1 Corinthians 9

PoloꞋa Yisasi aliꞋyama aliana miyama oꞋalinea yafena muse humaine.

Nago kanomoꞋa “NaꞋa ohuo.” huno natafa nehio? AꞋao natafa nohie. Aposolo kanoa maino? E, ani kano mainoe. Nagaya Anumayatimo Yisasina agemaino? E, tamage AnumayamoꞋene ailokaeꞋna maineꞋna agai aliꞋya ali-mainoa aliꞋyateti lamakaya tamakuꞋa aiyahae nehae. NagoꞋa veaꞋmoꞋya nagaifena mage nehae “Aposolo kanoa omaine.” huꞋya nehayanagi Yisasi kema tamahapaugetama havitama tamakuꞋa aiyahae hageꞋya veaꞋmoꞋya nelamakeꞋya nagaifena “AnumayamoꞋene ailokaeno Aposolo kanoa maine.” huꞋya nehae.

NagoꞋa veaꞋmoꞋya auꞋavaꞋniꞋama fako hisageꞋna nagaya mage huꞋna hugahue. “Anumayamo aliꞋyana neꞋaluanagiꞋna kaveꞋene tiꞋenena afaꞋa alisuo? NagoꞋa Aposolo vayaꞋene Yisasi aganaꞋamoꞋyaene PitaꞋene nehaya kava huꞋna Yisasima aguꞋa aminesia aꞋma aliteneꞋna avaleꞋna vaiyesuana ani yamoꞋa havi kava hugahio? PanapasiꞋene taꞋagaitiꞋage Anumayamo aliꞋyana neꞋalitaꞋa taꞋagaitiꞋa moneleti kavela miya hutaꞋa nenoꞋe. NaꞋa higetama taꞋaya nohae? Nagi ati vayala kamele ugahena amakaiꞋami moneꞋamileti kaveꞋamia kenaꞋamia miya nehao? AꞋao. Hana kanomo hoya vai-maleteno ani hoyafitila kavela alino onene? Hana kanomo pulumaka kava yagaiteno haenagaꞋa nutimaꞋa onene? Ani kavala ohugahagi afaꞋa aliꞋya negahae.”

VeaꞋmoꞋya nehaya kavakeꞋya akave maleꞋna mani kea nehuo? AꞋao, Anumaya Koti avopiꞋene ani kea huno kae-maleneane. Mosese kahegi kefina mage huno kae-maleneane

“PulumakamoꞋa aliꞋyamaꞋa neꞋalino vitimo avina ayeno hagage huno onesie hutama avayalela nofila okinegeno aliꞋyana neꞋalino kavela neno.” huno kae-maleneane.
Mani kea Anumaya KotiꞋa pulumakamofe humaineo?
10 AꞋao, tagaife humaine. Nagi hoyama alino humalenea kanomoꞋa kave nesia yafena agesa haviteno negafie. HoyafitiꞋma nena humainesia kaveꞋma neꞋalisia kanomoꞋenena “AliꞋyatiꞋaleti kavela nagopi mainetaꞋa negahuꞋe.” huꞋana aliꞋyana neꞋaliꞋe. 11 Nagaya Anumayamo kea huhaleꞋna tamahapaiteꞋna AvamuꞋmo avina yana hoyafina kali-malenogi ani hoyamoꞋma nena hisigeꞋnahena tamakaipitila kenaꞋniene kaveꞋniene kanalelagiꞋna alisuo ifi oꞋalisue? 12 NagoꞋa vayaꞋmoꞋya tamakaipitila neꞋaligi nagaya amakase-mainoa yafena tamakaipitila alisuo oꞋalisuana? KanalelagiꞋna aligahuanagi havigu Yisasi Kalaisi kanale mono kema havisaya katamia kahea kiꞋotamatesuafene huꞋna kavela oꞋaliꞋna maineꞋna mukiꞋa kana yana aluanagi “Kavela namiho.” huꞋna nohue.

13 Mono nopi aliꞋya neꞋaliya vayaꞋmoꞋya ani nopiti kaveꞋamia neꞋaliye. Anumayamofe haviꞋya sipi sipi heꞋya kae-salamana nehaya aliꞋya vayaꞋmoꞋya ani sipi sipifiti kaveꞋamia ali-mainae. Ani kea ohavinao? 14 NaꞋama hayana Yisasi kanale mono kema hamanepaiya vayafena AnumayamoꞋa mage humaineane “Mono ketamima havisaya veaꞋmoꞋya anonaꞋa kenatamia kavetamia tamamisae.” huno humaineane.

