1 Corinthians 7

PoloꞋa alavemogami auꞋavafe humaine.

Avoma kaetama nahavigaya kea tamahapaigahugi haviho. Nago kanomoꞋa aꞋnea ali oꞋatesiana kanaleꞋya huno maigahie. Maigahianagi amaugafa age hamaꞋye huꞋya kumai he yamoꞋa ala nehiafe mukiꞋa vemoꞋya aꞋneꞋamia maitele hisigeꞋya aꞋnemoꞋya veꞋamia maitele hisie. AlavemoꞋya nehaya yana vemoꞋa aꞋamona “AꞋao.” hu oꞋateno aꞋmoꞋa aniꞋa huno anauꞋamona “AꞋao.” hu oꞋatesie. AꞋmo augafa agaiꞋa augafa omalenegi anauꞋamo yagai-mainea augafa hane. AniꞋa huno vemo augafa agaiꞋa augafa omalenegi aꞋamo yagai-mainea augafa hane. NaꞋa humaineafe vemoga akamoꞋene humo kavafena “AꞋao.” hu oꞋategeno aꞋmoga anaukamoꞋene humo kavafena “AꞋao.” hu oꞋato. Nagote tokaetana mainetana tanakesa havitana “Osi kana kanoꞋa humo kavala ohutaꞋa afaꞋa mainetaꞋa nunamuna hugahuꞋe.” hutana hisaꞋana kanale hugahianagi mukiꞋa kanafina ve alave humo kavala oꞋataleho. AtalesaꞋana SataniꞋa ayelana-vataga hinagetana alu veleꞋene alu ateꞋene age lanahaꞋye hu yafenagi osiꞋa maigetana hiꞋo.

Mage huꞋna nehua kea nagaiꞋniꞋa mani kea nehugi Anumaya Koti kahegi kea nohue. Nagi nagaiꞋnige maineꞋna aꞋma oꞋalinoa yama huꞋya mukiꞋa vayala maisaya yafe nenahaiyanagi Anumaya KotiꞋa agaiꞋa aluꞋa luꞋa mai yana nagoke nagokeꞋmogatina tamigeta tahaote tahaote auꞋavate nemaune.

NeyaꞋvene munaꞋnene keto aꞋnenefe mani kea nehue nagayama aꞋma oꞋaliꞋna mainoa avamete huꞋya maisayana kanaleꞋya hugahie. Hugahigi age hamaꞋyema hisaya yatela yagaisaya tokiyaꞋamima omalesiana ata lamale-yafenagi aꞋnea alitesageꞋya vea alisageꞋya hisae.

10 Alavemogatama kahegi kea, nagaiꞋnia nagesafitila nohugi Anumayamo humainea kea tamahapaigahue. AꞋnemogatama vetamia oꞋamataletama kanaleꞋya hutama maiho. 11 Maigahayanagi vetamima amataletama vinutamahena alu velela omaiho. AfaꞋa omaisaya tamakesa hisigetama etetama vetamile etama nagoke tamaipale emaiho. Vemogatama atamimona tamakaitamia hu oꞋamateho.

12 NagoꞋamogatamihena AnumayamoꞋa ohunea kea nagaiꞋniꞋa mage nehue. Yisasite ametiti humainesia kanomoꞋa Anumayamote ametiti nohisia aꞋmoꞋa neveꞋenema maisia agesama havisigenoꞋa neveꞋa “Nenataleka vuo.” huno oꞋataleno. 13 Yisasite ametiti hu-mainesia aꞋmoꞋa Anumayamote ametiti nohisia veleꞋma mainesigeno ani vemoꞋa aꞋamoꞋene maisia agesama havisigenoꞋa “Nenataleka vuo.” huno nevena hu oꞋateno. 14 Nagi Yisasite ametiti hu-mainesia aꞋmoꞋa Yisasite ametiti nohisia neveꞋenema maisiana ailokaeꞋana maisaꞋa yamoꞋa oniꞋyaꞋagela ohunegi ani vemoꞋa Anumaya Koti kema havisia yafe alu aotage kano maine. Yisasite ametiti hu-mainesia vemoꞋma Yisasite ametiti nohisia aꞋenema maisiana ailokaeꞋana maisaꞋa yamoꞋa oniꞋyaꞋagela ohunegi ani aꞋmoꞋa Anumaya Koti kema havisia yafe alu aotage aꞋne maine. Anumaya Koti aufima alu aotage veatalama omaisaꞋana nafaꞋneꞋamimoꞋya aniꞋa huꞋya oniꞋyaꞋagela haleꞋasinagi tamage huꞋya Anumaya Koti kema havisaya yafe alu aotage nafaꞋneyaga maigahae. 15 Mainageno Yisasite ametiti nohia api vefi atalesayana afaꞋa atalegahae. Atalesayana Yisasite ametiti hunesia veaꞋnefi mainaꞋa nofila ago aigalu hetalegeꞋya afaꞋa mainae. Anumaya KotiꞋa falu huta maisunafe ke higeta agaitega emainone. 16 Yisasite kametiti hu-mainana aꞋmoga agaiꞋene maineka aya hisanageno anaukamoꞋa aguꞋa aiyahae hinageno Anumaya KotiꞋa agu amena aligatisio? huka kagaya ohavinane. Yisasite kametiti hu-mainana kanomoga akamoꞋene maineka aya hisanageno akamoꞋa aguꞋa aiyahae hinageno Anumaya KotiꞋa agu amena aligatisio? huka kagaya ohavinane.

