2 Corinthians 11

Polo auꞋava yamoꞋa havigema nehaya Aposolo vaya kana ohune.

Ako hutama natalenetama mani kea haviho. AfaꞋa osiꞋa aifo ke kana ke hugahugi ako hutama maiya avamete nagoꞋene maiho. AnumayamoꞋa tamakaifema agesa nehavia avamete huꞋna havi kapi oꞋvisaya yafe nagesa kuꞋmoꞋa tusiya huno nehie. Nagi nagola hage-malenea munala alu vemoꞋa avayu hia yafe aꞋmona nefaꞋa tusiꞋa agaye nehia avamete huꞋna nagaya Kalaisina alu aotage veaꞋneꞋa maisae huꞋna kava yagainelamatoe. OsifaꞋvemoꞋa savaleꞋma huno Ivina ayevataga humainea avamete huꞋya nagoꞋa vayaꞋmoꞋya ayelama-vatagama hisagetamahena tamakesa ali fatago hutama Kalaisi akaveꞋma neꞋvaletila agai katela neꞋataletama tole lamakesa havitama Kalaisina tamakaveꞋnoma hutesaya yafena nagaila tusiya huno nagesa kuꞋmoꞋa nehie. Yisasifena ago tamahapai-mainoa kea nagoꞋa vayaꞋmoꞋya nohagi Yisasifena havigea alu kema me lamahanepaiyana tamakaya “Tamage nehae.” hutama aupaꞋa amakave nemalae. Nemalayanagi tagaya “Alu Aotage Avamula tamakupi emaigahie.” huta nehunanagi amakaya haya kemoꞋa mage hae “Alu kanomo avamula tamakupi emaine.” huꞋya hagetama aupaꞋa muse nehutama tusiꞋa havi kava nehae.

Anima havige huꞋya ayemavataga haya vayaꞋmoya tamage huꞋya nagaila onagasenae. Aupa aupa kema hisua tokiyaꞋnia omalegi aluya huꞋna nagu nagesaene kano maineꞋna mukiꞋa kanafina kanale kava huꞋna mukiꞋa yana mukiꞋa veaꞋmogami amaufina kea huhaleꞋna nehugetama nehaviye.

Anumaya Koti kanale mono kema tamahapauvana “NagoꞋa monea namiho.” huꞋna ohunoe. Tamavalesaga hisugetama tamakaya anale maisaya yafe nagaiꞋnia ako huꞋna mai kayone huꞋna nayapiti aliꞋyana ali-mainoe. AniꞋama huana kefo ya humaino? Tamakai tamaya huꞋna mono aliꞋyana neꞋalugeꞋya alu kumate maineꞋya Yisasina amakuꞋa aminaya veaꞋmoꞋya nagaila naya huꞋya monea naminae. NamigeꞋna ani monea aliꞋna musufayama nehia kanomo nehia auꞋava kavala humaino? Tamakaipina aliꞋyama aluana nagoꞋa yaniꞋama omalegeꞋna “Monea namiho.” huꞋna tamahaviokenogi Masetoniati aya vayaꞋmoꞋya mukiꞋa yana naminae. HagoteꞋnama havimainoa nagesa haenagaꞋa aniꞋa huꞋna tamakaifena “Monea namiho.” huꞋna ohugahue. 10 Kalaisi kelamage kemoꞋa nagupima haneafene huꞋna tamagea nehue. Monema oꞋaliꞋna afa aliꞋyama neꞋalua yafena tusiꞋa muse nehuafe nagola Akaiya kotega mainaya veaꞋmoꞋya ani musema nehua yamoꞋa kaniꞋa tileonategahae. 11 NaꞋa higeꞋna ani kavala nehue? Miya oꞋalua yafe tamakaifena nonahaiyo? AꞋao tamakaifena nahau nayamopafima nenahaiya yana Anumaya KotiꞋa ago age-maine.

12 Havigema tamahanepaiya vayaꞋmoꞋya amakima aliꞋya haigahena “PoloꞋma nehia kava nehune.” huꞋya hu-mainesaya kea ohavisaya yafe nagaya humainoa kavala huge huge huꞋna tamakaipitila monea oꞋaligahue. 13 Ani vayaꞋmoꞋya havigegeꞋya nehageꞋya veaꞋmoꞋya “Kalaisi Aposolo vaya mainae.” huꞋya hulatesayafene huꞋya Aposolo vaya kana nehuꞋya veala ayemavataga nehae. 14 NaꞋama hayana amakaiꞋami-omagi SataniꞋa agaiꞋa hale yapima nemaiya ensole vaya kana huno ali hapaeteno veaꞋmogamina ayemavataga nehie. 15 Satani ani kavala nehigeꞋya agaiꞋa aliꞋya vayaꞋmoꞋya aniꞋa huꞋya fatago yamo aliꞋya vaya kana huꞋya aliꞋya hapaesayana tamakaya atalia ohiho. HaenagaꞋa ani kavaꞋma nehaya yamona kefo miyana anonaꞋamia aligahae.

PoloꞋa Aposolo aliꞋyatetila kasagoꞋya kana ya ali-maine.

