Hebrews 10

Simboŋgep Nindnimb Ak Gach Ma Wiykniŋgamb

Jiwda low niŋiy, siypsiyp tap gok pik simboŋgyiŋgipay ak, yikop kisen giniŋgamb rek, kawnan paŋg niŋiy gipay rek giyiŋgipay. Giyiŋgipay kun gok, simiy ak simiy ak per giyiŋgipay ak pen; mindrep giniŋgiy rek ma ayak. Kisen giyak ñin ak, kuyip gek pisnep suŋ-tep mindembiyap ak; gos kuŋay niŋiy, tip ak giy tip ak giy ma gipyap. Pen tap siy tap timey gipun ak, siypsiyp tap gok pikon likañ yapek, Gor niŋiy ma kirginimuŋ rek ayip aŋgiy, simiy ak simiy ak simboŋgyiŋg nep mindyiŋgipay. Minek minek simboŋgyiŋgipay kun ak, gos yomb amnak tap siy tap timey giy, mindrep ma giyak ar ak.

Kun gek, Krays man ar biy winiŋg, Nop nup aŋgak,

“Tap pik likañ yapek simboŋgipay ak, nip tep ma gip. Pen tap kun gok daŋgiyey pisnep yin binj tikip ak, kunep nip tep ma gip rek, mumbwak yip bap gaynak.
Gayenak, yand nip aŋgnik, ‘Bapiy, Yip mumbwak gayey, wosrey buk tikiy aŋgyak rek opiyn ak; aŋgniŋgamban rek giniŋgayn aŋgnik’ aŋgak.”
Krays minim kun ak omiŋal aŋgak. Minim bap ak aŋgak, “Bapiy. Biynimb nip simboŋgniŋg, kanj siypsiyp tap gok pikey likañ yapek akaŋ, pisnep daŋgiyey simbok amek, nip tep ma gip aŋgak.” Low buk tikiy ginimimb aŋgyak rek, simboŋgniŋgambay ak pen; Nop nup tep ma giniŋgamb aŋgak. Pen minim bap aŋgak, “Bapiy. Nip kond mindpiyn. Yip yerip aŋgniŋgamban ak, aŋgniŋgamban rek giniŋgayn aŋgak.” Ñinuk minim kun ak aŋgek, Nop minim nindnimb siypsiyp tap gok pik simboŋgyiŋgipay ak kirgiy, minim tep kisen aŋgak ak gek wos amimb. 10 Kun ak Krays Nop minim ak niŋiy, tap siy tap timey gipun gach ak wiykyokniŋg, minek nokom yimb pisnep simboŋgak ak mey; chin biynimb nuk gok suŋ-tep mindpun.

Krays Kumak Ar Ak Nep, Gach Wiykyokniŋgamb

11 Bi Gor nup simboŋgep yikop gok, tap siy tap timey gipun ak, Gor niŋiy kirgaŋ aŋgiy, minek minek tap pik simboŋgipay ak pen; ar kun ak gey, Gor niŋiy pisnep kirginimuŋ rek ma ayip.

12 Pen Bi Gor nup simboŋgep aspun ak, Bapiy biynimb tap siy tap timey gipay ak niŋiy kirginimuŋ rek aynimuŋ aŋgiy, ñin nokom yimb kumiy, woŋg kun ak gi dipiyn aŋgiy, am Nop ñin yipund kind okok ken bisgak.

14 Yenen: nuk ñin nokom yimb kumak rek, biynimb nuk suŋ-tep mindeyaŋ aŋgiy dip gok, Gor dinimuŋ rek ayip. 15 Gor Kawnan ak kunep, chinup minim kun ak rek aŋgñimb. Nuk biynimb gos ñek, Baybol buk ak tikiy, minim kun ak rek aŋgiy aŋgyak:

16 “Biyomb aŋgip, ‘Kisen yand giniŋgayn ak: kiy yip minim aŋg ar nokom ay, jimñiy mindiy mey; low yand gok gosimb namb kuyip biyaŋ tikayen kisen giyiŋg, sakiy ma giniŋgambay’ aŋgip aŋgyak.” 17 Pen minim bap aŋgak, “Low yip timbrikiy, tap siy tap timey giyak ak niŋiy kirgiy, tip ak ma niŋniŋgayn aŋgak.”
18 Niŋiy pisnep kirginiŋgamb kun ak, nuk yip jimñiy mindiy mey; tap pik dand apiy simboŋgñiyiŋgipay rek, tip ak ma giniŋgambun.

Gor Nup Chiŋgrep Giy Maŋ Winjun

19 Kun ak mam ay sikop, gos kuŋay ma niŋjun. Jiysis chinup aŋgiy mumbwak nup timey gey kumek, laplap yomb korip ñiluk miŋgan suŋ-tep key yimb pil giyak ak puŋgrikiy, kinjeŋ pisnep yikak.

