1 Corinthians 3

Mono aliꞋya vayala Anumaya Koti aliꞋya vaya mainae.

NafuꞋnagana-gatama tamakaiꞋene maineꞋna, AvamuꞋmoꞋma amakupi mainea veaꞋmoꞋya havisaya avamete kea ohunogi tamakaya atafa lamaipale, osi nafaꞋne kana hutama mainageꞋna Kalaisi humainea auꞋava yafema nohavinaya veaꞋmogami avamete kea tamahapai-mainoe. Tamakaya tokiyaꞋage kema hisua kea ohavigahayanagiꞋna nu tamamisua avamete ke tamahapai-mainoe. Meni kanafiꞋenena aniꞋa huꞋna nu tamamisua avamete ke tamahanepauve. NaꞋafene atafa lamaipamo akave maletama mainetama tamafu-tamakana-gamifena tamaipa haviya humatetama kema vaimatayana atafa lamaipa hanegetama ma mopafi veaꞋmoꞋya nehaya kavakeꞋya nehae. NagoꞋamogatama “Polo tahapaiya kele akave nehune.” hutama hagetama nagoꞋamogatama “Tagaila Apolosi tahapaiya kele akave nehune.” hutama nehae. Ani kavaꞋma nehayana ma mopafi veaꞋmoꞋya nehaya avamete kava nehae.

ApolosiꞋa hanaꞋa augafa kanoe? Nagaya PoloꞋna hanaꞋa augafa kanoe? TaꞋagaya aliꞋya kanolatake mainoꞋe. Anumaya KotiꞋa alu aliꞋya lu aliꞋya taꞋamigetaꞋa neꞋaluꞋe. Ani aliꞋyateti tamakaya Yisasifena havitama tamakupina maletama lamametitia humainae. Nagaya Yisasi kea tamakupina fai-maletogeno ApolosiꞋa timaꞋa hefino taki-maleneanagi Anumaya KotiꞋa agaiꞋage alino aifalo higeno hagemaine. NaꞋa humainegi avina yama fai-malenea kanomo agiene tima taki falu hu-malenea kanomo agienena omalegi avina yama alino aifalo higeno hage-mainea kanoa, Anumaya Koti agigeꞋya alisaga hisune. Anumaya Koti kema faimalenea kanoene tima takino falu humalenea kanoene nago aliꞋya alimainaꞋe. Ani aliꞋyatetila tolemogania ali-mainaꞋa avamete anonaꞋania aligaꞋe. TaꞋagaya Anumaya KotiꞋene ailokaetaꞋa aliꞋya kanolatamaꞋa mainoꞋe. Tamakaya Anumaya Kotina hoyaꞋa kana hutama mainae. Tamakaya Anumaya Kotina nomaꞋa kana hutama mainae.

Mono aliꞋya veaꞋmoꞋya kamuta vaya kana huꞋya mainae.

10 Tamakaya Anumaya Kotina nomaꞋa mainageꞋna Anumaya KotiꞋa kayone yamaꞋaleti nagaya no ki aliꞋyate kava kano maineꞋna yafateti tunagea ago ayemalenogeꞋya nagoꞋa veaꞋmoꞋya nona negiye. MukiꞋa veaꞋmoꞋya amakesa havilama huteꞋya kanaleꞋya huꞋya kiho. 11 Anumaya KotiꞋa tokiyaꞋage no yosamoꞋma noma atafa nehia yosa Yisasi Kalaisina agaiꞋage ategeno maineanagiꞋya nagoꞋa veaꞋmoꞋya alu tokiya noma atafa hisia yosa oꞋayegahae. 12 NagoꞋa veaꞋmoꞋya haya keleti ani nona tokiyaꞋage huno falu otesia yosaletiꞋene u yosaletiꞋene yafatetiꞋene negiyanagi nagoꞋa veaꞋmoꞋya hofaletiꞋene vitimo alapaletiꞋene aupaꞋa kasalisia yateti negiye. 13 Negiyanagino Anumaya KotiꞋa kaiyekema hulatesia kanafina mukiꞋa veaꞋmogami aliꞋyamo aepaꞋa haote haote huno atamo anefeꞋmo avame humateno amakege amakege hutesigeꞋya aliꞋyama ali-mainesaya aliꞋyamo aepaꞋa fufu yate ali falote hugahie. 14 NagoꞋa veaꞋmoꞋya tokiyaꞋage u yosaleti kimalenaya avamete huꞋya ki-malenesaya noꞋamimoꞋma atama otesigeno kanaleꞋma huno hanesiana ani veaꞋmoꞋya kanale miyana anonaꞋamia aligahae. 15 Aligahagi nagoꞋa veaꞋmoꞋya ki-malesaya noꞋamimoꞋma atama lesigenoꞋa mukiꞋa aliꞋyamaꞋamimoꞋa fanane hugahianagi atafiti veaꞋma ali vati huna avamete huno amakaiꞋami amaku amamena aligatisigeꞋya maigahayanagiꞋya anonaꞋamia oꞋaligahae.

Tamakaya Anumaya Kotina alu aotage nomaꞋa mainae.

16 Tamakaya Anumaya Kotina alu aotage nomaꞋa mainageno Anumaya Kotina Alu Aotake AvamuꞋamoꞋa tamakupina maine. Tamakaya ani yana havilama ohunao? 17 NagoꞋa veaꞋmoꞋya Anumaya KotiꞋma mainea nomaꞋama ali haviya hisayana Anumaya KotiꞋa amakaina ali haviya humategahie. Anumaya Koti nomaꞋa alu aotage nona haneanagitama tamakaya ani nona mainae.

VeaꞋmogami amakia alisaga ohisune.

18 Havigu tamakaitamihe havige ayemavataga hisagi. NagoꞋamogatama “Mopafi veaꞋmogami haviꞋyaꞋmiene veaꞋne mainone.” huꞋya hisayana naꞋa amaku amakesa ataleteꞋya amakesa nohaviya vea kana huꞋya maisayana kanale haviꞋyaꞋmiene veaꞋne maigahae. 19 Ma mopafi haviꞋyaꞋami hanea veaꞋmoꞋya Anumaya Koti aulagafina amakesa nohaviya veaꞋne kana humainae. Anumaya Koti avopina mage huno kae-maleneane

“Ma mopale haviꞋyaꞋamiene veaꞋmoꞋya savaleꞋage nehageno Anumaya KotiꞋa veaꞋmoꞋya kalifuma hanagi-maleneꞋya nehaꞋyafiya avamete huno amatafa nehie.” huno humaineane.
20 NagoꞋene mage huno humaineane

“AnumayamoꞋa haviana ma mopale haviꞋyaꞋamima hanea veaꞋmoꞋya nehaviya amaku amakesamoꞋa afa ya kana humaine.” huno humaineane.
21 Na yafe “Ma veala kanale veaꞋne mainae.” hutama amakia alisaga ohiho. Anumaya KotiꞋa mukiꞋa yana tamamine. 22 PoloꞋnagi, ApolosiꞋagi, PitaꞋagi, ma mopaene tamahaimuꞋene, fali yaꞋene, meni kanaene, haenagama falote hisia kanaene, mukiꞋa yana Anumaya KotiꞋa tamamine. 23 Tamamigetama tamakaya Kalaisi ayapi maigeno KalaisiꞋa Anumaya Koti ayapi maine.

Copyright information for `KMU