2 Corinthians 12

Anumaya KotiꞋa himona kana yapi Polona mukiꞋa yana aveli-maine.

NagaiꞋni nagima alisaga hisuana naya ohugahigi alu katela omaleneanagiꞋna nago kene tamahapaigahue. AnumayamoꞋa himona kana yapi naveli-mainea kea tamahapaisue. Navelia yamoꞋa fotiniꞋa (14) kafu nagasetegeꞋna ani kavafena tamahapaigahe hue. Ani kanafina KalaisiꞋene ailokaeꞋna mainoanagino Anumaya KotiꞋa ikapinaga navalegeꞋna hauvana nagu nameꞋene haimainesuo naugafaene haimainesuo nagaya ohavinoe. Anumaya KotiꞋa agaiꞋage havimaine. Havimainegi ikapinaga navalegeꞋnama hai-mainoa yafena havilinoe. Nagu nameke hai-mainesuo ifi naugafamoꞋene hai-maineo ohavinogi Anumaya Kotike haviline. Ikapinaga hai-vaꞋyi huteꞋna aluꞋa augafa avamete kea haviteꞋna ani augafa kea ma mopafi veaꞋmoꞋya ohaleꞋasinagi nagalu hu-malenea kea humaine. Kanale muse yamaꞋa navelia yafena muse nehuꞋna mani kea hugahuanagi nagaiꞋniꞋa nagia aliꞋna ohaigahue. TokiyaꞋnia omalegeno naya humaineafe muse nehuꞋna tamahanepauve. Tamage nagaya nagia aliꞋna haisua kema hisua nagesama havuleꞋasina havigu-nagu kea ohugahuanagiꞋna tamage huꞋna huleꞋasinagi ani kea ohugahue. VeaꞋmoꞋya ani kea haviteꞋya “NaꞋa augafa kano maine.” huꞋya hisaya yafena nonahaigi nemauva auꞋavaꞋniene nagai kema havisaya yafeꞋene musena hisae huꞋna nehue.

NekaꞋya kana yamoꞋa Polona augafafi aye-maine.

AnumayamoꞋa tusiꞋa kanale yakeꞋyama naveligeꞋna agoa yafena AnumayamoꞋa mage hie “Havigu kaugafa alika haiyafene.” huno nekaꞋya akoꞋya kana yamoꞋa naugafafina malegeno nagata aiye. Ani kana yamoꞋa Satanipiti falote higeno namineanagiꞋna naugafa aliꞋna ohaisuafene huno nagata yana namine. Nagatama aiya yamoꞋa fanane hisia yafe tagufa (3) yupa Anumayamotega havige-mainoe. Havigogeno kenonaꞋnia mage huno nahapaiye “Ani yamoꞋa haꞋno ohugahie. Nagaya kayone yaniꞋaleti kaya hisugeno kosa hegatesigeka aliꞋyakaꞋa afaꞋa aligane. Kayamufa omaleneafe tusiꞋa tokiyaꞋnia falote hugategahie.” huno higeꞋna ani kema havuafena nayamufa omalegeno KalaisiꞋa tokiya namigeꞋna musena humainoe. 10 Kalaisifena nagesa haviꞋna aliꞋyamaꞋa neꞋaluafe nayamufa omalegeꞋya nagai nagia hu-haviya nehao kana yama falote hunateo ifi Yisasi kema nehua yafe nagaila ali haviya hunenatao havi no maisuo ani yamoꞋma falote hia yafena naipamoꞋa haviya ohugahianagina afaꞋa muse hugahue. Nayamufa omalegeno AnumayamoꞋa tokiyaꞋama naminea yafena tusiꞋa muse nehue.

PoloꞋa Kolini veaꞋmogami amametiti alino lokiya vaimatesia yafe humaine.

11 Tamakaya havi kava hutama nagai nagima alisaga ohayafene huꞋna nagaiꞋniꞋa nagia alisaga nehuꞋna aifo vaya kana nehue. Anima havigegeꞋyama huꞋya mono kema tamahanepaiya vayafena tamakaya “Kanale vaya mainae.” hutama nehayanagi nagaya afa ya kana kano mainoanagi ani vayaꞋmoꞋya tamage huꞋya nagaila onagasenae. 12 Onagasenagi tamage nagaya Aposolo kano mainoafe tamakaiꞋene maineꞋna ako huꞋna tokiyaꞋage avame yana hugetama “Tamage Aposolo kano maine.” hutama nage-mainae. 13 Nage-mainetamagi tamakaya mage hutama nehae “Alu Anumayamo anagaꞋma kava neꞋyagaiya avamete huno tagaila kava nohie.” hutama nehao? AꞋao, nagoke avamete huꞋna kava yagainelamatoe. Tamakaipina nagoke yana alu kavala humainoe “Monea namiho.” huꞋna oꞋalinoa yafena “Havi kava hie.” hutama nehao? Ifi hanageke yama hu-mainesuana afaꞋa aigenatetama atalenateho.

