1 Corinthians 4

AnumayamoꞋa agaiꞋa aliꞋya vayaꞋamogamina fako nehie.

Yisasi kema tamahanepauna vayaꞋmogatihena mage huꞋya hisae “Yisasi Kalaisina aliꞋya vayaꞋamoꞋya maineꞋya Anumaya KotiꞋa nayoma falaki-malenea kea yagai-maineꞋya huhaleꞋya nehae.” huꞋya hisae. Kavayagaisaya veafena “Efi efi hutama aliꞋyana aliho.” huno humaine. Tamakayaene nagoꞋa veaꞋnene nagaiꞋma fako hutama nagaya kanaleꞋya huꞋna tamahanepauvo havi kava huꞋna tamahanepauvo hutama hisaya yafena kolia nohue. NagaiꞋnia nehua yafena nagaiꞋniꞋa fakoa nohugi AnumayamoꞋa agaiꞋa fako hunategahie. Nagaya agoana “Fatago aliꞋya kano mainoe.” huꞋna nehuanagi Anumaya Koti aulagafina fatago aliꞋya kano maino ifi omainoe huno AnumayamoꞋa agaiꞋage “NaꞋa humainane.” huno nagaila fako hunenate. Kaiyekema hulatesia kanamoꞋa yaufa falote ohuneanagitama tamakaya veala alitama “NaꞋa kavala havi kava nehae.” hutama hu oꞋamateho. Anumayamo esia kanafina agava mainesageno mukiꞋa veaꞋmoꞋya kefo yama, hani yapi falaki-mainea yana, Anumaya KotiꞋa hale yate alino falote hugahie. AnumayamoꞋa agaiꞋa amahaote amahaote amakuꞋa amaketeno “Kanale humainao kefo ya humainao.” huno agaiꞋa alino fako huteno veaꞋmogamina humainesaya avamete Anumaya KotiꞋa agaiꞋa muse yana amamigahie.

Kolini mainaya veaꞋmoꞋya amakaiꞋami amaki alisaga humainae.

NafuꞋnagana-gatama tamakaya havisae huꞋna nagaiꞋene ApolosiꞋenema alitama fako ohisaya kea nehuꞋna kaana tamave-nelue. Anumayamo avopifena mage hie “Okaenesaya kea ohiho.” huꞋya humainaya kea havitama akave nehutama nagoꞋa veaꞋmogami amakia alisaga nehutama nago veaꞋmogami amakia ali haviya nehaya kavala ohiho. Tamakaya mukiꞋa veaꞋma mainaya avamete hutama mainagi aluꞋa avametela hutama oꞋamakasenagi mukiꞋa yana AnumayamoꞋa tamamineanagi naꞋa higetama “NagaiꞋniꞋa ani yana ali falote nehue.” hutama tamakesa havitama tamaugafa alitama nehaiye?

