1 Corinthians 11

Nagaya PoloꞋnae KalaisiꞋma humainea kava huꞋna akave nehugi nagaila nenagetama nagayama nehua kavakeꞋya nakave hutama maiho.

Mono nopima aꞋnemoꞋya amanute aiso hisaya yafe humaine.

Kahegi maleꞋna tamahapaugetama tamakela okanitama kanale kava hutama akave nemalayafe “Kanale kava nehae.” huꞋna musena hu nelamatoe. Ma ma hisua kea havilama hiho. Anumaya KotiꞋa Yisasina ala kanoꞋa maiteno agenopa maigeno Yisasife haviꞋya amakupi malenaya veaꞋmogamina ala kanoꞋamia YisasiꞋa maiteno amakenopaꞋamia maigeꞋya aniꞋa huꞋya vemoꞋya aꞋneꞋamimogamina ala kanoꞋamia maiteꞋya amakenopaꞋamia mainae. NagoꞋa vayaꞋmoꞋya Anumaya Koti kema huhaleꞋya nehuꞋyao nunamuma nehuꞋyao amanutela aiso ohisae*. Aiso hisayana Yisasina, amakenopamona agaye hisifa kava huneꞋatae. HuneꞋatagi nagoꞋa aꞋnemoꞋya Anumaya Koti kema huhaleꞋya nehuꞋyao nunamuma nehuꞋyao hinuꞋya amanutela nago yatetila aiso ohisayana* amakenopamoꞋa, anauꞋamimona agaye hisifa kava huꞋya amayolagefa mukiꞋa laga hu-talenaya aꞋnemoꞋya* nehaya augafa kava nehae. NagoꞋa aꞋnemoꞋya amanuteꞋma aiso ohisayana afaꞋa amayolagefa mukiꞋa laga hu-talesae*. Tagama huꞋya aupa hisaya yamoꞋa amakaye hisifa kavaꞋma hanesigeꞋya neꞋataleꞋya amanutela aiso hisae. VemoꞋya Anumaya Kotina amemaꞋa “Anumayamo agi alisaga hisae.” huno vemogamina talo hu-maleneafe amanutela aiso ohisagi aꞋnemoꞋya anauꞋamimogami amaki alisaga hisayafe amanutela aiso hisae. Anumaya KotiꞋa aꞋnemogami amaugafaleti veneꞋnea talo ohunegi vemogami amaugafaleti aꞋnea talo humalene. Anumaya KotiꞋa aꞋnehe “HaꞋmao.” huno veneꞋnea talo ohunegi vehe “HaꞋmaesia yane.” huno aꞋnea talo hu-maleneane. 10 Talo hu-malenea yafeꞋene ensole vayaꞋmoꞋya neꞋagaya yafeꞋene aꞋnemoꞋya “Anautimo amaiyaꞋafi nemaune.” huꞋya amanutela aiso hulisae huꞋna nehue. 11 Nehuanagi AnumayamoꞋene ailokaetama maisayana aꞋmoꞋa haotela agaiꞋagela omaisie. VemoꞋa aniꞋa huno haotela omaisie. Agaila aya nehisiana agaila aya nehisiana hutana maisaꞋe. 12 Hagoteno vefiti aꞋnea ali falote higeꞋya mainayanagi menia aꞋnemoꞋya veneꞋnea neꞋamatayanagi Anumaya Kotipiti mukiꞋa yamoꞋa falote hu-maineafe aepaꞋa maine.

13 Tamakaya tamakaitami haya kavala fako hutama ageho. AꞋnemoꞋya amanutela aiso ohuneꞋya nunamuma hisayana kanale nehio? 14 Tamakaitami haya yamoꞋa tamaveli-maine vemoꞋya amayolagefa kuꞋma hanesiana amakaye hisaya yana hane. 15 Haneanagi “AꞋnemogami amayolagefa kula muse hisaya konagali yaꞋami hane.” hutama nehae. Anumaya KotiꞋa amanute aiso hisaya yafe amayolagefa kula amamine. 16 NagoꞋa veaꞋmoꞋya ani yafema kema vaisayana ani kenonaꞋamihe mani kea nehue nagaiꞋene mukiꞋa Yisasife havita tagupi malenona veaꞋnene alu auꞋava kavala nohunagi nagoke kavakeꞋya nehune huꞋna nehue.

Kolini veaꞋmoꞋya Anumayamo kaveꞋma negahena fatago auꞋava kavala nohae.

