1 Corinthians 8

Afa yafe “Anumayati maine.” huꞋya amametiti nehaya yafe humaine.

Ago fali-mainaya vayafe “Anumayati maine.” huꞋya amakisana vaiꞋya afu neꞋamamiya yamo kea nagaya hugahe nehue. Tagaya nagoꞋa yafena havilinonanagi ani kanale haviꞋyatimoꞋa tamaugafa alita haisuna yanagi alu veafe tahau-tamayamopafi nelahaiya yana amaya huta ali tokiya vaimategahune. “MukiꞋa yana havilama hulinoe.” huno agesa havisia kanomoꞋa mukiꞋa yafema havilama hisia himamuꞋa omaleneanagino ohavine. Ohavinegi nagoꞋa veaꞋmoꞋya Anumaya Kotina amakuꞋa aminesaya veala Anumaya KotiꞋa amakaila ago amakelama humaine.

Ago fali-mainaya veafe “Anumayati maine.” huꞋya amakisana vaiꞋyama neꞋamiya afuma nesaya yafe nehugi haviho. Tagaya havunana ago fali-mainaya veaꞋmoꞋya ma mopafina tokiyaꞋamia omalene. Anumaya KotiꞋa agaiꞋage nagoke Anumaya maineanagiꞋya kasagoꞋya Anumaya omainae. Omainagi mopaleꞋene ikapinagaene afa anumaya kasagoꞋyama mainaleꞋasina tagaya tamage huteꞋasinagi “NelafaꞋa agaiꞋage Anumaya KotiꞋa maineno mukiꞋa yana talo humalegeta mainone. Nagoke AnumayatimoꞋa Yisasi KalaisiꞋa maineno mukiꞋa yana talo huteno tagaiꞋenena talo hulateneanagita agaiteti tahaimula neꞋalune.”

NagoꞋa veaꞋmoꞋya mani kea ohavineꞋya “Afa anumayayaga tamage huꞋya mainae.” huꞋya nehae. NagoꞋa veaꞋmoꞋya Yisasife haviꞋya amakupi malayanagi amakuꞋamoꞋa tokiyaꞋagela ohuneafe ani afa anumayamoma aminaya afua neneꞋya mage nehae “Afa anumayamo kave nenonageno ani kaveꞋmoꞋa taguꞋamona alino haviya higeno oniꞋyaꞋage nehie.” huꞋya amakesa havimainae. Nehaviyanagi kaveꞋmoꞋa Anumaya Koti avatela tavaleno otategahie. Ani afuma onesunana Anumaya Koti aufina havi veala omaigahunagi nesunana Anumaya Koti aufina kanale veaꞋnea omaigahune.

“AfaꞋa anumayamogami amamiya afua negahune.” hutama hisaya yafena kaꞋyeho. Havigu Yisasifena amakuꞋamoꞋa tokiya oꞋvainesia veaꞋmoꞋya ageteꞋya nesayana “Kefo ya nehune.” huꞋya havigu asaga hulaviyafenagi kaꞋyeho. 10 “AfaꞋa anumayayaga tamage huꞋya omainae.” hutama havimainaya veaꞋmogatama anima afa anumayamo amiya afuma malenesaya nopi mo nenesageno nagola Yisasifena aguꞋamoꞋa tokiya oꞋvainesia kanomoꞋa tamaketeno “Negahue.” huno hu yafenagi kaꞋye ho. 11 Ani yafe tamakaya “Havilama humainone.” hutama nehaya yatamimoꞋa, nagoꞋma aguꞋamoꞋa tokiya oꞋvainea nelamafufe huno KalaisiꞋa fali-maineanagitama tamakaya avaletama havi kate atesageno ali haviya huyafenagi kaꞋye ho. 12 Ani yafe aguꞋamoꞋa tokiya oꞋvainesia nelamafuna kefo ya hutesageno tokiyaꞋa omalesia agu nafaꞋnea agata aisia havi kava huteyafenagi kaꞋye ho. Tamafu-tamakanana kefo yaꞋma hutesayana KalaisiꞋene kefo yana huneꞋatae. 13 Ani yafe kavela nenoanagiꞋna nafuꞋnaganana havigu neteno havi kapi asaga hulavino visia yafenagiꞋna nagaiꞋenena nagoꞋene afua onegahue. Havigu nafuꞋnaganaꞋa kefo yapi uyafenagiꞋna ani kavala ohugahue.

Copyright information for `KMU