Anumaya KotiꞋma hulatenea auꞋavaꞋmo avamete maisune.

17 Anumaya KotiꞋa mukiꞋa veala noma maisaya yana fako huno amamineanagitama mukiꞋamogatama AnumayamoꞋa hapali-lamatenea yapi maiho. Mani kea Anumayamo anagala alule alule mo hamapai-mainogi haviho. 18 AnumayamoꞋma hapalimatenea kanafina nagoꞋa Yuta vayaꞋmoꞋya amaugafa taga hu-malenaya amafugula hanegeꞋya eteꞋya ani amafugula aye hananeꞋya fala okisae. NagoꞋa vayamoꞋya Anumaya KotiꞋa hapali-matenea kanaleti amaugafa taga ohunaya vayaꞋmoꞋya menia laga ohisae. 19 Taugafa laga nehaya yano taga ohunaya yano ani tole yamoꞋa afa ya hanegi Anumaya Koti kema havita akave malesuna yana kanale yanagino aepaꞋa hane. 20 Nagi mukiꞋamogatama Anumaya KotiꞋa agoꞋma hapali-lamatenea kanafina no maiyatamia oꞋataletama nagoꞋene anile maiho. 21 AnumayamoꞋa hapali-lamatenea yupa nofipi mainetama miya oꞋalisaya aliꞋya* neꞋalitama mainageno ani aliꞋyana afaꞋa aliho. Aligahagi kava kanotamimoꞋa “Menia nofila huotamategahugi afaꞋa lamatalegahue.” huno hisigetama muse nehutama afaꞋa ugahae. 22 AnumayamoꞋa hapali-lamatenea yupa nofipi mainetama miya oꞋalisaya aliꞋya* neꞋalitama AnumayatimoꞋene ailokaetama mainayafe AnumayamoꞋa kefo yatamimoꞋma alino nofi hulamatenefitila ago alino kalu he-taleneafe nofipina nagoꞋene omainae. Omainagi nagoꞋa veala afaꞋa mainageno AnumayamoꞋa hapali-lamateneafe KalaisiꞋa miyana oꞋalisia aliꞋya veaꞋneꞋa* tamage hutama maigahae. 23 Anumaya KotiꞋa ala miyateti miya hu-lamategetama agai veaꞋne mainagi ma mopafi veaꞋmogami aliꞋya veaꞋnea omaisae huꞋna nehue. 24 NafuꞋnagana-gatama AnumayamoꞋma hapali-lamatenea kanafina no maiyatamia oꞋataletama nagoꞋene Anumaya KotiꞋa tamakaiꞋene mainesigetama “Hai mainone.” hutama maiho.

AfaꞋa maineꞋya veleꞋma omaiꞋya aꞋma oꞋalinaya veaꞋmogamife PoloꞋa humaine.

