1 Corinthians 13

Nagaya nohavua kefiti huꞋna mopale veaꞋmogami amakene Ensole vaya amakene aisuanagi veaꞋmogamife nahau nayamopafi onahaisigeꞋna yaveꞋyaene veloꞋene afaꞋa aiko nelugeno kema ayeso nehia avamete huꞋna afa kegefa nehue. AnumayamoꞋa avayafiti nahapaiya kea huhaleꞋna nehuꞋna Anumaya KotiꞋa falaki-malenea kemona aepaꞋa mukiꞋa havilama humainoanagi veafe nahau nayamopafi onahaisiana afa ya kana huꞋna mainoe. Anumayamofena haviꞋna nametitia huteꞋna “AgoꞋyamoga alule vuo.” hisugeno ani agoꞋyamoꞋa nagai ke havino visianagi veafena nahau nayamopafi onahaisiana afa ya kana huꞋna mainoe. Veafema nahau nayamopafi onahaisigeꞋna mone afenoꞋami omalenesia veaꞋne mukiꞋa yaniꞋa amamisuana ani yamoꞋa naya ohugahie. Veafema nahau nayamopafi onahaisgeꞋna Anumayamo kema huhaleꞋna nehisugeꞋya hamai vainateꞋya navaleꞋya atafi natalesageno naugafa leno asagalisia yamoꞋa naya ohugahie. Veafe hamau amayamopafi nehamaiya veaꞋmoꞋya haviyama humatesageꞋya mailava huꞋya maineꞋya anonaꞋamia huoꞋamateꞋya kayoneꞋage veaꞋne mainae. Alu kanomo yate age hamaꞋye huꞋya amaipamoꞋa haviyana ohigeꞋya amaugafa aliꞋya ohai veaꞋne mainae. AmakaiꞋami amakia alisaga huꞋya veganokanola nohae. AmakaiꞋami yafekela amakesa havi havi nohae. AupaꞋa hamaiya noꞋvaiye. Havi kavaꞋma humataya veafena amakesa ohaviꞋya afaꞋa neꞋatalae. Veafe hamau amayamopafi nehamaiya veaꞋmoꞋya nago kanomoꞋa kefo yama hisia yafena muse ohugahagi tamage kelefe musena hugahae. Veafe hamau amayamopafi nehamaiya veaꞋmoꞋya haviya humatesaya veaꞋmogamina oꞋamatalegahagi Anumayamo amaya hisiafe amametiti nehuꞋya agava maineꞋya mai lokiya vaiꞋya nemaiye.

Ma ma hamau amayamopafima nehamaiya yana hanege hanege huno hanegahianagi Anumayamo amakupi humainea kema huhaleꞋya hamapaiya kemoꞋa haꞋno hugahie. AmakesamoꞋa nohaviya kema nehaya yamoꞋa haꞋno hugahie. Falaki-mainea kemo aepaꞋama havilama nehaya yamoꞋa fanane hugahianagi hamau amayamopafi nehamaiya yana agola haꞋno ohugahie. HaꞋno ohugahigi havimainona yamoꞋa nago kaiyagaꞋa havilama ohunone. AnumayamoꞋa lagupi humainea kea huhaleta nehunanagi nago kaiyagaꞋa havilama ohunone. 10 Havilama ohunonagi fatago kavakeꞋya nehisia kanomoꞋa, YisasiꞋa, mukiꞋa yafena havilama hulineanagino esigeta havilama ohuneta nehuna yamoꞋa fanane hugahie.

11 Nagaya osi nafaꞋnema mainoa kanafina nafaꞋnemoꞋma nehia kea nehuꞋna nagesa havi havi humainoanagi ko huteꞋna ala kanoma mauvana nafaꞋnemoꞋya nehaya kavala ago atalenoe. 12 Meni kanafina tagaya hanikoꞋmako yapi maineta Anumaya Koti augosa galasifima tamema agona avamete kava nehuta agelama huta noꞋagonanagi haenagaꞋa Anumayamo augosa neꞋageta agelama hugahune. Meni kanafina Anumayamo kea havilama nohunanagi AnumayamoꞋa nagaila nagelama humainea kava huꞋna haenagaꞋa nagaya agaila agelama hugahue.

13 Anumayamofe havita lagupi maleta tametitima humainona yaꞋene “AnumayamoꞋa hulamategahue huno humainea yana hugahie.” huta lametiti nehuna yaꞋene veafe tahau tayamopafi nelahaiya kavaꞋene ani tagufa (3) yamoꞋa hanege hanege huno hanegahianagi tahau tayamopafi nelahaiya yamoꞋa uhagoteno mani tole yamona agaseno tama yatafa hane.

Copyright information for `KMU