Romans 15

Biynimb Gunap Mindrep Giniŋgiy Rek Ar Ak Nep Ginimimb

Chin Krays nup chiŋgrep giy mindpun gok, key tep giniŋgamb ar ak gun aŋgiy ma ginjun; biynimb nup chiŋgrep ma gipay gok chiŋg tep giniŋgiy aŋgiy, gos ak niŋiy ginjun. Chinup key tep giniŋgamb ak minim yomb mer; pen biynimb gunap, nup chiŋg tep giniŋgambay akaŋ, ma chiŋg tep giniŋgambay ak, minim yomb. Krays kunep key tep gak ar ak ma gak. Baybol buk ak, Nop nup minim aŋgak gunap tikiy aŋgyak, “Woŋg nip gi minden, minim nip aŋgjiwpay ak, yip kunep apay aŋgyak.” Baybol buk minim tikyak gok maŋgiysek, yikop ma tikyak; gos sek mindiy, Gor nup nep chiŋgiy mindeyaŋ aŋgiy tikyak. Kun ak Krays gak rek niŋiy gun aŋgiy, Gor nup chiŋg tep gem, nimbip kond mindakniŋ, gos sek mindiy, biynimb Krays ker mindpay gunap yip, gos ar nokom niŋiy, jimñiy mindiy mey; Biyomb chin Jiysis Nop nup yimb ak dand araniŋgambim.

Gor Yisrel Mer Gok Kuyip Kunep Simb Niŋimb

Gos niŋrep ma gipik ñin ak, Krays nimbip dek biynimb nuk mindpim ak; nimb key penpen diy mindem, biynimb gunap niŋiy, Gor nup yimb ak dand araniŋgambay. Pen Gor Krays nup, Jiwda kay kuyip aŋgiy yokak ak, kuyip nep diyn aŋgiy ma yokak. Jiwda kay nusind yes kuyip gok minim aŋgayak rek nup yokak ak pen; Jiwda biynimb mer gok kunep simb niŋiy den, yimb yip ak dand araniŋgambay aŋgiy yokek awak. Krays nind Nop nup minim aŋgak rek tikiy aŋgyak:

“‘Kun ak, yand Jiwda biynimb mer namb okok mindiy, kamep aŋgiy, yimb nip ak dand araniŋgayn aŋgip’ aŋgyak.”
10 Minim bap tikiy aŋgyak:

“Nimb Jiwda mer gok, Jiwda biynimb gok yip jimñiy, Gor nup miñmiñ yimb ginimimb aŋgyak.”
11 Pen minim bap aŋgyak:

“Nimb miñmon keykey maŋgiysek kamep aŋgyiŋg, yimb nup yiy ar biyoŋ dand aranimimb aŋgyak.”
12 Pen bi minim nup aŋgep Asaya kunep aŋgak:

“Bi Jesiy tikek tik dand amiy tikniŋgambay bap biyomb mindiy, Jiwda biynimb mer miñmon keykey mindpay gok; nuk chinup kond mindeniŋgamb aŋgiy, gos sek mindeniŋgambay aŋgak.”
13 Kun ak Gor nup gosimb niŋmindem, Kawnan nuk ak nimbip kond mindakniŋ, gos sek mindem, tep kun ak key yimb ginimuŋ.

Pol Gor Nup Woŋg Kilis Giy Gipiyn Aŋgak

14 Pen mam ay sikop. Yand nimbip niŋbiyn: Jiysis nup diy, mind tep giy, gosimb tep niŋiy gipim ak mey; minim tep nup ak penpen aŋgñirep ginimimb rek ayip. 15 Pen minim nimbip kilis giy rek aspiyn ak, minim niŋbun ak, yenen chinup tip asap aŋgiy ma aŋgnimimb. Gor yip simb niŋiy diy, biynimb Jiwda mer gok kuyip minim aŋgñinimin aŋgek, nimbip aŋgñirep gispiyn. 16 Kun ak yand Jiysis Krays nup direp giyiŋg, Gor minim tep ak dand amiy, Jiwda biynimb mer okok kuyip aŋgñen, Kawnan nuk ak gek, gos kiyk ak nup ker amek, biynimb suŋrep nuk gok mindeniŋgiy.

