1 Corinthians 6

Yisasi anagaꞋmoꞋya neꞋamafugamina kaiyekea hu oꞋmatesae.

NagoꞋa nelamafuꞋyaene kema vaitetama agaiꞋma kaiyekema hutegahena naꞋa higetama Anumayamo kema akave nomalaya kava vayatela amavaletama neꞋvae? Ani kavala ohiho. Yisasina amakuꞋa amitafa humainesaya vayate vigeno ketamia alino kanale huno fatago hulamateno. Yisasi anagaꞋmoꞋya haenagaꞋa ma mopale veaꞋmogamina kaiyekea humategahae huꞋya humainaya kea ohavinao? MukiꞋa veala kaiyekea humategahagi osi kea fako hisaya tokiyatamia hane huꞋna nehue? Tamakaya ohavinao? HaenagaꞋa tagaya ensole vayaꞋmogami kaiyekea humategahunagi ma mopale yana osi yanagitama tamakaya afaꞋa fako hugahae. Nago yama falote hisia yupa kema fako hugahena naꞋa higetama Anumayamo akave nomaleꞋya mono nopi amaki omale vayatela kea alitama neꞋvae? Ani kavaꞋma hayana havi kava nehae. Tamakaipina tole nelamafugania kema vaisaꞋagenoꞋa tamakaipina nagola kanale havi haviꞋyaꞋa hanea kanoa amuꞋnoꞋanifi hetino keꞋanima fako hisia kanoa omaineo? Mainegahie. Tamakaye hisifa kea nehue. NaꞋa higetama ani kanomotela anavaletama oꞋutama nelamafuganina kaiyekema hunategahena Anumayamo akave nomalaya kanomotela anavaletama neꞋvae?

Ke vai yatamima falote higetama kaiyekema humategahe vayana havi kava nehae. Nago kanomoꞋa kagaila havi kavaꞋma hunegatesiana “Afa yane.” nehuka kaiyekea hu oꞋateka yuna heka maiteꞋasina kanale hileꞋasine. Nago kanomoꞋa kagaipiti musufayama higeka “Afa yane.” nehuka kaiyekea hu oꞋateka maiteꞋasina kanale hileꞋasine. KanaleꞋya hugahe hianagi ani kavala ohutama tamakaya havige hutama nelamafugamina havi kava huneꞋamatae. Kefo yama nehaya veala Anumaya KotiꞋa kava yagai-mainea kumatela ohaigahae huno humainea kea ohavinao? Ani kehena havilama hutetama havige hisaya kea ohaviho. Ani kefo yama nehaya veala Anumaya KotiꞋa kava yagai-mainea kumatela ohaigahae moli huliteꞋya nehuꞋya kumai nehaya veaꞋnene ago fali-mainaya vayafe “Anumayati maine.” huꞋya amakisana neꞋvaiya veaꞋnene alu kanomo aꞋnema amavayu nehaya vayaꞋene ve amafaluꞋyaene moli nehaya vayaꞋene Anumaya KotiꞋma kava yagai-mainea kumatela oꞋugahae. 10 Musufa yama nehaya veaꞋnene alu kanomo yateꞋma age hamaꞋye nehaya veaꞋnene havili neꞋya aneginagi nehaya veaꞋnene nagoꞋa veafe hu-haviya nehaya veaꞋnene havige huꞋya musufa yama nehaya veaꞋnene Anumaya KotiꞋma kava yagai-mainea kumatela amaugosa tamage huno omalegahie. 11 Tamakaila nagoꞋatamimoꞋya nayona ani avamete kefo ya nehageno AnumayatimoꞋa Yisasi Kalaisi agiletiꞋene Anumaya Koti AvamutetiꞋene kefo yatamia ago aye haꞋmi-talegetama alu aotage veaꞋne maigeno Anumaya Koti aufina “Fatago veaꞋne mainae.” huno alino kanale hulamatene.

MukiꞋa laugafa Anumaya Kotina nomaꞋae.

12 “MukiꞋa yama hisuna kavala kahe-okineanagita afaꞋa hugahune.” huꞋya nehayanagi nagaya mage huꞋna nehue “MukiꞋa yamoꞋa laya ohutafa huno laya ohugahie. MukiꞋa yana afaꞋa hugahuanagi ani yamoꞋa nofi hunate yafenagiꞋna nagaya ani kavala ohugahue.” 13 “Anumaya KotiꞋa kave nesunafene huno taipa talo huno nesuna kavela talo humaleneanagita afaꞋa negahune.” huꞋya nehayanagi Anumaya KotiꞋa haenagaꞋa kaveꞋene taipaene alino fanane hugahie. Moli huliteta huta kumai hesunafene huno Anumaya KotiꞋa veaꞋmogati laugafa talo ohunegi AnumayamoꞋene ailokaeta mainesunageno ani laugafa agaiꞋa kava yagaisiafene huno talo hulatenea yafe moli huliteta huta kumai he kavala ohisune. 14 Anumaya KotiꞋa tokiyaꞋaleti Yisasina fali-mainefitila alino hetiteneanagino tagayama falisunagenoꞋa aniꞋa huno alino hetilategahie.

15 Nagi ohavinao KalaisiꞋenema mai hapaita mainonageno tagai taugafamoꞋa Kalaisi aiya, aya, aulaga, agesa, kana huta mainone. Kalaisi augafa mainonagi hanaꞋa huta Kalaisi augafa kumai nehaya aꞋnenena alita mai hapaisune? AꞋao aniꞋa ohisune. 16 Anumaya Koti avopina mage huno kae-maleneane

“Alavema mainaꞋana nagoke anaugafa hane.” huno kae-maleneane.
NaꞋa humaineanagi nago kanomoꞋa kumai nehea aꞋene noma faeyana agaiꞋene mai hapaiꞋageno nagoke anaugafa kali-mainaꞋe. Ani yafena ohavinao?
17 Nago anaugafa kali mainaꞋanagi AnumayamoꞋene mai hapaino mainea kanomoꞋa nagopi maineꞋana nagoke anamete mainaꞋe.

18 Nagi kumai heyafena kolia hutama ohutafa hiho. MukiꞋa kefo yamoꞋa amega amaugafale yanagi kumai he yamoꞋa alino vea amaugafafina haviya nehia yafena tusiꞋa koli hutama ani kavala ohutafa hiho. 19 Anumaya KotiꞋa agaiꞋa Alu Aotage AvamuꞋa ago tamamigeno tamakupina maineafe tamaugafamoꞋa AvamuꞋmona nomaꞋa haneanagino tamaugafa tamakaitami yana omalene. Ani kea ohavinao? 20 Anumaya KotiꞋa ala miyateti tamakaila ago miya hulamateneafe tamaugafa kava yagaitama kanale auꞋava yakeꞋya hutama Anumaya Koti agia alisaga hiho.

Copyright information for `KMU