Romans 2

Juku biaŋne â sâqocne irec furine rozo

Irec ŋic go wemocko fuŋnege murârâŋnecmu? Ŋic gâcnezi bahac bâfuapie mana sâqore-jarehuc gahacne fuŋne bataniŋkeekic hâcne. Mana sâqore-jareekomec, go ijaha hâcne eekomec i¡ Eme Anutuzi ŋic iŋuc eeŋgopieŋ jaŋe okacne bazu-jareme sâcke-hâmoekac iŋuc manaŋgopeneŋ. Ŋic go gâcne jaŋere dâŋbahac muhuc ijaha eekic, ehuc “no Anutuzi akicnuocmu” iŋuc mu wiac moc ezic ine¡ Me Wofuŋzi buuruc â wama ruaine sâc fekicne egarehuc akicguhuc jume go wemocte manatâc qatakic ehuc juekic? Go maŋge bârisiecmurâ Anutuzi buuruc egareekac i mi mana taraekic me? Go maŋsanaŋ erâ maŋge mi bârisiehuc šocfiki bafeku seroŋ batec šoc šaza dameŋko Anuture mumutara dâŋ fârine fua taniŋkeme šâhâmocguocmu. Anutuzi ŋic eebapa-nâŋecte sâc furine nârezokac hâcne. Ŋic eehâmo gie paŋšâic bahuc eri tatamac â juju saric bâfuaniŋte samarieniŋmu jaŋe juju sanaŋ jarezokac. Ŋic râŋgeŋne dâŋ fâri qizecne bâsuehuc wiac hehesicne bajuniŋmu jaŋerao ine wiac šâšâicne â mimicne bâfuaocmu. Sâqocne bapa sasawa, Judaŋic hâcne â Grikŋic mâmâc, jaŋe šâic serereŋ â hâhâwic sâko fua-jareocmu. 10 Tiŋne Juniŋmu sasawa, Judaŋic hâcne â Grikŋic mâmâc, jaŋe eri tatamac â wama fua-jareocmu. 11 Anutu e ra rowec ware rowec mi focnekac.

Sâmutâc dâŋ i maŋnâŋecko qâreŋkekicne

12 Ŋic sâcmutâc dâŋ tâmiric juhuc sâqocne baeŋgopieŋ jaŋe sasawa sâcmutâc dâŋ tâmiric jaha sipirickeniŋmu. Á sâcmutâc dâŋhec juhuc sâqocne baeŋgopieŋ jaŋe sasawa Anutuzi sâcmutâc dâŋte sâcko dâŋjeŋic mutara-jareocmu. 13 Sâcmutâc dâŋ mâc hazeczi mananiŋmu jaŋe Anutuzi honec-jopame tiŋne mi eŋgopieŋ, manarâ reŋkeeŋgopieŋ jaŋe ine tiŋne mujareocmu. 14 Ŋic qâpuc sâcmutâc dâŋ mi mufua-jarekicne jaŋe maŋjeŋicte sâcmutâc dâŋ reŋkehuc ine sâcmutâc dâŋ tâmiriczi sâcmutâc dâŋhec tinac eeŋgopieŋ. 15 Iŋuc epie sâcmutâc dâŋ i maŋjeŋicko qâreŋkekicne, irec fuŋne jaŋgeŋkeekac. Sâcmutâc dâŋ maŋjeŋicko qâreŋkekicnere maŋjeŋiczi tutuc qajareekac, erâ wâc maŋ mamanasu-jeŋiczi foc forisic ehuc ŋifec mu qatarac eekac â ŋifec mu bâmiriŋ eekac. 16 I dameŋ sâkore iŋuc eekac. Ira Anutuzi Jesu Kristo ecneme maŋnâŋecko wiac soŋsoŋ fokac irec fuŋne bataniŋkeocmu. No Biŋebiaŋ muekopac irec sâcko bataniŋkeocmu hâcne.

Miti i sahaczi babajune mi ekac

17 Go šâŋege Judaŋic muhuc sâcmutâc dâŋzi roŋgâŋ egareme herâ foekic. Erâ no Anuture fuŋne manakopac muhuc sahac fefe juekic. 18 Go Anuture micdâŋ manaekic, erâ sâcmutâc dâŋ qazu-garekicnere keci ezo, keci mi ezo i mana wosâeekic. 19 Ehuc gahacnere šiŋuc muekic: “No tiŋtuŋ sâcne jowa qataŋ ejarepemu, â dapâcko juŋgopieŋ jaŋe sâcne batamae-jarepemu, 20 â ŋic maŋpuriŋhec jaŋe sâcne jaza bâtiŋ ejarepemu, â ɋiemaŋ jaŋe wiac sâcne qazu-jarepemu. No sâcmutâc dâŋhecte mamana â dâŋfâri irec wamboŋne rauckerâ jukopac i.” 21 Go iŋuc muekiczi ŋic gâcne miti qazu-jarehuc gahacne maŋ mi qazucneekic. Go ŋic fiuc mi ronšepieŋ jazahuc gahac fiuc roekic. 22 Ŋowe ŋonâŋ ŋohe bebehec mi ezepirec jazahuc gahac ŋonâŋge beheekic. Go nemuɋâŋ sureekiczi nemu ufuŋte wiac fiuc roekic. 23 Go sâcmutâc dâŋte manasuhuc maŋfefe eekiczi sâcmutâc dâŋ qâsuahuc Anutu gâc hecneekic. 24 Irec hâcne kecšiŋuc qâreŋkekicne: “Qâpuc jaŋe ŋoŋere kiŋte erâ Anuture šâŋe musoriŋkeeŋgopieŋ.”

Mârore ma ŋicmaŋko fome fârine muzo

25 Go sahacgao Anuture ma bakicne i sâcmutâc dâŋ reŋketec fârinehec eocmu. Me sâcmutâc dâŋ qataratec sahacgao ma izi fârimâc eocmu. 26 Erâ dâŋ irec ŋifecne qac qârisic fokac wâc. Ŋic moc ma tâmiriczi sâcmutâc dâŋ reŋkeocmuo mahec tinac eocmu. 27 Ehuc ma tâmiric fuarâ juekaczi sâcmutâc dâŋte gie baocmu eki ine fuŋnege rituocmu, miti papia â mahec juhuc sâcmutâc dâŋ qâsuaekic gore fuŋne hâcne rituocmu. 28 Moc e mâc sahaczi Judaŋic hawari eocmu â sahacko sawa mahec juocmu, iŋucnezi Judaŋic fârine mi eocmu. 29 Maŋzi Judaŋic izi fârine. Á sahacko sâcmutâc dâŋte ma rojuju i mâcne, maŋko Mârore ma rojuju izi fârine. Ŋic iŋucnere ŋiczi mâcne, Anutuzi maname biaŋkeocmu.

Copyright information for `KMG