16 NagoꞋene tamahanepauve nagima aliꞋna hauva yafena nagoꞋa veaꞋmogatama nagaifena “Agaya aifo kano maine.” hutama ohiho. Ani kema hinutamahena natalegeꞋna osi kanoꞋa afaꞋa nagima aliꞋna haisua kea haviho. 17 Ani nagima aliꞋna haisua kea AnumayamoꞋa “Mage huka huo.” huno ohunea kea nagaiꞋniꞋa anegi neꞋna aifo vaya kana huꞋna mani kea nehue. 18 MukiꞋa ma mopafi veaꞋmoꞋya havigu kema nehuꞋya amakaiꞋami amakima alisaga nehaya kava huꞋna nagaiꞋni nagia alisaga huꞋna mani kea tamahapaigahue. 19 Tamakaila kelamama-kiꞋna mage huꞋna nehue tamakaya kanale havi haviꞋyatamima hanea veaꞋmogatama naꞋa higetama aifoꞋnafo vayaꞋmogami kea nehaviye? 20 Ani vayaꞋmoꞋya “Tagai aliꞋya vaya maiho.” huꞋya hagetama amakavela nemalae. Tamakaipitila monea neꞋaliꞋya tamakaila aliꞋya haviya hu nelamateꞋya amakaiꞋami amaugafa aliꞋya nehaiꞋya tamakaifena “Afa vaya mainae.” huꞋya haya kehena kea ohutama amatalageꞋya ani kavala maiꞋya nehae.

21 Ani kavaꞋma haya kavala nagaya naꞋa nohuafe havi kava nehuo? Nagaifena “TokiyaꞋa omale.” hutama nehao? Ani kema haya yafena nagayea nehugi nagoꞋa vayaꞋmoꞋya amakaiꞋami amaki alisaga hisaya kea nehayanagi nagayaenena aniꞋa augafa kea huꞋna aifo vaya kana huꞋna mani kea hugahue. 22 Ani vayala Hipalu* vayaꞋma maisayana nagayaenena aniꞋa huꞋna Hipalu kano mainoe. Amakaya Isaleli veaꞋmogami mono kema havisayana nagayaenena aniꞋa huꞋna Isaleli veaꞋmogami mono kea nehavue. Amakaya Apalahamu aginagomoꞋya mainesayana nagayaenena aniꞋa huꞋna Apalahamu aginagomoꞋna mainoe. 23 Amakaya Kalaisina aliꞋya vayaꞋama mainesayana nagaya amakaila amakaseꞋna tusiya huꞋna Kalaisi aliꞋyana neꞋalue. AvoꞋnio nagima alisaga hua kea aifo ke kana ke nehue. AmakaseꞋna nagaya tusiya huꞋna Anumayamo aliꞋyana neꞋalue. AmakaseꞋna kasagoꞋya kanafina kina nopina mainoane. KasagoꞋya kanafina kaꞋyo kevea naminayanagi amakaila osiꞋa amaminae. Nagaya kasagoꞋya kanafi falisua kavala huanagi amakaya nagayama hua kavala aniꞋa huꞋya ohunae. 24 Yuta vayaꞋmoꞋya faefuꞋa (5) kanafi alu ikate alu ikate teti naeniꞋa (39) haifula naminae. 25 Tagufa (3) kanafi kaꞋyo kevea naminae. Nago kanafi yafa kaꞋyotetila nahae-mainae. Tagufa (3) kanafi tipi kalefina mainogeno timoꞋa ai kalato kalato huno nahaesia kavala humaine. Ani tipi kalemoꞋa kofa-nafa huno haviya higeꞋna nago yosa atupale atafa huliꞋna nago kanaene kegeꞋene felugaene tipina mainoane. 26 MukiꞋa kanafina vaiyatete nehugeno nahaesia kavakeꞋya falote hunatene. TimoꞋa hogino nahaesia kavaꞋene musufaya nehaya vayaꞋmoꞋya nahaesaya kavaꞋene nagai anagaꞋmoꞋya, Yuta vayaꞋene, Yuta vea omainaya vayaꞋene nahaesaya kavakeꞋyana hunatenae. Ala kumate mainogeꞋyaene kaꞋme kotega mainogeꞋyaenena ali haviyana hunatenae. Tipi kalefima umainoana nahae-mainae. “Negafugata mainone.” huꞋya havige nehaya vayaꞋmoꞋyaene nahaegahena humainae. 27 TusiꞋa aliꞋyama aluana nafia nelegeꞋna kasagoꞋya kanafina naula ofaeꞋna nagala neleno tifeꞋenena nage-maine. KasagoꞋya kanafina kavefeꞋene kenaꞋnienefena omalegeno yasimoꞋa nahaigeꞋna havi no mainoe. 28 Amega naugafamo kana yaꞋene mukiꞋa kanafina Yisasife haviꞋya elitaluma nehaya veaꞋmogamina kava yagaisua yafena nagesa havi havi nehugeno nagesa kuꞋmoꞋa nehie. 29 Ani veapina nagoꞋa veaꞋmogamina hamao otage fatage higeꞋna amakaifena nahauna humatenoe. NagoꞋa veaꞋmoꞋya veaꞋmogamifena “Kefo yana hiho” huꞋya hageꞋya Anumayamo katela neꞋataleꞋya kefo yama hageꞋna naipamoꞋa ata lemaine.

30 Nagia aliꞋna haisua nagesama havisugenoꞋa nago yafena fulu fulu kano mainoa yafe tamave-ligahue. 31 Anumayatia, Yisasina NefaꞋa, Anumaya Kotina, vayaꞋmoꞋya agola agai agia alisaga huge huge hisaya kanomo aufina nagaya havigea huꞋna nohue. 32 Nagaya Tamasigasi kumate mainogeno sauve kanomo agia AletasaꞋe kava kanoꞋamona hutegeno natafa hisaya yafe “Katela yagaiho.” huno higeꞋya yagaiꞋya maiyanagi vayaꞋnimoꞋya kupi nasaga huꞋya nateꞋya ani kumaꞋmona tokiyaꞋage kegiꞋya akalogapiti nofi aliꞋya ayeteꞋya ali kaleꞋyo nehageꞋna faleꞋna ayenefe huꞋna umainoe.

Copyright information for `KMU