Ephesians 2

Krays Nep Gek Mey, Kim Amjun Rek Ayip

Tap siy tap timey giyiŋgipim rek Gor yip jimñiy mindep rek ma ayak ak pen; Krays gek nuk yip jimñiy mindpim. Nind ñin kun ak Seytan kichekiy tap gok ap bak ay mindey, Gor nup minim ak kirpay rek ak giyiŋgipim. Chin maŋgiysek kun ak rek nep giyiŋgipun. Gos chin key niŋyiŋgipun rek giyiŋg, gos gunap key niŋep rek ma ayek, biynimb yikop gok, yiwur yomb ak kond mindpay rek ak, chin giyiŋgipun.

Kun ak chin Gor yip mindep rek ma ayek, nuk bi biynimb simb niŋimb ak, chinup simb niŋiy, Ñinuk Krays nup yokek apiy, chinup aŋgiy kumiy, Gor yip di jimñiy ayek mey, perper mindenjun rek ayip. Krays kumak ak pen, Nop gek tikjakiy semb biyoŋ amnak. Pen Nop niŋek, chin Ñinuk yip jimñiy kumiy tikjakiy mindpun ak mey, chinup Ñinuk yip aŋgayip miñmon tep nuk biyoŋ.

Pen chinup simb niŋiy Ñinuk nup yokak kun ak, biynimb gok nup per, bi tep key yimb biynimb simb niŋimb ak niŋniŋgiy aŋgiy, gak. Nimb Krays nup gosimb niŋem nimbip dip ak, kilis chin key gon chinup dip aŋgiy ma aŋgnimimb. Gor nuk nep chinup simb niŋiy Ñinuk Krays nup yokek apiy, chinup di Nop yip jimñiy ayek, biynimb nuk mindpun. Pen chinup dek, biynimb gok kuyip direp giyiŋg mindrep giniŋgambun ak, ginimimb aŋgak rek nep giniŋgambun. Kun ak yimb chin key dand aranjun rek ma ayniŋgamb.

Krays Biynimb Jiwda Gok Yip, Jiwda Mer Gok Yip Di Jimñak

11 Nimb niŋbim: nind Gor nup gosimb ak ma niŋyiŋgipim. Biynimb yand Jiwda gok kumbak tikiy, nimbip aŋgjiwiy aŋgyiŋgipay, “Biynimb sakiy, kumbak ma tikpay gok aŋgyiŋgipay.” Pen kumbak tikpun gos niŋiy apay kun ak, Gor biynimb nuk ma mindpay. Nimb miñiy Krays nup chiŋgiy mey, Gor biynimb nuk yimb mindpim. 12 Pen nimb nind Gor biynimb nuk ma mindiy, minim nup niŋyiŋgipay kind ak ma mindiy, biynimb yand gok diniŋgayn aŋgak minim ak ma niŋiy, biynimb yikop gok gipay rek nep gi mindyiŋgipim. 13 Nimb par okok mindiy, nup ker mindenimimb rek ma ayak. Pen miñiy Krays likañ nuk yapek kumak rek niŋiy, nup chiŋgiy biynimb nuk mindpim. 14 Kun ak nuk kumak rek, chin Jiwda gok, Jiwda mer gok miluk niŋiy, penpen giyiŋgipun wariy ak timbwaliŋg yokiy, di jimñiy ayek mindpun. 15 Jiwda low minim kumbak tikep aŋgyiŋgipay gok maŋgiysek kirgiy mey, Jiwda kiñiŋ ak key, Jiwda mer kiñiŋ ak key ma mindpun. Jiysis kumak rek, chinup Gor yip di jimñiy ayek mey, chin biynimb nuk gok kiñiŋ nokom mindpun. 17 Nind keykey yimb mindyiŋgipun ak pen; Krays minim tep Gor yip jimñiy mindep ak dand apiy, nimbip biynimb paryomb okok rek mindyiŋgipim gok aŋgñiy, chin Jiwda maŋ okok mindyiŋgipun gok aŋgñiy gak. Kinjeŋ chinup ar nokom pindip kun ak, Bapiy yomb ker amjun rek ayip. Pen Kawnan nuk ak kuŋay ma mindip; nokom mindip ak diy mey, jimñiy mindpun.

Chin Krays Ker Mindpun Gok Gor Korip Nuk Rek Mindpun

19 Kun ak miñiy biynimb miñmon key okok nimb jiwapiy mindpay rek ak ma mindpim: biynimb ar okok tapay rek ma mindpim; Gor biynimb nuk nindnimb gok yip yiŋgoŋg giy, biynimb nuk yipund giy mindpun. 20 Kun ak chin Gor nup aŋgniŋep korip ak rek mindpun. Jiysis korip sap di mindep yomb namb biyaŋ mindip. Bi Gor minim aŋgep gok sek, bi Jiysis minim dand amemb gok sek korip sap siskoy titumbis okok piŋiypay rek ak mindpay; korip boŋg piŋiy kus kus gipay rek ak nimb mindpim. 22 Kun ak Gor Kawnan nuk ak, nimb Yipiyses biynimb Krays ker mindpim gok, di chin biynimb gunap nup ker mindpun gok yip di jimñiy ayek, korip miŋgan tep nuk ak mindniŋg gisap.

Copyright information for `KMH