Titus 2

Ŋic ŋokac kâcɋene jaŋere dâŋ

Go ine miti riucdâŋ fokac irec sâcko jaza mutâc ezemec. Ehuc mutec ŋic kâcɋene jaŋe sowa bâtâc â metâne â wama ruaine jupie mamanasiŋ â maŋjauŋ â maŋuruc furu fojarezejec. Erâ ŋokac kâcɋene iŋuc jaha jazatec miti ŋokac fârine erâ gupe micko âkec tâmiric â nârâmbe tâmiric juhuc juju biaŋte qaqazu enšepieŋ. Ehuc ŋokac socɋâri jaza mutâc epie ŋowe ɋiefâc-jeŋic jauŋ biaŋne ejarenšepieŋ. Erâ mimihec erâ sasec tâmiric juhuc nâ qofac â wiac bâpiaŋke emasaŋ ehuc ŋowefâc-jeŋic sâsec-jopanšepieŋ. I Anuture dâŋ susure fuazacte iŋuc enšepieŋ.

Ŋicmotec â kiŋaŋ qaqa jaŋere dâŋ

Ŋicmotec iŋuc jaha esoc-jopatec sowa bâtâc-jeŋichec junšepieŋ. Ehuc go gahac wiac biaŋne sasawa irec micne bajarehuc eehâmo gie batec honerâ bâjâpecgunšepieŋ. Miti mutiŋnehuc â bâmâckehuc jazazemec. Erâ hata sanaŋ fokac irec sâcko musaricketec kisâ jaŋere maŋ henšaŋneme jaŋe burec enâreniŋte dâŋ basarâ behenšepieŋ. Kiŋaŋ qaqa jazatec bomboŋfâc-jeŋic jaŋere dâŋ reŋke-fârehuc kiŋaŋ biaŋne qajarenšepieŋ, ehuc micjeŋicko mi ronšepieŋ. 10 Erâ fiuc serereŋ tâmiric juhuc wiac-jeŋic hone qâzuc ehâmonšepieŋ. Iŋuc ehuc bâbâpiaŋ-nâŋec Anutu dâŋticne ba eric ecneniŋmu.

Ʒure baɋaɋac enârekicnere juju jaŋgeŋnao juzo

11 Mâreŋ sâc ŋic biaŋkenaŋte Anuture aki anonoczi bâtâcne bâtimuŋ ewec. 12 Erâ izi bâfiriec-nâpohuc bâtiŋ-nâpohame qâpuc hata â wiac jawanere andac i qikiŋnerâ mâreŋ šira wama ruaine â tiŋne â mitine junšepeneŋ. 13 Iŋuc juhuc Anutu sâko â bâbâpiaŋ-nâŋec Kristo Jesu ere eri tatamac fua tâcneme juju aŋacko fisinaŋte irec mamanac junšepeneŋ. 14 Eki hâcne nâŋâcnere due bahuc sindaŋkonec bâhoc-nâpowec, erâ fuŋfuŋfâc-ticne juhuc mitire fârine šoɋac erâ bâfuanaŋte šure bâpiaŋ enârewec. 15 Go paŋšâic erâ dâŋ i hâcne jazahuc mu sawaŋ â mu bâtiŋ ejarezemec. Ŋic jaŋe go mi hucgunšepieŋ.

Copyright information for `KMG