15 Humaineanagi nagaya “Namiho.” huꞋna ohunananagi menia “Namiho.” huꞋna mani avona nokaove. Yisasi kema tamahapauvana tamakaipitila kavela afaꞋa oꞋalinoa yafena muse nehua yaniꞋa haneafe ago faligahema husina kavefena tamahavigesua nagesa ohavusine. 16 Yisasi kanale mono kema huhaleꞋna nehuafenagiꞋna nagaiꞋni naugafa aliꞋna ohaigahue. Anumaya KotiꞋa “NaꞋa huo.” huno tokiyaꞋage ke huno hunategeꞋna huhaleꞋna nehue. OhuleꞋasina Anumaya KotiꞋa muse ohigeno kana yana namileꞋasine. 17 Nagaya nagesafiti ani aliꞋyana noꞋalugi Anumayamo hunategeꞋna mani aliꞋyama alua yafena miya yaniꞋa oꞋaligahue. 18 AnumayamoꞋa hunategeꞋna huhaleꞋna nehua aliꞋyana afaꞋa neꞋaluanagiꞋna monema onamisaya yafena naipamoꞋa kanale nehie. HuhaleꞋna nehua yatetila miyaniꞋa alisua amukoꞋnia haneanagi oꞋalisua yatetila muse yaniꞋa hane.

PoloꞋa mukiꞋa veaꞋmogami aliꞋya kano maine.

19 Monema oꞋalua yafena nagoꞋa veaꞋmogami aliꞋya kanoꞋamia omainogi mukiꞋa veaꞋmoꞋya amakuꞋa aiyahae hisayafene huꞋna aliꞋya kanoꞋamia mainoe. 20 Yuta veaꞋmoꞋya Yisasi akave hisaya yafe amakaiꞋami nehaya kava huꞋna maineꞋna Yisasi kea hamanepauve. Kahegi kema haviꞋna akave malesugenoꞋa AnumayamoꞋa “Fatago kano mainane.” huno hunategahie huꞋna nohugi ani kema akave nemalaya veala Yisasi akave hisae huꞋna amakaiꞋene maineꞋna mani kemo akave maleꞋna Yisasi kea hamanepauve. 21 Kahegi kema ohavinaya veaꞋnene maineꞋna Yisasi akave hisae huꞋna amakaya haya avamete huꞋna Yisasi kea hamanepauve. Anumaya Koti kahegi kea akave maleꞋna Kalaisi akave nehuꞋna agai kea haviꞋna akave nemaloe. 22 Yisasife haviꞋya tokiya vaisaya amakuꞋa omalenesia veaꞋnene maineꞋna amakuꞋa ali lokiya vaimatesuafe tokiya nagu hanea kano omainoe. NagoꞋa veaꞋmogami amaku amamena aligatisua yafe aluya huꞋna amakaiꞋamima amahaote amahaote nehaya kava huꞋna Yisasi kea hamanepauve. 23 NaꞋa nehisugeꞋya kasagoꞋya veaꞋmoꞋya Yisasi hulatenea kanale mono kea havitesageꞋna amakaiꞋene kanaleꞋya huꞋna maineꞋna musena hisue huꞋna nehue.

Tagaya taiyage taiyage huta uvaꞋyi huo huno humainele uvaꞋyi huta anonaꞋa alisune.

24 Ohavinao oꞋagase aꞋagase huꞋya amakasaya veaꞋmoꞋya neꞋaliya yana nagoke kanomoꞋa amakaseno agaiꞋage muse yana aligahie. Ani kava hutama tamaiyage tamaiyage nehigeno AnumayamoꞋa anonaꞋa tamamino. 25 Ani yokaloma nelaya veaꞋmoꞋya aluya huꞋya amaku amakesalela tokiya vaiꞋya kava neꞋyagaiye. Muse hisaya yama anonaꞋamia alisaya yafe kava yagaiꞋya mainageno amakasesia kanomoꞋa konagali yana aligahianagi ani yamoꞋa fanane hugahie. Fanane hugahianagi tagaya fanane ohisia kanale yana anonatia alisunafene huta tagu tagesalela tokiya vaita neꞋyagaune. 26 Ani yama alisua yafena naiyayege naiyayege nehuꞋna amakasesuafene huꞋna faitega moge mege nohue. NayatetiꞋene amakasesua yokaloa neleꞋna nagaya faitega mo ai me ai nohugi nayatetila vaya amaugafale sili huꞋna amaikonelue. 27 “Fatago kate viho.” huꞋna veaꞋma hamanepaisuletila havigu nagaya havi kate visugeno Anumaya KotiꞋa nagaila akaveꞋno hunatesigeꞋna kanale anonaꞋnia oꞋalisuafene huꞋna tusiya huꞋna “Naugafamo age haꞋye hia yana ohugahue.” huꞋna nagu nagesale kava yagaiꞋna mainoe.

Copyright information for `KMU