17 Krays Jiysis nup chiŋgiy, Nop nup woŋg gipiyn ak, yip key tep gakniŋ gipiyn. 18 Biynimb gunap giyak ar ak ma aŋgniŋgayn; yand key gipiyn ar anep aŋgniŋgayn. Krays nup chiŋgiy minim tep nup ak dand taŋgyiŋg, Kawnan nuk tap mageprek gunap gakniŋ, Jiwda biynimb mer gok niŋiy, Gor nup gosimb niŋbay. Miñmon Jerusalem tikjakiy, minim tep nup ak aŋgñirep gi dam dam miñmon paryomb Yiliriykam amiy, andkind winik. 20 Gos yand per niŋbiyn ak, biynimb Krays minim ma niŋyak miñmon okok nep amiy aŋgñiyn aŋgiy niŋbiyn. Bi minim nup aŋgñemb gunap sap piŋiypay ar ak, korip giyn aŋgiy ma niŋbiyn. 21 Baybol buk ak tikiy aŋgyak:

“Biynimb nind ma niŋyak gok, kisen niŋrep yimb giniŋgambay; biynimb minim nup ma niŋyak gok, kisen niŋniŋgambay aŋgyak.”

Pol Miñmon Rom Amniyn Aŋgak

22 Kun ak simiy kuŋaynep, miñmon akniy aŋgñi taŋg taŋg, miñmon nimb Rom amnim aŋgrik ak pen; ninim rek ma ayip. Pen miñiy miñmon tiŋgoŋ akniy, woŋg ginim ak ma mindip. 24 Yep maŋ mindip, miñmon Speyn amniŋg gispiyn. Gos yand niŋbiyn ak, am nimb yip sikoy won bap tep gakniŋ mindiy, yip kisen dam Speyn kinjeŋram ak yoknimimb aŋgiy niŋbiyn. 25 Pen Masedoniya biynimb diy, Akaya biynimb diy, Jerusalem biynimb Gor ker mindiy tap kiyk ma mindip gok kuyip opriyŋ dayak ak, miñiy ñiniŋg dand amjipiyn. 27 Gos kiyk key niŋiy gipay kun ak tep gispay. Jiwda biynimb, Krays minim tep ak dam, biynimb Jiwda mer gok kuyip aŋgñimbay rek, niŋind Gor tap kuyip ñimb gok, gunap pen ñispay.

28 Pen maniy yip ñimbay kun ak, maŋgiysek dam Jerusalem ñiy, Speyn kinjeŋram ak amiy, nimb mindpim ak niniŋgayn. 29 Ñin kun ak ap nimbip niŋen, Krays yip mindeniŋgambun rek, miñmiñ yimb giniŋgambun.

30 Mam ay yand gok. Biyomb Jiysis Krays ker mindpim ak, Gor Kawnan yip mindpim rek, yip wasemb ay, Gor nup aŋgniŋyiŋg mindem, yand Jiwdiya propens amiy Jerusalem amjaken, Jiwda biynimb Krays nup gosimb ma niŋbay gok, yip timey ma giniŋgiy. Pen Gor nup aŋgniŋ mindem Jerusalem amjakiy, biynimb suŋ-tep nuk gok maniy ñiniŋg gispiyn ak ñen, tep gakniŋ dey, kiy yip jimñiy mindonjun. 32 Kun ak Gor gos nuk key niŋiy, yip amnoŋ aŋgek, am nimb yip tep gakniŋ mindiy amniŋgayn.

33 Gor nimbip maŋgiysek kond mindakniŋ, jimñiy mindiy mindrep ginimimb.

Copyright information for `KMH