2 Corinthians 3

Aposolo vayala haegafa alino hagelafi-latenea kemo aliꞋya vaya mainae.

Tagaya nagoꞋene tagaiti laugafa alita haisuna yafe mani kea nehuno? AꞋao naꞋa nohune. Tagaifema ohaviya yafe mani kea nehuno? Nago kanomofe avopina “Kanale kano mainegi agai kea haviho.” huꞋya kae-malenaya kea aliꞋya vaiyatete nehagi tagaifena ago havimainaya yafe tagaya ani avamete avona alita vai noꞋayone. TamataleꞋna visuana “Ani avamete avona namiho.” huꞋna ohugahue. Ohugahugi tamakaya tagai kea havitetama tamakuꞋa ago aiyahae hageꞋya mukiꞋa veaꞋmoꞋya nelamakeꞋya tagaifena “Anumaya Koti kea fatago ke nehae.” huꞋya nehagetama tagai avo kana hutama mainageno tagupina hane. Nagaya tamaya huꞋna Kalaisifena tamahapaugeno KalaisiꞋa ani avona tamakaife huno veaꞋmogami amakupina kae-malene. Oko titetila yafamona amega okaenegi haimuꞋa hanea Anumaya KotiꞋa agaiꞋa Avamuteti veaꞋmogatami amakupina ani avona kae-malegetama Kalaisi avo kana hutama mainayafe mukiꞋa veaꞋmoꞋya hapaliꞋya nehaviye.

KalaisiꞋa tayama hia yafe Anumaya Kotifena tametiti nehuta mani kea nehune. Nehunanagi “Mani aliꞋyana tagaitige alimainone” huta nohunagi Anumaya KotiꞋa tokiya lamigeta mani aliꞋyana neꞋalune. Anumaya KotiꞋa kosa helatesia tokiyaꞋa tamineafe Anumaya KotiꞋa haegafama alino hagelafi-latenea kema hamapaisuna yafe hulatene. Anumaya KotiꞋa hagoteno kahegi kea yafate kae-malenegeꞋya veaꞋmoꞋya akave malesaya amakesa haviyanagi tokiyaꞋamia omalegeꞋya ago alitagae-mainaya yafe fali-mainae. Fali-mainagi AvamuꞋmoꞋa anima haegafama alino hagelafi-latenea kea tave-liteno haegafa yama alita maige maige hisuna tahaimula nelamie.

Nelamianagi hagote kahegi kema akave omalaya yafe ani kemoꞋa hamaegeꞋya fali-maine. Ani kahegi kea yafate kaeteno amaminea yupa Anumaya Kotitegati tokiya hale yamoꞋa falote huno Mosese augosafina tusiya huno aihalea yamo Isaleli veaꞋmogami amaulaga ayeno haviya higeꞋya Mosesena oꞋagageno ani tokiyaꞋage hale yamoꞋa osiꞋa maigeno fanane humaine. Meni kanafina Alu Aotage AvamuꞋmoꞋma taya nehia aliꞋyamoꞋa nayo kahegi kemona agaseno tusiya huno tokiyaꞋage hale yamoꞋa falote humaine. Hagote kahegi kema akave omalageno hefalimatenea kea tusiꞋa tokiyaꞋage hale yamaꞋaene kema hanesiana Anumaya Koti aufina fatago huta maisuna kea hagote kemo hale yamona ago agaseno tusiꞋa tokiya hale yamaꞋaene kea hane. 10 Tamage tusiꞋa tokiya hale yamaꞋama hanea kema falote humaineafe hagoteno falote humainea hale yamona agase-maineanagino menia hagote kahegi kemoꞋa aye hale olatene. 11 Fananema humainea kahegi kemoꞋa tokiya hale yamaꞋaene hagoteno falote humaineanagi menima agola maige maige hisuna kemoꞋa tusiꞋa tokiya hale yamaꞋa hanea ke hane.

12 Ani kemoꞋa “Agola hanege hanege hugahie.” huta tametitima nehuna yafe kolia huta fala okita ani kegeꞋya huhaleta nehune. 13 Nehuta falaꞋnokunagi Mosesena augosafima tokiya hale yama fanane hisigeꞋya Isaleli veaꞋmoꞋya oꞋagesayafene huno augosafina kenaletila alino fala kigeꞋya oꞋagenae. OꞋagenayanagi tagaya MoseseꞋma humainea avamete huta Anumayamo kea fala nokune. 14 Fala nokunagi MoseseꞋa kenaleti augosafina alino aiso humalenea avamete huno Anumaya KotiꞋa Isaleli veaꞋmogami amakuꞋamona alino haꞋyagino atalako higeꞋya havilama ohunae. Nagi nayoꞋene meniene Anumaya Koti avopima hapaliyana kenaleti aiso humalenea avamete huno amaku amamemoꞋa aiso humainegeꞋya havilama nohagi nagoꞋa veaꞋmoꞋya KalaisiꞋene ailokaesayana ani amaku amamema aliꞋya aiso humalenaya yana KalaisiꞋa alitalegeꞋya havilama huꞋya nehaviye. 15 Tamage menienema Mosese kahegi kema hapaliꞋyama haviyana amaku amamemoꞋa kenama MoseseꞋa alino augosafi aiso humainea avamete higeꞋya havilama nohae. 16 Havilama nohagi nagoꞋa veaꞋmoꞋya amakuꞋa aiyahae huꞋya Anumayamotega visayana aliꞋyama aiso humalenaya yana KalaisiꞋa alitalenageꞋya havilama hugahae. 17 Nagi AnumayamoꞋa Alu Aotage Avamu maine. Anumayamo Avamula tagaiꞋenema mainesiana taguꞋama alino aiso hulateno aigagilatenea yana aligalu helateneafe nagoꞋene kahegi kemo akavela omalegeta nofipi mainaya vaya kana huta nagoꞋene omainone. 18 Taugosafi aiso humainea yana omalegeno Anumayamo tokiya hale yamoꞋa lagai taugosafi aye halegeꞋya veaꞋmoꞋya nelageꞋya Anumayamo tokiya hale yamaꞋa neꞋagae. AvamuꞋmoꞋa agai avamete veaꞋne maisunafe tagaila alino hapae-lategeta agaiꞋa tokiya hale yana alime alime nehaune.

Copyright information for `KMU