Romans 16

Paulo e Roma haeonec ââgo guru jaŋere mamanac Juwec

Ŋokac âgo-nâŋec Foibe, Keŋkereai kikefuŋ bafic-jopahuc juekac, e fâ fisime ŋoŋe mitio munârekicne irec sâcko Wofuŋte erâ hezu hewâneŋ ecnenšepieŋ. Erâ e irec me irec ecneme bafickenšepieŋ. Ŋokac e no nahacne â gâcne mâmâc kiŋaŋ qanârehuc juwec.

Erâ Prisika â Aqila, Kristo Jesu gie-ticnere babafic jahec-nane jahe jasaniŋ, mamanac-nane jaherao fokac. Jahe hâcne nore erâ sahac-jekic qaisockezo epicte no sawa mâcne, hae sâc kikefuŋ nâŋe jahere bubiaŋ bajueŋgopeneŋ. Jahere ficko mitire tumaŋneeŋgopieŋ ŋic ŋokac i jaŋe wâc mu šeri ejarekopac. Âgo-nane Epaineto, Asia mâreŋ masunao micne barâ Kristoŋic ewec, e wâc mu šeri ecnekopac. Maria e wâc mu šeri ecnekopac âzâcneniŋ, e ŋoŋere erâ gie bocjaha bawec. Androniko â Junia, Judaŋic âgo jahec-nane, kâpâcwâru mâmâc bacnâpokicne, jaherao mamanac-nane fokac i jasaniŋ. Jahe ŋic šâŋe biŋeheczi aposolo jaŋere guruo juhuc, no mâc juhape Kristore miti bânierâ manapic. Mitio âgo-nane Ampiliato e wâc mu šeri ecnekopac. Urbano, Kristore giere babafic embeŋ, â Sitaki âgo-nane jahe wâc mu šeri ejactekopac i jasaniŋ. 10 Apele, Kristore ŋic fârine, â Aristobulo ere wiacfâc jaŋe mu šeri ejarekopac. 11 Judaŋic âgo-nane Herodioŋ erâ Narikiso wiacfâcne gâcne mitio jueŋgopieŋ, jaŋerao mamanac-nane fokac. 12 Ŋokac jahec Tirifaina â Tirifosa, Wofuŋte erâ gie sâko bapic, â Peasi e iŋuc jaha Wofuŋte erâ gie paŋšâic bawec, jaŋe mu šeri ejarekopac wâc. 13 Wofuŋte bufuŋ Rufu â neŋgoc-ticne, e no wâc neŋgoc enarewec, jaherao mamanac-nane fokac. 14 Asiŋkrito, Filegoŋ, Hereme, Patoroba, Herema â âgofâc-jeŋic jaŋe mu šeri ejare-fârekopac. 15 Filologo â ŋokac Julia erâ Nereo â seŋticne â Olumpa â miti ŋic ŋokac jaŋehec jueŋgopieŋ, jaŋe mâmâc mu šeri ejare-fârekopac. 16 Ŋaŋac wâc mitio meo babac enšepieŋ. Hae sâc Kristore kikefuŋ jaŋe ŋoŋere mamanac wâc juŋgopieŋ.

Mitiŋic burec burec jaŋere uŋ muwec

17 Âgofâc, ŋoŋerao fâfâuc bâfuahuc, miti qazu-ŋarekicne i bâsifuckezo eeŋgopieŋ ŋic i jaŋere ruc bahuc dic bajarenšepieŋ. 18 Ŋic iŋucne jaŋe Wofuŋ Kristo mâcne, jaŋe jaŋacne hobu kiŋaŋ qacneeŋgopieŋ. Ehuc mumumbiaŋ dâŋ muhuc ŋic ŋokac omane mu bâmiriŋ ejarehuc eatuc-jopaeŋgopieŋ. 19 Miti mana rereŋ-ŋeŋicte biŋe i hae sâc rafârewec. Eme no irec ŋoŋere bubiaŋ manahuc kecšiŋuc eniŋte ŋazape: Wiac biaŋnere maŋafec junšepieŋ â wiac sâqocnere ine maŋ ŋeŋemâc enšepieŋ. 20 Anutu wama rune eki mi šoraha Sataŋ ro bawaha âte ecneocmu. Wofuŋ Jesu Kristo ere aki anonoczi ŋoŋerao fozejec.

Âgodâŋ â jambuŋdâŋ

21 Babafic-nane Timoteo â Judaŋic âgofâc-nane Lukio â Jasoŋ â Sosipate jaŋe ŋoŋere mamanac juŋgopieŋ. 22 Teatio no papia ši (Paulore mickonec(c) qâreŋkehuc iŋuc jaha Wofuŋte maio ŋoŋere manasukopac. 23 Gaio e no â kikefuŋ mâmâc sasawa hezu hewâneŋ enâreekaczi iŋuc jaha ŋoŋere manasukac Erâ hae soŋaŋ Erasto â âgo-nâŋec Qâto jahe iŋuc jaha eŋarekopirec, [ 24 Wofuŋ-nâŋec Jesu Kristo ere aki anonoczi ŋoŋerao fotâcnerâ fozejec. Jâmbomac.]

25 Anutu e Biŋebiaŋ muekopac â Jesu Kristore dâŋ muromackeekopac irec sâcko mamanasiŋko keteŋ-ŋopaocte tâpiri focnekac. Anutu juju sanaŋ dâŋticne hâcne soŋne fowarehuc jukume 26 dameŋ šiŋuczia ere micte muropiekicne â ŋicne ŋicne mana rereŋ eniŋte miti papiao bajaŋgeŋkekicne. 27 Eme Anutu hâcne, buc maŋɋârâŋ juekac, erao Jesu Kristore erâ mumuteŋzi mumuteŋ hati forašihuc juzejec sanaŋ. Jâmbomac.

Copyright information for `KMG