21 Pen kunep, nuk bi Gor nup simboŋgep yomb yimb chin ak mindiy, Gor nup simboŋgip rek, nup gosimb niŋiy, mindip maŋ siŋak winjun. Chinup gos yomb ma niŋyaŋ aŋgiy, Ñinuk nup yokek apiy kumek, likañ nuk yowak rek, chinup ñiŋg yomb rek pikek mey, biynimb nuk mindpun. 23 Kun ak Gor minim chinup aŋgayek niŋnuk ak, ma kirginjun, chinup diniŋgamb aŋgiy, gos sek kond mindenjun. 24 Pen biynimb gunap kuyip simb niŋiy don, kiy pen biynimb gunap kuyip simb niŋiy dey, penpen wasemb ay penpen diy mey, maŋgiysek mindrep giniŋgambun. 25 Biynimb gunap Gor minim niŋjun aŋgiy, ap nan-giyiŋgipay ak pen; kisen kirpay rek ma ginjun; maŋ mindip Jiysis winiŋgamb aŋgiy ap nan-giyiŋg, minim niŋbun ak penpen aŋgñiyiŋg, mindrep ginimimb.

Jiysis Nup Kirginiŋgambun Ak, Pisnep Apyap Pikniŋgambun

26 Yenen: Krays minim yipul yimb ak aŋgey niŋ-tep giy, pen andkind tap siy tap timey ar ak amiy, tap Gor nup pik simboŋgon, chinup dinimuŋ rek bap ma mindeniŋgamb. 27 Ar kun ak, kinjeŋ chin bap ma mindeniŋgamb; niŋind nup pirikniŋgambun. Kor ak sek, mon maŋlaŋ biynimb nup miluk niŋeniŋgambay kuyip sinj timey yinimb ak sek kond mindoniŋgambun. 28 Biynimb Mosis low tikak gok niŋiy, tap yikop rek ayek timbrikyak gok; biynimb omiŋal akaŋ, omiŋal nokom windin niŋey, kor giyiŋgipay ñin ak, kuyip simb niŋnimuŋ rek ma ayek, biyomb gok minim kun ak niŋrep giy, aŋgey pisnep pik ayiŋgipay. 29 Kun ak chin Gor Ñinuk ak nup alemb alemb ñiniŋgambun ak, yergiy kim amniŋgambun. Nup alemb ñiniŋgambun kun ak, likañ tep chinup Gor yip di jimñiy aynim aŋgiy gek yowak ak, tap yikop rek ayek, kun giniŋgambun. Pen Gor Kawnan chinup simb niŋimb ak, nup kunep timey giniŋgambun. 30 Gor nuk key aŋgak, “Biynimb timey gipay gok, yand nokom, kuyip pen timey giniŋgayn aŋgak.” Pen minim bap aŋgak, “Biyomb ak nuk key, biynimb nuk gok kuyip kor niŋiy, minim aŋgniŋgamb aŋgak.” 31 Pen Gor biyomb yimb perper mindip ak, biynimb gok kor geniŋgamb; niŋind jel giniŋgamb.

Gor Aŋgip Rek Gon Amnimuŋ

32 Pen nind giyiŋgipim ak sakiy ma ginimimb. Gor melik tep niŋiy denbik, biynimb nimb gok nimbip miker yomb ñiyak ak pen; nup ma kirpik. 33 Ñin gunap nimbip minim timey aŋgiy, timey giyiŋgipay ak pen; gos kun ak ma niŋiy, biynimb wikan gunap kuyip timey giyakniŋ, kun okok ken amyiŋgipim. 34 Biynimb Gor nup gosimb ak niŋey, kalambis ayak gok, simb niŋyiŋgipim. Ap tap nimbip maŋgiysek dand okok nimb okok nimb gey, “Ak tap yikop; gos chin ak amimb Gor tip chinup gayek, perper mindeniŋgambun biyoŋ aŋgiy,” gos yomb kun ak ma niŋbik. 35 Kun ak sisiŋ ma aynimimb; Gor nup nokom gosimb ak niŋmindiy mey, perper mindeniŋgambim. 36 Nup ma kirgiy; aŋgip rek gon amek mey, aŋgak rek chinup giniŋgamb. 37 Baybol buk ak tikiy aŋgyak:

“Bi winiŋgamb ak per ma mindeniŋgamb; maŋ mindip winiŋgamb.
38 Biynimb suŋ-tep yand gok, yip gosimb niŋmindeniŋgambay ak pen; gunap yip kirgey, tep ma giniŋgamb aŋgyak.”
39 Pen chin biynimb Gor nup kirgiy, apyap pikpay gunap ma mindpun; biynimb nup gosimb niŋiy, perper mindeniŋgambay gok mindpun.

Copyright information for `KMH