Mark 16

Jiysis Kumiy Tikjakak

(Mat 28:1-8; Luk 24:1-12; Jon 20:1-10)

Jiwda lotiw ñin kiyk ak apiy pandikek, Mariya Makdala ak, Mariya Jemis nonim ak, biyn Salomiy ak Jiysis mumbwak nup ak wel ayñinjun aŋgiy, am wel kuyrep wak ak taw dap ayey kinak.

Minek Sandey ñin ak maynamb yimb tikjakiy, Jiysis nup komyak bindoŋ amniŋg saŋdiyak. Namb okok amyiŋg aŋgyak, “An chinup kamb yomb kawrumb pilgiyak ak, tuŋgmilok dam gol okok ayniŋgamb aŋgyak.” Kun aŋgiy amjakiy niŋyak: kamb yomb kawrumb pil giyak kun ak, gol okok mindek. Niŋiy, miŋgan bineŋ sikind amiy niŋyak: bi paranj chech tund paryomb yimak bap, ñin yipund kind okok ken bisiŋg mindek. Nup niŋiy pirikyak ak pen; kuyip aŋgak, “Ma piriknimimb. Yand niŋbiyn; Jiysis bi Nasaret nimb, mon kiros bak biyoŋ ñaŋgbirik ayak anup niŋniŋg aswim. Pen niŋim! Tip ar nup komyak biy; nuk ma mindip. Mindarik tikjakiy amimb. Pen ma kumak ñin ak aŋgak rek, nuk nind tikjakiy Galiyliy am mindeniŋgamb; nimb kisen amiy nup niŋniŋgambim. Piyta sek, Jiysis binuk gunap sek kuyip minim kun ak aŋgñinimimb aŋgak.”

Kun aŋgek, mis amiy, jel pirikyak rek biynimb gunap kuyip minim kun ak ma aŋgñiyak; puŋgrikind aŋgiy korip amniyak.

Mariya Makdala Nimb Ak Jiysis Nup Niŋak

(Mat 28:9-10; Jon 20:11-18)

Jiysis kumiy, Sandey ñin ak tikjakiy, nind yimb Mariya Makdala mindek siŋak miseŋ gek niŋak. Pen biyn kun anup, nind kichekiy onep ar ak abaŋ ayek, Jiysis aŋg mis yokak. 10 Nuk Jiysis nup niŋiy, am binuk gok siy aŋg mindeyak namb ak, Jiysis kim mindip nup niŋbiyn aŋgek, 11 kiyk pisnep kumimb aŋgiy minim nup ak ma diyak.

Jiysis Binuk Omiŋal Kinjeŋnamb Okok Amyiŋg Nup Niŋrik

(Luk 24:13-15)

12 Minek bap pen tip ak, Jiysis binuk omiŋal miñmon wikan bap giraŋgiy, Jiysis bi ak key rek ay apiy, kinjeŋnamb ak miseŋ gek nup niŋiy, 13 am binuk gunap kuyip aŋgñer, kunep niŋind aspiyr aŋgiy ma niŋyak.

Minim Tep Yip Ak Biynimb Okok Kuyip Aŋgñinimimb Aŋgak

(Mat 28:16-20; Luk 24:36-49; Jon 20:19-23; Apasol 1:6-8)

14 Pen minek bap tip ak, Jiysis binuk onep aŋgip ak tap ñimbeyak namb siŋak miseŋ giy, kuyip aŋg giyiŋg aŋgak, “Tikjaken biynimb gunap miseŋ niŋiy aŋgey, yenen Gor Ñinuk ak niŋind tikjakip aŋgiy gos ak ma niŋbim?”

15 Kun aŋgiy kuyip aŋgak, “Minim tep yip ak dand miñmon okok maŋgiysek amiy, biynimb okok maŋgiysek aŋgñinimimb. 16 Aŋgñem, biynimb an yip gosimb niŋiy, ñiŋg pikniŋgambay gok, kim amniŋgambay. Pen biynimb an yesek apay aŋgniŋgambay ak, kor yomb niŋiy, miñmon timey ak amniŋgambay.

17 “Biynimb yip gosimb niŋniŋgambay gok, yip aŋgniŋiy tap mageprek gunap giniŋgambay, ñin gunap minim yimb kiyk ak mindakniŋ, minim kisenimb ar bap key yimb aŋgniŋgambay; siyŋ saraw tap biynimb siwip gok diniŋiy akaŋ, tap ñimbiy kumbay gunap ñimbiy, ma kumniŋgambay. Pen biynimb tap giniŋgamb gok, kuyip ñin maŋgiy diniŋey suŋ ay; kichekiy tap yerip gunap biynimb ambaŋ ayniŋgamb gok, aŋg mis yokniŋgambay. Kiy yip minden tap mageprek kun gok giyakniŋ, biynimb gok minim chinup aŋgñispay ak niŋind aspay aŋgiy, niŋniŋgambay aŋgak.”

Gor Jiysis Nup Dand Miñmon Nuk Amnak

(Luk 24:50-53; Apasol 1:9-11)

19 Jiysis minim kun ak aŋgjiwakniŋ, Nop nup dand arachak semb biyoŋ amnak. Dand amek, ñin yipund kind okok ken mindip.

20 Pen binuk gok minim tep ak miñmon okok kind kind aŋgñey amnakniŋ, Biyomb ak minim kun ak niŋind aynimuŋ aŋgiy, kuyip kond mindakniŋ, tap mageprek gok giyiŋgipay.

Copyright information for `KMH