Tamakaya ma ke hutama nehao? “TagaitigekeꞋya Yisasi kema havuna kea hai havimainone. PoloꞋene ApolosiꞋene mani kea tahapaiꞋageta ohavinonagi tagaitigeꞋya hai havilineta sauve veaꞋne mainone.” hutama nehao? Ani kavaꞋma humaineleꞋasina taꞋagaiꞋenena aniꞋa hutaꞋa sauve vaya kana hutaꞋa mainoꞋaleꞋasine. Tamage tamakaya ani avamete veaꞋnea omainae. Nagaya ma nagesa nehavue Anumaya KotiꞋa tagaila Aposolo vayala haenagalafa maisunafe hulatene. Nayoma kame vayaꞋma hamaegahe amavaleꞋya kumate emainageꞋya amaketeꞋya kigi hu neꞋamataya avamete kava nehageta tagaya haenagalafa vaya kana huta mainonageꞋya “HamaesageꞋya falisae.” huꞋya hageꞋya veaꞋmoꞋyaene ensole vayaꞋene tagaila nelageꞋya kigi hunelatae. 10 Tagaya Yisasi Kalaisi aliꞋya neꞋalunanagita aifo vaya kana huta mainonagi tamakaya KalaisiꞋene ailokaetama mainetama kanale havi haviꞋyatami hanea veaꞋne mainao? Tagaya tokiyatia omale vaya maunagetama tamakaya tokiyatami hanea veaꞋne mainao? Tamakai tamakia alisaga nehayanagi tagaifena “Otahaiya vaya mainae.” huꞋya nehae. 11 Yisasi kema hamanepaunafe nayoꞋene meni kanafiꞋene neyafena lagala neleno tifena nelageno nehie. Kenatia haviya nehuno faesuna noꞋenena omalegeta vaiyatete nehunageꞋya kaꞋyo kevea nelamiye. 12 Kaveti ali falote hisuna yafena tayapitila tusiꞋa aliꞋya neꞋalune. VayaꞋmoꞋya tagaila hu-haviya hu nelatayanagi anonaꞋa kanale manua neꞋamamune. Tagaila tusiya huꞋya ali haviyana hulatayanagi tagaya tokiya vaita mainone. 13 Hu-haviya hu nelatayanagi anonaꞋamia ako huta falu hamaisifa ke huneꞋamatone. NayoꞋene meniene vayaꞋmoꞋya tagaifena “Kasali-mainea yama halafi hutalaya avamete vaya mainae.” huꞋya nehae.

PoloꞋa “Nagai auꞋava akave male ho.” huno hamapai-maine.

14 Mani kea havitama tamakaye hisie huꞋna nokaogi nagaila nahaiya nafaꞋneyagamo-gatama ali lamakafa hisue huꞋna mani kea kae-malenoe. 15 Kalaisima akave visaya kea teni tauseniꞋa (10,000) vaya hulamave-lisayana nagaya nagaiꞋnige nagoke nelamafaꞋna mainoe. Yisasi Kalaisi kanale mono kema tamahapaugetama havitama Anumaya Kotina tamakuꞋa amitafa hageno agaiꞋa nafaꞋneyaga lamateneafe nagaya nelamafaꞋna mainoe. 16 Mainoa yafe nagayama nemauva auꞋava kavala agetetama akave maletama maiho. 17 Ani yafe Timotina hutogeno tamakaite umaine. TimotiꞋa AnumayatimoꞋene ailokaeno maineno kanale aliꞋya neꞋalianagino nagaila nahau nayamopafi nenahaiya nafaꞋneꞋniꞋa maineafe nagayama Yisasi KalaisiꞋene ailokaeꞋna maineꞋna vai neꞋayoa auꞋava yafena tamahapaiteno ani kate visaya kea huno tamakesa hugahie. MukiꞋa kumate uvana Yisasife haviꞋya amakupi malenaya veaꞋmogamina mani kea hamanepauvane.

18 NagoꞋamogatama nagaifena “Omegahie.” hutama nehutama tamakaitami tamaugafa alitama nehaiye. 19 Nehaiyanagi AnumayamoꞋa hainegenoꞋma “Vuo.” huno hunatesigeꞋna iva aupaꞋa ago egahue. NeꞋeꞋna amakaiꞋami amaugafa aliꞋya nehaiya vayala mo neꞋamakeꞋna nagaifema nehaya kea haviteꞋna tokiyaꞋamiene agegahue. 20 Anumaya KotiꞋma kava yagai-mainea yamo aepaꞋa keꞋagela omalenegi Anumaya Kotina tokiyaꞋa alita maisuna yamoꞋenena aepaꞋa hane. 21 Tamakaila na kava hisuafe nelamahaiye? Kelama-kisua kema hisua yafe esuo? Ifi ako huꞋna tamakaifena aluya huno nahau nayamopafi nenahaiya kava hugahe esuo? Ani yafena lamakesa nehavitama etetama fatago hutama maisayana tamakaifena nahau nayamopafi nahau-mainenageꞋna evaꞋyi hano.

Copyright information for `KMU