17 Menima tamahapaisua kea haviho tamakaya havi kava nehageꞋna haviꞋna musena hu notamatoe. Yisasi agima alisaga hugahe melitalu hutama maifina kanale kavala nohagi havi kava nehageꞋna nagaiꞋnia onahaiye huꞋna nehue. 18 NagoꞋa veaꞋmoꞋya nahapaiyana tamakaya Yisasife havitama melitalu hutama maifina ke neꞋvaitama tolefi ali fako nehae huꞋya hayana tamage huꞋya nehao? E, tamage nehae huꞋna nagesa nehavue. 19 TamakaiꞋene mainaya veapina nagoꞋa veala fatago huꞋya Anumaya Kotina haiya kavala nehae. Ani veala agetama falote hisaya yafe tolefi ali fako nehae huꞋna nehue. 20 Anumayamo kaveꞋma negahe melitalu hayanagi tolefima ali fako haya yatamia haneafe Anumayamo kave lama nonae. 21 Ani kaveꞋma negahema melitalu hayana nagoꞋa veafena amakava nohagi tamahaote tamakaitami alitama aya kavela nenageꞋya nagoꞋa veala amakala nelegeꞋya nagoꞋa veaꞋmoꞋya nofi alagamo tina ne haꞋno huteꞋya anegi vaya kana huꞋya nemaiye. NaꞋa havi kava nehutama Anumayamo kaveꞋmona aepaꞋa havilama ohutama afaꞋa nenae. 22 NaꞋa higetama naꞋa kavala nehae? KaveꞋma lima nesaya notamia omaleo? Netetama eho. Anumaya Kotife haviꞋya amakupi malenaya veafena “Afa vea kana nehae.” hutama nehutama kaveꞋamima omalea veafena “Afa vea kana nehae.” hutama amakaye hisifa kavala nehao? Ani kavaꞋma hayana “Kanale kava nehae.” huꞋna hisuo? AꞋao “TusiꞋa havi kava nehae.” huꞋna nehue.

YisasiꞋa kai hame mayaene nofi alagamo timaꞋaene anagaꞋamogamina amamine.

23 Anumayamotegati ali-mainoa kegiꞋna ago tamahapai-mainoa kemoꞋa maꞋa humaine YutasiꞋa Yisasina agesi huno avaleno kame vaya amayapi atenea kegela AlatimoꞋa YisasiꞋa kai hame kana maya alino Anumayamotega muse huno nunamu huteno aposino neꞋamamino mage huno hie “Mamona nagaiꞋni naugafae. Tamakai tamaya hisiafene huꞋna naugafa hakiꞋna nelamamugi nagaifena tamakesa havi havi nehutama nete nete hume hume haiho.” huno hamapaiye. 25 HigeꞋya ani kavela netageno aniꞋa huno nofi alagamo keꞋayola alino mage hie “Nagai kolama laki lavisia kanafina Anumaya KotiꞋa haegafa alino hagelafi lamatesia kea ali fatago hisia yana havisaya yafe mukiꞋa kanafina mani keꞋayopiti nofi alagamo tina nenetama nagaifena tamakesa havi havi hutama maiho. 26 Ani mayaene nofi alagamo tiꞋene nenetamahena AnumayatimoꞋa tagaife huno fali-mainea aepaꞋa huhaletama hugahae. AniꞋa hume neꞋvisageno AnumayatimoꞋa eteno esie.”

Tagaitia taguꞋamona fako huta ageteta Anumayamo kavela nesune.

27 NagoꞋa veaꞋmoꞋya kai hame kana mayaene nofi alagamo tifeꞋenena amakuꞋa fakoa ohuꞋya afaꞋa nesayana Anumayamo augafaene kolamaꞋaene alihaviya nehae. Anumayamo aufina kefo auꞋava kava nehae. 28 Ani yafe mukiꞋa veaꞋmogatama Anumayamo mayaene nofi alagamo tiꞋene nenutamahena hagotetama tamahaote tamahaote tamakuꞋa fako hutama agetetama “Kefo yana humaino?” hutama tamakesa havitetama tamakuꞋamoꞋma kanale hu-mainesigetamahena neho. 29 NagoꞋa veaꞋmoꞋya kai hame mayaene nofi alagamo tiꞋene neneꞋya YisasiꞋma tagaife huno augafa hakino fali-mainea aepaꞋahema ohaviꞋya afaꞋa nenesaya veaꞋmogamina Anumaya KotiꞋa kaiyekea humateno anonaꞋamia amamigahie. 30 NaꞋa kavaꞋma humainea yafenagiꞋya tamakaipitila nagoꞋa veala amaugafamoꞋa fulu fulu higeꞋya kalia aligeꞋya nagoꞋa veala ago fali-mainae. 31 Tagaya hagoteta taguꞋa havita ali fako huteta noteꞋasina Anumaya KotiꞋa kaiyekea hulateno anonaꞋa otamileꞋasine. 32 AnumayamoꞋa haenaga agai kema nohaviya veaꞋma kaiyekea humateno anonaꞋa amamisia kavala tagaila otamisiafe menia tagaya kefo yama nehunagenoꞋa fako hulateno mai fatago huta maisunafe kaꞋyona nelamie.

33 NafuꞋnagana-gatama naꞋa humaineafe Anumayamo kaveꞋma negahena melitalu hutetama kanaleꞋya hutama nagoꞋa veafena amakava mainegeꞋya mukiꞋamoꞋya esagetama nagopi tamakoꞋya aye-mainetama ani kavela neho. 34 Havigu kefo yama nehutama Anumayamo kaveꞋma nesayana Anumaya KotiꞋa kaiyeke hulamateno fako hulamateyafenagi nagoꞋa veaꞋmogamima tusiꞋa amakatesigeꞋyahena noꞋamifinagati neteꞋya esae. NagoꞋa kea haneanagiꞋna tamakaitegama esua kanafina tamahapaigahue.

Copyright information for `KMU