukicne: Gahacnere egareekac sâc ijaha âgogere egarezejec. 10 Maŋjauŋhec juocmuzi âgo-ticne sâqocne mi ecneocmu. Irec maŋjauŋzi sâcmutâc dâŋrereŋ fârine ekac.

Ʒoaŋ ɋaɋacko aimuŋ juzo

11 Iŋuc eniŋte muŋarekicne ŋoŋe dameŋ širec fuŋne manaŋgopieŋ, guŋkonec ɋârerâ faharezo irec šâfo maickekac hâcne. Miti fuŋkerâ manambeŋ ira bâbâpiaŋte dameŋ šošoricne fowec, ši ine dameŋ qândâŋkekac. 12 Ŋafe tarazo ekacte hae fureocte furic râekac. Irec dapâcte wiac hetararâ tatamackonec sându maro menâŋecko rašizejec. 13 Ʒoaŋ ɋaɋacko jujune pectâc junšepeneŋ, nâ areŋ â tiwâ kadahe me gae wowo â sasec mamakâc me rârâsi â iiriac i mi ezo, aricne. 14 Wofuŋ Jesu Kristo e ŋaqi-ŋeŋic eme rojunšepieŋ Erâ sahac-ŋeŋiczi sasec bâfuazacte mana manahuc jauŋ bacnenšepieŋ.

Copyright information for `KMG