2 Corinthians 2

Tamakaitega eteꞋnama esuana kelamama-kisugetama tamaipa haviya huyafene huꞋna nagoꞋene oꞋugahue huꞋna humainoe. Nagaya hisua kemo tamaipa ali haviya hisigeꞋya taꞋya nagaila muse yaniꞋa namigahae? Tamakai tamaipa haviya hisia yama tamamisua veaꞋmogatamage muse yana namisaya veaꞋnea mainae. Tamakaitegama visua yupa kea otamama-kisuafe mani avona ago kaeꞋna tamaminoe. Tamakaya muse yama namisaya veaꞋne mainagi havigu kelamama-kisua yamo tamaipa haviya hisigeno naipamoꞋene haviya hu yafene huꞋna aupaꞋa omenoe. Tamahapai-mainoa kefo yana ago ali fatago hugahae huꞋna nagaya musema hisua yana ailokaeta nagopi musena hugahune huꞋna nehue. Tusiya huꞋna tamakaifena nagesa nehavugeno naipamoꞋa kanaꞋage nehigeꞋna avi neꞋateꞋna ani avona ago kaeꞋna tamaminoe. Tamaipa haviya hisie huꞋna okaenogi “Tagaifena aluya huno haigeno mani avona lamie.” hutama hisayafene huꞋna ani avona ago kaeꞋna lamaminoe.

Kolini veaꞋmogatama kefo yama hisia kanomona aigeꞋatetama kefo yamaꞋa ataleteho.

Tokaetama mainaya vayapiti nago kanomoꞋma kefo yama hia yafe naipa haviꞋna haviyama huana nagaiꞋnigelomagi tamakaiꞋene mukiꞋamogatamina tamaipamoꞋa tusiya huno haviya nehie. Haviya nehianagi ani yafena mukiꞋa kea ohisua nagesa nehie. TamaipamoꞋa haviya higetama ani kanomona “Kefo ya nehane.” hutama havi anonaꞋa hu neꞋatayafe ani kefo yamo anonaꞋa ago alimaine. Ali-maineafe aigeꞋatetama kefo yamaꞋa ataletetama aipa alitama kanale huteho. Havigu agaye yamo kana ya amisigi kanale kava huteho. Alitama kanale hu neꞋatetama “Kagaifena aluya huno nelahaiye.” hutama huteho huꞋna tokiyaꞋage ke nehue. “KanaleꞋya hutama mukiꞋa keꞋnia havitama akave nemalao ifi nomalao?” huꞋna nagaya tamakaila avame hulamateꞋna ani avona ago kaeꞋna lamaminoe. 10 Nago kanomona aigeꞋatetama kefo yamaꞋama ataletesayana nagaya aniꞋa huꞋna ani kanomona aigeꞋateꞋna kefo yamaꞋa ataleneꞋatoe. Nago kanomona aigeꞋateꞋnama kefo yamaꞋa ataletoana tamakaifene huꞋna Kalaisi aufina aniꞋa humainoe. 11 NaꞋa ohisugenoꞋa SataniꞋa ayelavataga huno tatafa hugahie. AgaiꞋa havige huno ayelavataga hisia yafena ago havilinone.

PoloꞋa Taitasi agegahe humaine.

12 Kalaisifena kanale mono kema huhaleꞋna hugahema Taloasi kumate uvaꞋyima hugenoꞋa AnumayamoꞋa anile mainaya veaꞋmogamina amakuꞋa alino aikalo higeꞋna kanaleꞋya huꞋna ani kea huhaleꞋna humainoe. 13 HuhaleꞋna huanagi nenafuꞋa TaitasiꞋa omaigeꞋna agaife nagesa kuꞋmo higeꞋna amataleꞋna atiyegahe Masetonia umainoe.

Anumaya Koti tokiyaleti agai aliꞋyama neꞋaliya vayaꞋmoꞋya Satanina agase-mainae.

14 KalaisiꞋa Satani ayapitila tavalegeta agaiꞋene ailokaeta mainonanagita mukiꞋa kefo yana agaseta mainona yafe Anumaya Kotife muse huta agia alisaga hisune. Agaya tagaila laya higeta alule alule vaiyeta Yisasi kema nehuna yafena ani kemona havilama hageno kanale manaꞋage yamo hia kava huno ute ete nehie. 15 Higeta lagaya Yisasi kema nehuna veaꞋmogata KalaisiꞋene ailokaeta mainonafe kanale manaꞋage yamo hia avamete hunageno Anumaya KotiꞋa muse nehie. Ani manaꞋamoꞋa ute ete huno mukiꞋa veapi vigeꞋya ani manaꞋage kea nehavigeno amaku amamema alinegatia veaꞋnene kefo yakeꞋya huꞋya hani yapima tegelege nehia atafi visaya veaꞋnene ani kea nehaviye. 16 Nehavigi nagoꞋamoꞋya ani kea haviꞋya “Akave omalegahune.” huꞋya nehaya veala hani yapi tegelege nehia atafi visaya veaꞋmogamife mani kemoꞋa fali-mai veaꞋmogami manaꞋamimo hia kava humaineanagi nagoꞋamoꞋya haviꞋya amakupi maleteꞋya “Maige maige hisuna yafe kanale manaꞋage nehie.” huꞋya nehae. TusiꞋa aliꞋya neꞋalunanagi tagaitigela mani aliꞋyana oꞋaluteꞋasine. 17 KasagoꞋya veaꞋmoꞋya Anumaya Koti aliꞋyateti “Miya alisune.” huꞋya nehagi tagaila Anumaya KotiꞋa hulategeta fatago huta kelamagema huhaleta hunana KalaisiꞋene ailokaeta maineta Anumaya Koti aufina mani kea huhaleta nehune.

Copyright information for `KMU