Acts 13

PanapasiꞋene SoloꞋene Anumayamo aliꞋya alisaꞋa yafe huyogiꞋya hunatageꞋana vaiye-mainaꞋe.

Ani Atiokua Yisasi anagapiti nagoꞋa maineꞋya amaune laga huꞋya Yisasi ke hamanepaiya vayala mainae. Ani vayaꞋmogami amakia PanapasiꞋene SimioniꞋe kanomona nago agia NaisaꞋe. Tagai kefina ani agimoꞋa “Anupa kanoe.” huꞋya neꞋaya agie. Ani kanoene LusiasiꞋa Sailini kanoene SoloꞋenena ManainiꞋe. Ani kanoa HelotiꞋa Kalili kava kanomona afaluꞋamoꞋe. Nago yupa Yisasi anagaꞋmoꞋya kavela mosiꞋya maineꞋya Anumayamo agia alisaga nehuꞋya muse huꞋya havinegae. Havinegageno Alu Aotage AvamuꞋmoꞋa amakaifena mage huno humaine “Panapasigani Sologania anahaote aliꞋyate hunateho. Nagaya nago aliꞋyate ago hunatenoe.” huno humaine. HigeꞋya kave mosiꞋya maineꞋya Anumayamotega havinegeꞋya ananute amaya maleꞋya hunatageꞋana umainaꞋe.

Panapasigani Sologania Saipalusi kumate umainaꞋe.

Alu Aotage AvamuꞋmoꞋa hunategeꞋana Selusia taviꞋana tipi kalefi haisaga humaiꞋana Saipalusi kotega umainaꞋe. Salamisi vaꞋyi huꞋana Yuta vayaꞋmogami mono nopi haiꞋana Anumaya Koti kea hamapai-mainaꞋe. AnakaiꞋene Yoni MakiꞋa monaya humaine. Ani Saipalusia ti amulagoyafi hanea kumaꞋyagale ute ete huꞋya Pafosi evaꞋyi humainae. Ani kumatela nago Yuta kanomoꞋa havige huno “Anumaya Koti aune kano mainoe.” huno nehia kanomo agia PayisasiꞋe nehaya kanoa maine. Ani kanomoꞋa tokiyaꞋage kavaꞋyaga talo huno veaꞋnea ayemavataga nehiane. Ani kanomoꞋa mukiꞋa kanafina kava kanomo agia Sesiusi PolusiꞋene nemaiyane. Sesiusi PolusiꞋa kanale agu agesaene kanogino Anumaya Koti ke havigahe Panapasigani Sologanife ke higeꞋana eꞋana hapai-mainaꞋe. HapaiꞋageno ani havigeꞋage aune kanoma PayisasiꞋa tokiyaꞋage kavaꞋma nehia kanomona nago agia Kaliki kefiti ElimasiꞋe mage huno nehie “Mani kea havika kagupi omalo.” huno hefalaki-maine. Hefalakeanagi SoloꞋa nago agia PoloꞋe agaiꞋa agupina Alu Aotage AvamuꞋmoꞋa hiya higeno Elimasina aulagafi age-maineno mage huno hapaiye “Kagaya Satani nafaꞋnemogae fatago humainea yamona kame kanoꞋa mainane. Savale savala keꞋage kano mainananagino kagai kagupina havi keꞋage yamoꞋa hiya humaine. NaꞋama hana kanomoga Anumaya Koti kamoꞋa fatago humainea kama haneanagi kagaya ‘Kayagimainea ka hanegi oꞋviho.’ huka hamanepaine. Na yu ani havi kavakaꞋa atalegane? 11 OꞋatalenana anonaꞋa menia havio Anumayamona tokiyaꞋage ayatetila kahaesigeno kaulagamoꞋa osi kanaganoꞋa asu hisigeka yagea oꞋagegane.” huno nehigeno aupaꞋa aulagamoꞋa anile asu higeno ayate aliꞋya kama avelisaya kanohe atiye-maine. 12 Kava kanomoꞋa Sesiasi PolasiꞋa naꞋama hia kavala ageteno Yisasife hia kene tokiyaꞋaenefe ageteno tusiꞋa amaꞋyo aigeno ani kea alino aguꞋafi maleno ametiti humaine.

Nagola Pisitia kotega hanea kumala Atioku kumate uꞋana Yisasi kea hamapai-mainaꞋe.

