2 Corinthians 4

Aposolo anagala mopa susufane kana humainae.

Anumaya KotiꞋa kalagi ailateno “Nagai kea huhaletama hiho.” huno hulateneafe “Kasalotahae.” huta nohune. AꞋao ani aliꞋyama alunana falakita tagaye hisifa kavala huta veala aye-mavataga huta Anumaya Koti kea alita aiyahae huta “Mage nehie.” huta havigea nohunagi hulama huta huhaleta nehune. Anumaya Koti aufina veaꞋmogamina kelamagea hamapaunageꞋya mukiꞋa veaꞋmoꞋya amakuꞋaleti “Lamage nehae.” huꞋya nehae. Nehagi Yisasifena kanale mono kema huhaleta nehunageꞋya nagoꞋa veaꞋmoꞋya havilamama nohayana ani veaꞋmoꞋya hani yapima tegelege nehia atafi visaya veaꞋne mainae. SataniꞋa*, ma mopafi kava yagai-mainea kanomoꞋa, Yisasi kema nohaviya veala KalaisiꞋa kefo yaꞋamia alino kanale humateno alino halematesia kea ohavisaya yafe SataniꞋa amaku amakesa alino aye-lileno amaulaga alino asu humainea vea kana humatene. Humategeno KalaisiꞋa agaiꞋa tokiya hale yamaꞋa hanea kano maineanagino Anumaya KotiꞋenena nago avamete huꞋana mainaꞋe. MainaꞋageta lagaya tagaiti laugafa alita haisuna yafe mani kea huhaleta nohunagi Yisasina Anumaya KotiꞋa taugafa aligatigahe hutenea kanoa “Anumayati maine.” huta tamaya hisunafe Yisasi aliꞋya vaya mainone. Anumaya KotiꞋa ikaꞋene mopaene talo humaleteno “Hani yapitila halo.” hunoꞋma humainea kanomoꞋa hani yama hanea taguꞋafina aye hale-lategeta maineta Yisasi Kalaisi augosafina Anumaya Koti tokiya hale yamoꞋa hanegeno tave-ligeta age-mainone.

Age-mainonanagi Anumaya KotiꞋa agaiꞋage ani ala tokiyamona aepaꞋa maineafe “VeaꞋmogamina amave-lisue.” huno ani lokiya yamaꞋa tagaila, fulu fulu veaꞋmogati tagupina malenegeta agai aliꞋyana neꞋalunageꞋya veaꞋmoꞋya nelageꞋya “Amakaila tokiyaꞋamia omalene.” huꞋya Anumayamo agia alisaga nehae. MukiꞋa kanafina alu kana ya alu kana yana tagaitela falote nehigenoꞋagi tagaila alino haviyatafana nohie. Tagesa kuꞋmo nehianagi tagesa alino haviyatafana nohie. Yisasi kema huna yateti ali haviya hulatayanagi AnumayamoꞋa otatalene. MukiꞋa kanafina kaꞋyo kevema lamiyana ofalinone. 10 Nagi YisasiꞋa fali-mainefiti heti-mainea haimuꞋmoꞋa tagai taugafale hanenageꞋya agesayafe “Yisasina haesunageno falisie.” huꞋya hutenaya kavala menia aniꞋa huꞋya tahaeꞋya faligahe nehae. 11 YisasiꞋa fanane hisia taugafale maineno tokiyaꞋama nelamia yana amave-lisiafe tagaya ma mopafima mainona kanafina Yisasi kea huhaleta nehunageꞋya hamaiya vai-lateꞋya tahaegahena maiꞋya nehae. 12 HigeꞋya Anumaya Koti kema huhaleta huna yafe fali yamoꞋa tagaipina haneanagi agola maige maige hisuna haimuꞋmoꞋa tamakaipina aliꞋyana neꞋaliye.

13 Anumaya Koti avopina mage huno kae-maleneane

“Tamage nehie huꞋna haviꞋna nagupi maleꞋna nametiti hu-mainoafe mani kea huhaleꞋna nehue.” huno higeꞋya kae-malenayane.
Tagaya aniꞋa huta “AnumayamoꞋa lamage nehie.” huta tagupi malenonafe mani kea huhaleta nehune.
14 Tagaya ago havimainone YisasiꞋene ailokaeta mainonafe Anumaya KotiꞋa AnumayatimoꞋa Yisasina fali-mainefiti alino hetitenea kanomoꞋa tagaiꞋene tamakaiꞋenena aniꞋa huno fali-mainesupitila ali hetilateno agaiꞋa mainelega tavaleno lategahie huta tagesa havimainone. 15 Tamakai tamaya hisunafe tagaitela kana yana falote nehianagi kasagoꞋya veaꞋnele Anumayamo kayone yamaꞋamoꞋa falote higeꞋya neꞋagageno AnumayamoꞋa kasagoꞋya veala amaya nehianagiꞋa kasagoꞋya veaꞋmoꞋya Anumaya Kotifena muse huꞋya agia alisaga hugahae.

Aposolo anagaꞋmoꞋya amametitima haya yateti tokiya ali-mainae.

16 Nagi amega taugafamoꞋa haviya hugahe hianagi mukiꞋa kanafina AnumayamoꞋa taipamona alino haegafa hulategeta Anumayamo aliꞋyafena “Kasalo tahae.” huta noꞋatalone. 17 Tamage menima falote nehia kana yana afa ya kana huno fanane hugahie. Ani kana yama neꞋaluna yafe ikapinaga haita maisuna yamoꞋa, tusiꞋa ala yane, ohavunamaꞋa kanale tokiya hale yana falote huno hanege hanege hugahie. 18 Ikapinaga haita maineta alisuna yafena ago havimainonafe ma mopafi yafena tagesa havi havi nohunagi oꞋagenona yana, haenagama falote hisia kanale yafe tagesa nehavune. Ma mopafi hanegeta neꞋagona yana fanane hugahigi noꞋagona yana, haenagama falote hisia kanale yana afaꞋa agola hanege hanege huno hanegahie huta nehune.

Copyright information for `KMU