2 Corinthians 1

Nagaila Polonia Anumaya KotiꞋa hapalinateno Aposolo kano maiyo huno hunatene. NelafuꞋa TimotiꞋene mani avona negaoꞋe.

Tamakaife nehuꞋe. Tamakaya Anumaya Koti anagala Kolini kumate mainetama agai kema havigahe melitalu hutama nemaiya veafeꞋene Akaiya kotega maineꞋya Yisasife haviꞋya amakupi malenaya veaꞋnenefe hutaꞋa mani avona negaoꞋe.
Anumaya KotiꞋa NelafaꞋene Yisasi Kalaisi AnumayatimoꞋene kayone yamaꞋaene tamaipa falu hisia yaꞋene tamamisaꞋe huꞋna Anumayamotega havigeꞋna mani avona negaove.

Anumaya KotiꞋa aya humainea yafe PoloꞋa huno muse hutene.

Musena huneꞋateta Anumaya Koti agia alisaga nehuta maisune. Anumaya KotiꞋa Yisasi Kalaisina NefaꞋagino kalagi aimate yamona aepaꞋa maineafe mukiꞋa veaꞋmogatina taipamoꞋa kanale hisia yamona aepaꞋa nagoke maineanagino ani yana hunelate. Tagaya mukiꞋa kana yama alunagenoꞋa Anumaya KotiꞋa taipa kanale hulatesia yana nelamie. Tamineafe tagaya aniꞋa huta nagoꞋa veaꞋma kana yama falote humatesigeta Anumaya KotiꞋa tayama hia kava huta veala amaipa alita kanale humatesunafe tagaiteꞋma falote humainea avamete kana yana falote humaine. Yisasi KalaisiteꞋma kasagoꞋya kana yama falote humainea avamete huno tagaipina kana yana falote nehiafe KalaisiꞋene ailokaeta mainonanagino agaya tusiya huno taipamona alino kanale hunelate. TagaiteꞋma kana yama falote hisigeta tamakaifena, tagaya tamaipa ali kanale hulamatesuna yafe falote nehie. Tamakaila tamaku tamamema aligatisiafe falote nehie. FaloteꞋma hia kanafina Anumaya KotiꞋa taipamona alino kanale hulatesigeta tagaya tamaya hisunafe taipa alino kanale hunelate. TagaiteꞋma falote humainea avamete kana yana tamakaya aligeno Anumaya KotiꞋa tamaya hinageno tamaipamoꞋa kanale hisigetama mailava hutama mai lokiya vaitama maigahae. “TokiyaꞋage huꞋya maigahae.” huta tamakaifena tusiya huta tametitia nehune. TagaiteꞋenema kana yama folote hia kanafina AnumayamoꞋa tagaila taipa alino kanale hulatenea avamete huno tamakai tamaipa alino kanale hulamategahie huta nehune.

Esia kotega kana yama alimainona yafena nafuꞋnaganatama huꞋna lamakesa hugahe tamahapaigahue. Tusiya huno kana yana tagaipina falote higeta tokiya vaita maisuna tokiyatia omalegeta “Faligahune.” huta humainone. Humainonanagi tagaya kanaleꞋya huta maisuna tokiyatia omaleneanagita ani lokiyahena tametitia ohisunagi Anumaya KotiꞋa fali vayaꞋma alino heti-neꞋamatea kanomofe tametitia hisunafe ani avamete kana yana falote humaine. 10 Ani kotega tahaesageno tusi lagata aisigeta fali-mainesuna yapiti Anumaya KotiꞋa taugafa aligatiteno haenagaꞋa eteno nagoꞋene taugafa aligatigahie huta tametitia nehune. 11 Tametitia nehunagi tamakaya laya hutama Anumayamotega ke hutama havigegeno laya hino. Taya hisigeꞋya mukiꞋa veaꞋmoꞋya anima tahaꞋmaesia yana ageteꞋya mukiꞋa veaꞋmoꞋya havigaya kema havisaya yafena Anumaya Kotina muse hutegahae.

PoloꞋa Kolini veaꞋnea havigea hamaopaine.

