2 Corinthians 6

Aposolo vayaꞋmoꞋya aliꞋyaꞋamiletila kasagoꞋya kana ya ali-mainae.

AnumayamoꞋene ailokaeta aliꞋyana neꞋalita mage huta ali lamakafa nehune. Anumaya KotiꞋa kayone yamaꞋa ago tamamigetama ali-mainagi afa kavala ohutama akave maleme maleme haiho. AnumayamoꞋa agaiꞋa avopina mage huno hu-maineane

“NaguꞋamoꞋa kanale nehigeꞋna nahavigaya kea havuanagi tamaugafama aligatisua kanale tamaya hugahue.” huno hu-maineane.
Hu-maineanagiꞋna tamahanepauve meni kanafina Anumaya KotiꞋa aguꞋamoꞋa kanale nehigeno tamaku tamamena aligatisiafe nehaigi tamakuꞋa aiyahae hiho.

AliꞋyatihena “Haviya hie.” huꞋya ohisaya yafe tagaya kefo yana nohune. Havigu kefo yama hisunana veaꞋmoꞋya nelageꞋya amakuꞋa aiyahae ohugahae huta lagaya tagu tametela kava neꞋyagaune. Anumaya Koti aliꞋya vaya mainone huta mukiꞋa maꞋa kavala nehune. VayamoꞋya aliꞋya haviyama hulatayana tokiya vaita mailava huta mainone. Kana yama falote higeta mailava huta mainonafe tamakaya “Kanale aliꞋya vayaꞋa mainae.” hutama hisaya yafe tagutela kava neꞋyagaune. NeꞋyagaunageno maꞋa yana falote humaine kaꞋyoteti nelahaeꞋya nofi hulatenae. MukiꞋa veaꞋmoꞋya alakenake huꞋya tahaegahe humainae. TusiꞋa aliꞋya neꞋalita taula ofaonageno tusiꞋa tagate-maine. NaꞋa hulatayanagi oniꞋyaꞋage kavala ohune. Anumayamo kea havilama hulineta mailava huta maineta veala ali kayone humateta amaya nehune. Alu Aotage Avamula taguꞋafi maineno laya higeta lamage huta veafena tahau tayamopafi nelahaiye. Nelahaigeta kelamage kea huta Anumaya Koti tokiyaleti aliꞋyana neꞋalita vayaꞋmoꞋya ati kevema tamaga amayapina neꞋaliꞋya hauga amayapina halegula aye haiteꞋya kamema nehaya avamete huta fatago kavakeꞋya nehuta SataniꞋenena tua nehuta Anumayamo aliꞋyana neꞋalune NagoꞋa veaꞋmoꞋya tagia alisaga nehayanagi nagoꞋa veaꞋmoꞋya tagia ali haviya hunelatae. NagoꞋa veaꞋmoꞋya kamugea hatageꞋya vainelayanagi nagoꞋa veaꞋmoꞋya huꞋya kanale hunelatae. Tagaya tama kavakeꞋya nehunanagi tagaifena “Havige huꞋya ayelavataga nehae.” huꞋya nehae. NagoꞋa veaꞋmoꞋya tagaifena “Afa vaya kana humainae.” huꞋya nehayanagi Anumaya KotiꞋene nagoꞋa veaꞋnene “AꞋao amaki hanea vaya mainae.” huꞋya nehageꞋya nagoꞋa veaꞋmoꞋya tatafa huꞋya tahayayanagi ageho ofalinone. Anumaya Koti kema nehunafenagiꞋya hamai vailateꞋya tahayayanagi ofalinone. 10 NagoꞋa yafena tahauna hunanagi mukiꞋa kanafina taipamoꞋa kanale nehigeta musena nehune. Afeno yatia omaleanagi Yisasi kema huhaleta nehunafenagita nagoꞋa veaꞋmogamina tusiꞋa kanale yana neꞋamamune. NagoꞋa yatia omaleanagi afeno yaꞋamima hanea vaya kana huta mainone. Ani yamoꞋa tagaipina falote higeꞋya veaꞋmoꞋya tagaila nelagae.

11 Kolini kumate mainaya nelafugatama tamakaifena aluya huno nelahaigeta nago kea fala okinonagi fatago huta tamahapai-mainone. 12 Tamahanepaunageno tamakaifena lahaiyanagi tamakaya tagaifena otamahaiye. 13 NagaiꞋni nafaꞋne kana hutama mainayafe tamakaila taguꞋama tamamuna avamete hutama anonatia tagaila tamakuꞋa tamiho.

Tagaya Anumaya Kotina alu aotage nomaꞋa mainone.

14 AliꞋya aligaheno aꞋnemoꞋya vema aligaheno vemoꞋya aꞋnema aligaheno naꞋama hinutamahena Anumaya Kotina amakaveꞋno huneꞋataya veaꞋnenena ailo okaeho. Ailokaetama maisayana hanaꞋa huno fatago humainea yaꞋene kefo yamoꞋenena ailokaeꞋana maigaꞋe? Hani yamoꞋa hale yamoꞋenena ailokaegaꞋo? 15 Ifi Yisasi KalaisiꞋene SataniꞋenena ailokaeꞋana nagoke anaipale maigaꞋo? Ifi Anumayamo akave nomalaya veaꞋnene Yisasife haviꞋya amakupi malenaya veaꞋnene ailokaeꞋya maisayana nagoke amaku amakesale omaigahae. 16 Ago fali-mainaya veafe “Anumayati maine.” huꞋya amakisana neꞋvaiya yaꞋene Anumaya KotiꞋma mainea noꞋene aliꞋya nagopi malesayana kanale hugahio? Anumaya KotiꞋa haimuꞋene kanoa tagai tagupi maineafe Anumaya Koti avopina mage huno hu-maineane

“Nagaya amakupi maineꞋna amakaiꞋene vaiyatete nehuꞋna Anumaya KotiꞋami maisugeꞋya nagai anaga maigahae.
17 Ani yafe kefo yana neꞋataletama alule mainetama oniꞋyaꞋage kefo yana ohisageꞋna nagaiꞋnilega tamavaleꞋna tamategahue. 18 LamateneꞋna tamakaila nelamafaꞋna maisugetama nagai nafaꞋne munaꞋneyaga maigahae. Nagaya mukiꞋa tokiyamona aepaꞋagiꞋna mainoe. AnumayamoꞋna, mani kea nehue.” huno higeꞋya kae-malenayane.
Copyright information for `KMU