14 Nagi tole kanale mo lamake-mainogi menia tagufa (3) molia kanale nagoꞋene mo lamakesuafene huꞋna nehuanagi tamakaipitila nagoꞋa yana oꞋaligahue. Tamakai monehena nonahaiye afaꞋa tamakayama Yisasina tamakuꞋa amisaya yafe nenahaiye. NafaꞋnemoꞋya ita-afoꞋamimogamife huꞋya monea alitalu huteꞋya kave amamisaya aliꞋyana omalenegi ita-afoꞋamimoꞋyage nafaꞋneꞋamihena huꞋya monea halaꞋya huteꞋya kavela neꞋamamiya yane. Nagaya aniꞋa huꞋna nelamafaꞋna mainoanagiꞋna “NafaꞋneꞋnimogatama monea namiho.” huꞋna ohugahue. 15 Nagaya tamaya hisugetama Yisasina tamakuꞋa amisayafene huꞋna mukiꞋa moneꞋniene tokiyaꞋniene atalegahue. AtalesuaꞋamoꞋma nafima lesiana kanalele. Tamakaifena tusiya huno nahau nayamopafina nenahaiyanagi tamakaya nagaifena tamahau tamayamopafina notamahaiyo? huꞋna nehue.

16 NagoꞋa veaꞋmoꞋya nagaifena mage nehae “Tamage PoloꞋa fufu yatela tagai monea noꞋaligi savalekeꞋya huno havigegeꞋya nehuno falakino kesi monetia neꞋalie.” hutama nehae. 17 Nehayanagi nagaya hanaꞋa huꞋna ayelamavataga nehue? NagoꞋa vayala humatogeꞋya ayelamavataga huꞋya tamakai monea aliꞋya me naminao? AꞋao ani kavala ohunae. 18 Tamakaya mainalega TaitasiꞋene nago tafu-taganaꞋene “ViꞋo.” huꞋna hunatogeꞋana umainaꞋe. TaitasiꞋa mo ayelama-vataga huno tamakai monea ali-maineo? AꞋao TaitasiꞋene nagaiꞋene nago avamete hutaꞋa kanale taꞋagesale mainetaꞋa aliꞋyana neꞋaluꞋe.

19 Tamakaya manima kae-maloa kehena mage hutama nehao? “Tagai taufina agi alisaga nehie.” hutama nehao? AꞋao Anumaya Koti aufina KalaisiꞋene ailokaeꞋna maineꞋna mani kea nehue. Nahau nayamopafi nenahaiya nenafugatama Yisasife huꞋna tamakuꞋa ali lokiya vailamatesua yafe mukiꞋa mani kea nehue. 20 NaꞋafene koli nehuꞋna ma nagesa nehavue havigu tamakaya mainesalega uvaꞋyi hisugetama onahaisia kavaꞋma hutama mainesayana naipa haviya huteꞋna kelamama-kisugetama nagaifena tamaipa haviya hinagetama havigu ke vaitama tamaipa ali haviya hisaya yamoꞋa tamahaivai yana falote hisigetama vaya okai yama hisagenoꞋa tamakaitami tamaugafahekeꞋya tamakesa havitetama alu kanomo agia ali haviya nehutama veafema havige nehaya kava hutama ala tamaki alitetama kefo yama hisaya yafenagiꞋna koli nehuꞋna mani avona kaeꞋna nelamamue. 21 Havigu tamakaya mainesalega uvaꞋyi hisugeꞋya oniꞋyaꞋage kefo kavaꞋene moli huliteꞋya nehuꞋya kumai he kavaꞋene age hamaꞋye huꞋya kumai nehaya kavaꞋenema nayoma nehaya veaꞋmoꞋya amakuꞋa aiyahae ohuꞋya ani kavakeꞋya nehisageꞋna me neꞋamakesugeno tamakai tamaufi Anumaya KotiꞋa nagaye hisifa yana namisigeno naipamoꞋa haviya hisia yafena tusiya huꞋna koli nagesa nehavue.

Copyright information for `KMU