25 Anumaya KotiꞋa kalagi ainategeꞋna tamagegeꞋya hisua kanogiꞋna nago kea hugahe hue. AnumayamoꞋa mani kahegi kea ohunegi nagaya nagesafiti nehue. Vene ofaenesaya munaꞋnene aꞋnene ofaenesaya veyagahe nehue. 26 Meni kanafina tusiꞋa kana yana falote nehiafe nagesa mage huꞋna nehavue neyaꞋvene munaꞋneyagaene mainaya avamete hutama maiho. 27 Nagi aꞋma ago alitenesana vemoga akamofena “Kataloe.” huka hu oꞋato. AꞋma oꞋalinesana vemoga aꞋnea oꞋalio huꞋna nehue. 28 Nehuanagi aꞋma ali-tenukahena kefo yana omaleneanagika afaꞋa aligane. Vene ofaenesaya munaꞋnemoꞋya vele maisayana kefo yana omalenegi ma mopafi mainesaꞋageno tanakaipina kasagoꞋya kana yamo falote huyafenagiꞋna mani kea nehue.

29 NafuꞋnagana-gatama ma mopamoꞋa aupa kanafi haꞋno hisia yafe meni kanaleti aepa hetama aꞋma atenesia kanomoꞋa aꞋamofena agesa ohavino aꞋama omai kano kana huno maisie huꞋna nehue. 30 NagoꞋamoꞋya avima neꞋatesaya veaꞋmoꞋya osi kanoꞋa avia ateho. Musema nehisaya veaꞋmoꞋya osi kanoꞋa musena hiho. AfenoꞋamima miya nehisaya veaꞋmoꞋya oꞋali vea kana huꞋya maiho. 31 Mama mainona mopa aupa kanafi fanane hugahigi mopafi aliꞋyama neꞋalisaya veaꞋmoꞋya mani mopale yafekeꞋyana amakesa havi havi huꞋya omaisae. 32 Ma mopale yafema tamakesa kuꞋmoꞋma haya yafena nagaila nonahaiye.

AꞋma oꞋalino mainea kanomoꞋa Anumayamona haisia yafeꞋene aliꞋyamaꞋaene agesa havi havi huno nemaiye.
33 Nemaiyanagi aꞋama mainea kanomoꞋa ma mopafi yafena, aꞋamoꞋa musema hisiafene agesa havi havi huno nemaiye. 34 Nago kaiyaga Anumayamofena agesa nehavino nago agesamoꞋa aꞋamofena agesa nehavianagi keto aꞋnene vele oꞋunaya munaꞋnene Anumayamo aliꞋyafekeꞋya amakesa haviꞋya “MukiꞋa taugafaene taguꞋaene Anumayamona alu aotage nomaꞋa hane.” huꞋya kava yagaiꞋya mainayanagi vele mainaya aꞋnemoꞋya anauꞋamimoꞋya musema humatesayafene huꞋya mopafi yafe amakesa nehaviye.

35 Mani kemoꞋa katilelamatesua kea nohugi tamaya hisuafe nehue. KanaleꞋya hutama Anumayamofena tamakesa havi havi hutama nago yamo tamavayu huno atifi mafi ohisie huꞋna nehue.

36 Nago kanomoꞋa hage-malenesia aꞋamofena hagoteno “AfaꞋa tokaetaꞋa omaigahuꞋe.” huno huteno haenagaꞋa tusi haꞋye hisigeno “Kanale kavala hu noꞋatoe.” huno haisia kava huno ani munala alitesie. Alitesiana kefo yana ohugahie. 37 Nago neyamoꞋa aguꞋa amino hage-malenea aꞋamofena “Anumayamo aliꞋya alisuꞋafe afaꞋa aote maigahuꞋe.” huno agesa haviteno augafa age haꞋye hisia agu agesa hinageno kanaleꞋya huno kava yagaino “AfaꞋa aote maigahuꞋe.” hisiana kanale kava hugahie. 38 Ani yafe nago kanomoꞋa hage-malenesia aꞋama alitesiana kanale kava nehianagi nago kanomoꞋa hage-malenesia aꞋama ali oꞋatesiana tusiꞋa kanale kava hugahie.

39 AꞋneyaga veleꞋma faitesageno anauꞋamoꞋma ofalino afaꞋa mainesigenoꞋa nagopi mai hapaino maineno aꞋmoꞋa ataleno alu vele oꞋvisie. AnauꞋamoꞋma falitesigenoꞋma “Alu kanole maigahue.” huno hisiana kanale hugahianagi AnumayamoꞋene mai-lokaeno mainesia vea alisie. 40 Aligahianagi nagaya nagesa havuana afaꞋama maisiana tusiꞋa muse hugahie huꞋna nehue. Manima hua kea Anumayamo AvamuꞋmo nahapaigeꞋna nehue.

Copyright information for `KMU