12 Nagaya Yisasi kema nohaviya veaꞋnene tamakaiꞋene ailokaeꞋna maineꞋna alu aotage kano mainogeno Anumaya KotiꞋa kayone yamaꞋa namigeꞋna fatago huꞋna maineꞋna ma mopale haviꞋyaꞋami hanea vayaꞋmogami ke kana kea nohue. Ani yafena nagesa havuana naguꞋamoꞋa “Havi kava nehane.” huno ohia yafena muse nehue. 13 Nagi menia hapalitama havilama hisaya kegeꞋya avopina negaove. Menia mukiꞋa aepaꞋnia havilama nohayanagi haenagaꞋa havilama hisae huꞋna nametitia nehue. Yisasi KalaisiꞋma eteno esia yupa aepaꞋnia havilama hutetama tagaya tamakaifema muse nehuna avamete hutama tamakaya tagaifena musena hugahae.

15 Nagaifena muse hugahae huꞋna nametitia nehuꞋna Masetonia ugahe hagoteꞋna mainesalega mo lamavatagigeꞋna Masetoniatila eteꞋna egahe tole yupa tamaya hugahe me lamakeme evisuafe nagaila naya hisae huꞋna nagesa nehavue. 17 Ani kema huteꞋna oꞋuꞋnama mainoa yafena “Havige huno ayelavataga hie.” hutama tamakesa havimainao? Nagaya nagesa haviꞋna “NaꞋa maꞋa huꞋna aliꞋyana aligahue.” huteꞋna atafa naipamo haiya yafe “E.” huteꞋna haenaga “AꞋao.” nehuo? AꞋao naꞋa kavala nohue. 18 Anumaya KotiꞋa agoꞋma humainea kea fatago huno hugahie. NagaiꞋenena fatago huꞋna havigea ayelamavataga ohugahue. Tamahapai-mainoa kea nago yupa “E.” huteꞋna haenaga “AꞋao.” huꞋna ohunoane. 19 Yisasi KalaisiꞋa Anumaya Koti nafaꞋnemoꞋa havige huno ayelavataga hisia kanoa omaine. Nago yupa “E.” huteno haenaga “AꞋao.” huno ohuneane. Fatago kegeꞋya huno “E.” nehia kano maine. SailasiꞋene TimotiꞋene nagaiꞋniene tamakaipina Yisasi Kalaisi kea mo lamahapai-mainone. 20 Tamahapaunageno Anumaya KotiꞋa “Hulamategahue.” huno hulokiya vai-malenea kemona aepaꞋa YisasiꞋa agaiꞋa maineanagino ani kehena “E, hulamategahue.” huno agaiꞋa humaineafe Anumaya Kotifena “Tamage nehie.” huta nehuta agia alisaga nehune. 21 Agia alisaga nehunageno Anumaya KotiꞋa agaiꞋa tavaleno tagaiꞋene tamakaiꞋene KalaisiꞋene aigaꞋmaelateno “Tokiya vaitama maiho.” huno hunelate. Ani kema huhaleta hisunafe tagaila hapalilatene. 22 Hapalilateno “Tamakaya nagai anaga mainae.” huno humainea kema havisaya yafe agaiꞋa Avamula taguꞋafina faetene. Faetegeno taguꞋafina maineafe tagayama havunana “HaenagaꞋa kanaleꞋya huta maigahune.” huta nehune.

PoloꞋa amakaitega aupaꞋa uvaꞋyi ohunea aepaꞋa hamapai-maine.

23 Nagaya kelamama-kisugeno tamaipamoꞋa haviya huyafene huꞋna Kolini kumatela nagoꞋene uvaꞋyi ohunoe. Anumaya KotiꞋa nagesa havua yana ago havimaineanagiꞋna agai aufina tamage nehue. 24 Tamakaya Anumayamofena havitama lamakupi maletama tamametiti humainaya kemona atafa hutama tokiyaꞋage hulinayafe menia kahegi kea huta kava hu notamatonagi muse hutama tamaipa kanale yapi maisayafe mani kea nehune.

Copyright information for `KMU