1 Corinthians 5

Koriyn Bi Bap Nonim Andik Nup Dak

Yip aŋgñiy apay, “Bi nimb bap nonim andik anup di mindip apay.” Pen biynimb Gor nup gosimb ma niŋbay gok, tap siy tap timey kun ak rek ma gipay. Namam kun gek, yenen kun gipun aŋgiy nimbip nambiŋ ma gip? Krays ker mindpim rek, namam kun ak nup aŋgem, nimb yip ma mindonimuŋ. Yand paryomb akniy mindpiyn ak pen, nimbip gos niŋyiŋg mindpiyn. Bi tap siy tap timey gip kun ak nup, yerginiŋgambun ak niŋbiyn. Nimb biynimb Krays ker mindpim gok, ap nan-giniŋgambim ñin ak, Biyomb chin Krays nimbip gos ñakniŋ, gos yand niŋbiyn rek niŋiy, bi kun ak nup aŋgem nimb yip lotiw ma ginimuŋ. Seytan nup ñin ar ak aŋg ayem nup gi timey gek; gos niŋiy, kor yomb niŋep ñin ak, Biyomb ker mindonimuŋ.

Pen nimb bi tap siy tap timey gip ak yip jimñiy mindiy, mindrep gipun apim ak, tep ma gip. Biret giniŋg, tap yiys apay ak siskoy band gunap sesek ayey yomb yimb tan aranimb. Nimb biret yiys sek ma mindip rek mindpim gok, yiys timey ak maŋgiysek kirgiy, biynimb tep nep mindenimimb. Chin Jiwda kay Gor nup tap pik simboŋgyiŋgipun ñin ak, tap siy tap timey, tap yerip okok asik tep yimb giyiŋgipun. Kun ak rek, Krays chinup nen kumimb aŋgiy niŋbun biynimb gok kunep ginjun. Biynimb gunap nep tap siy tap timey gi yomey, kuŋaynep giniŋgiy rek ayip. Gos kun ak niŋiy, minim tep yipund giy ar ak nep aŋg amiy apiy giy, mindrep ginimimb. Nimbip minj tikiy aŋgnik, “Biynimb tap siy tap timey gipay gok yip jimñiy ma mindenimimb aŋgnik.” 10 Pen nimb aŋgniŋgambim, biynimb Krays nup gosimb niŋbay gok, gosimb ma niŋbay gok maŋgiysek kirgiyaŋ aŋgiy asap aŋgniŋgambim. Pen ak mer. Biynimb nup ma diy, biynimb gunap tap kuyip gok chin nimb tikaŋ aŋgiy, biyn siy bi siy giy, tap siy diy, tap yikop gok gor chin aŋgiy aŋgniŋbay biynimb gok, man ar biy sikoy ma mindpay. Miñmon okok maŋgiysek mindpay ak, kuyip kirginjun rek ma ayip. 11 Pen biynimb Krays nup diy mam ay chin apun gok tikjak, biynimb gunap tap kuyip gok yip nimb tikaŋ aŋgiy, biyn siy bi siy giy, tap siy diy, tap yikop gok gor chin aŋgiy aŋgniŋiy, biynimb aŋgjiwiy, ñiŋg kilis ñimbiy sakiy ay giniŋgambay gok; kiy yip ma taŋgiy, jimñiy tap ma ñiŋnimimb aŋgiy apiyn.

12 Biynimb Krays ker ma mindpay gok, yenen kun gipim aŋgiy, aŋg ginjun rek ma ayip; Gor nep mey, minim kun gok rek kuyip aŋgniŋgamb. Pen biynimb Krays ker mindpay gok, minim kun ak rek aŋgniŋgambun. Kun ak, bi nimb tap siy tap timey gip kun ak nup aŋgem, nimb yip lotiw giyiŋg ma mindonimuŋ.

Copyright information for `KMH