2 Corinthians 10

Polo aliꞋya ali haviya haya vayaꞋmogami kenonaꞋami humaine.

NagoꞋa vayaꞋmoꞋya nagaifena mage huꞋya nehae “PoloꞋa aluleꞋma mainenoꞋa tagaifena tokiyaꞋage ke nehianagi tagai tauleꞋma emaiyana koli huno kea nohie.” huꞋya nehayanagi nagaya PoloꞋna musetami nehugi KalaisiꞋa ako huno kayone humainea avamete huꞋna ako huꞋna kayone kefiti mage huꞋna tamahavi-negoe. Tamakaya mainesaleꞋma uvaꞋyi hisuana tokiyaꞋage ke huyafenagi menima omenesule ali fatago hiho. Ali fatago ohisayana nagoꞋa veaꞋmoꞋya nagaifena “Mopafi veaꞋmoꞋya nehaya avamete kava nehie.” huꞋya haya veaꞋmogamina nagayama vinuꞋnahena ani veafena tokiyaꞋage ke hugahue huꞋna nehue. Tamage tagaya mopafi vaya mainonanagi SataniꞋene tuma hunana atafa laipa akave maleta tua nohune. Mopafi mainaya veaꞋmoꞋya kame hugahe nehaya avamete huta ati kevea alita kamea nohunagi Anumaya KotiꞋa agaiꞋa tokiya ago tamineanagita Satani tokiya yamaꞋa ali haviya huta neꞋagasone. Satanina agaseta Anumaya Kotifena havigema huneꞋataya kemona ali haviya huteta veaꞋmoꞋya amakaiꞋami amaugafama aliꞋya haiteꞋya “Anumaya Koti kema ohavigahune.” huꞋya nehaya kemona agaseta hu-mainona keleti amakaiꞋami amaku amakesa Kalaisi aiyafinaga agai kema akave hisayafe amatenone. Amatenonafe tamakaya tamakuꞋa aiyahae hutama mukiꞋa Kalaisi kea akave malesageta kema neꞋatagaya veala anonaꞋamia anamigahune.

Tamakaya amega yate neꞋagae. NagoꞋa veaꞋmoꞋya “Tagaya tamage huta Kalaisi veaꞋne mainone.” huꞋya hisayana nagaiꞋenena aniꞋa huꞋna Kalaisina agai kano mainoa yafena lamakesa havi havi hutama maiho. Tagaya kavatami mainonafe tamakuꞋa ali lokiya vailama-tesunafene huno AnumayamoꞋa tagaila hulatene. TamakuꞋa ali haviya hisunafene huno huotatenegi AnumayamoꞋma hulatenea yafe tusiꞋa muse huꞋna veala hamanepauva yafena nagayea ohugahie. Nagayama kae-maloa avona koliꞋniꞋa hisaya kea huꞋna avopina okaenoe. 10 NagoꞋa veaꞋmoꞋya nagaifena mage nehae “PoloꞋa avoma kaeno lahapaiyana tokiyaꞋage huno keanelama-kianagi tagai tauleꞋma neꞋenoꞋa fulu fulu kano emaineno koliti huno afa ke maino nehie.” huꞋya nehae. 11 NaꞋa kema nehaya veala mani kea haviho. AvopitiꞋma hua kene navayafitiꞋma hua kenena nagoke augafa avamete ke haneanagiꞋna ani kavala hugahue.

12 Hugahuanagi ani veaꞋmoꞋya nagoꞋamogamina maiya auꞋavaꞋami ageteꞋya “NaꞋa nehaya veaꞋne mainagi nagai auꞋava yamoꞋa amakaila amakaseꞋna mainoe.” huꞋya nehayanagi kanale amaku amakesa omalene. OmaleneanagiꞋna nagaya “Amakaya maiya auꞋava yamona ago amakaseꞋna kanaleꞋya huꞋna mainoe.” huꞋna hisuo? “Ifi nagaila ago nagaseꞋya kanaleꞋya huꞋna mainae.” huꞋna hisue? NaꞋa avamete kavala ohugahue. 13 Anumaya KotiꞋa alisuna aliꞋyana ago tamiteno ani aliꞋyate tavalegeta tamakaitegama onana anima taminea aliꞋyakeꞋya neꞋalita tagia alisaga hugahunanagi nagoꞋa aliꞋyafena tagia alisaga ohugahune. 14 Ohugahunagi nagoꞋa veaꞋnea omenageta tagaya hagoteta Kalaisifena kanale mono kea tamakaila tamahapai-mainonafe menia ani aliꞋyafena muse nehugi Anumaya KotiꞋa otaminesia aliꞋyafena tagia alisaga ohugahune. 15 Alu vayaꞋmoꞋyama agoꞋma ali-mainesaya aliꞋyafena “Tagaiti ali-mainona aliꞋyane.” huta tagia alisaga nohunagi Yisasife havitama tamakupi malenaya yamoꞋa ala huno tokiyaꞋage hisigetama tamakaipina nagoꞋene Yisasi mono kea tamahapaisunageno aliꞋyatimoꞋa ala hisie huta tametitia nehune. 16 NaꞋa hisigeta kotamia agaseta alu kote kote vaiyeta Anumayamo kema ohavinesaya veaꞋmogamina mo hamapaisuna yafe nelahaiye. Alu vayaꞋmogami aliꞋyatela tagia alisaga hisuna yafena notahaiye.

17 Anumaya Koti avopina mage huꞋya humainayane

“Nago kanomoꞋa agima alisaga hugahena Anumayamo agigeꞋya alisaga hino.” huꞋya kae-malenayane.
18 Nago kanomoꞋa “Kanale kavakeꞋya nehua kano mainoe.” huno hisia kanomona Anumayamo aulela agia omalenegi AnumayamoꞋa agaiꞋa nago kanomofena “Kanale kavakeꞋya nehia kanoe.” hunoꞋma hisigenoꞋa tamagelafa huno Anumayamo aulela agimoꞋa hanegahie.

Copyright information for `KMU