13 PoloꞋenema vaꞋa kanolatana Pafosi kumala ataleꞋya tipi kalefi haisaga humaiꞋya nagola Pamafilia hanea kumala Pega kumate evaꞋyi huteꞋya Yoni MakiꞋa neꞋanataleno Yelusalemu eteno lavi-maine. 14 LavigeꞋana anakaya Pega kumala ataleꞋana nago Pisitia kotega kumaꞋmo agia Atioku kumate evaꞋyi huꞋana Sapati yupa Yuta vayaꞋmogami mono nopi haiꞋana mopale mainaꞋe. 15 Mopale mainaꞋageꞋya ani mono note soka vayaꞋmoꞋya Mosese kae-malenea kene Anumaya Koti amaune vayaꞋmoꞋyama kae-malenaya kene hapaliteꞋya nago kanoa hutageno uno ani kanolatafe mage huno humaine “Nelafugatana taguꞋamoꞋma tokiya vaisia kea tanakuꞋafima hanesigetanahena huhaleꞋageta havimano.” huno humaine. 16 Higeno PoloꞋa hetino ayana alisaga huno ke ohutama maiho huno amaveliteno mage huno humaine ‘Isaleli vayaꞋmogatamaene nagoꞋa Isaleli omainaya vayala Anumaya Kotina haiya kava haya vayaꞋmogatamaene haviho. 17 Isaleli veaꞋmogamina Anumaya KotiꞋamimoꞋa taginagomogamife agaiꞋa veaꞋne maisayafene huno hapalimategeꞋya Isipi kotega yokala umaiyana Anumaya KotiꞋa amaya higeꞋya tokiyaꞋage veaꞋne aitagufeꞋya kasago hageno agaiꞋa tokiyaꞋaleti Isipi kotegatila amavalegeꞋya ataleꞋya umainae. 18 Amavaleno vigeꞋya fotiꞋa (40) kafu amakaiꞋene kaꞋme kotega umaineno veganokano kavaꞋma haya kavaꞋamihe mailama huno maineno yagaino maine. 19 Anumaya KotiꞋa seveniꞋa (7) nofi veaꞋmoꞋya Kenani nemaiya veaꞋmogamina hamae haꞋno higeꞋya faligeno amakai mopa Isaleli veaꞋmoꞋya maisaya yafene huno alino amamine.

20 AmamigeꞋya fo hataleti fifitiꞋa (450) kafu ani kumatela mainageno anile Anumaya KotiꞋa kasagoꞋya uhagotematesaya vayala amamigeꞋya amakaya maime maime nehaigeno haenagaꞋa nagola Anumaya Kotina aune kanoꞋa SamueliꞋa evaꞋyi humaineane. 21 EvaꞋyi higeꞋya “Ala sauve kanotia lamio.” huꞋya hageno Anumaya KotiꞋa Solona amamine. Ani kanomona nefa agia KisiꞋe. Penisamini nofi kano maineanagino SoloꞋa fotiꞋa (40) kafu kava yagaimateneane. 22 Kava yagaimateno maineanagino Anumaya KotiꞋa neꞋataleno Tevitina hutegeno ala sauve kanoꞋamia maineane. Anumaya KotiꞋa Tevitifena mage huno humaineane

“Yesi nafaꞋnea Tevitifena nagaiꞋene nagoke taꞋagu taꞋagesa haneanagino TevitiꞋa mukiꞋa nagaiꞋma nahaiya kavala hugahie.” huno humaineane.
23 Anumaya KotiꞋa nayona hulokiya vaino mage huno humaine “Tevitina aginagomopiti tamaugafa aligatisia kanoa falote hugahie.” huno humaineanagino ani kanoa YisasiꞋe taugafa aligatisia kano emaine.

24 YisasiꞋa falote ohunea kanafina YoniꞋa Isaleli veaꞋmogamina “Kefo yatamihe tamakuꞋa aiyahae hutama tina faleho.” huno hamapai-maine. 25 YoniꞋa aliꞋyamaꞋa alino avaya ayegahe nehuno mage huno humaine “Tamakaya nagaifena ‘Anumaya KotiꞋa taugafa aligatigahe hutenea kano emaine.’ hutama nehayanagi nagaya ani kanoa omainogi ani kanoa aupaꞋa egahianagiꞋna nagaya afa kanogiꞋna agai aiyale ayesuana onategahie.” huno humaine.

26 Nafu-naganagatama Apalahamupiti anagaꞋmogatamaene nagoꞋa Isaleli omainaya vayala Anumaya Kotina haiya kava haya vayaꞋmogatamaene Anumaya KotiꞋa tamaugafa aligatigahe humainea kea mukiꞋamogatile evaꞋyi humaine. 27 Yelusalemu mainaya veaꞋmoꞋya kava vayaꞋamiene Yisasina agelama ohunae. MukiꞋa sapati kanafina amaune vayaꞋmoꞋya Yisasina kaiyeke huteteꞋya haesaya yafema kae-malenaya kea hapaliyanagi aepaꞋa havilama huꞋya ohavinae. Yisasina kaiyekema hutenaya yafe humainaya kemoꞋa ago falote huno tamage humaine. 28 Kaiyekea huteteꞋya haesageno falisia augafa kefo kavala ohuneanagi Pailatife “AfaꞋa haegeno falino.” huꞋya humainae. 29 MukiꞋa amaune vayaꞋmoꞋya agaifema humalenaya kemoꞋa falote huno ago tamage higeꞋya yafaga yosaleti augafaꞋa aliꞋya yafakapi mo-hevaitenae. 30 Mo hevaitayanagi Anumaya KotiꞋa fali-mainefiti alino hetitene. 31 Hetitegeno YisasiꞋa agaiꞋaenema Kaliliti Yelusalemu hai-mainaya anagaꞋamoꞋya amaulagafiti kasagoꞋya yupa evaꞋyi higeꞋya age-mainayanagiꞋya menia agaifena mukiꞋa Yuta veaꞋmogamina hamanepaiye. 32 Hamapai-mainaya yafe tagayaene Anumaya KotiꞋa tamakinago-mogamina hulokiya vaino hamapai-mainea kemona kanale ke tamakaila tamahapaigahe emainone. 33 Ani kemoꞋa falote huno tamagema hisiafene huno Anumaya KotiꞋa tagaila amakinagomogati taulagafi Yisasina ago alino hetitene. Mani kea Yagame Avopi tu (2) molia sapta mage huꞋya kae-malenae

“Kagaya menia nafaꞋneꞋnimoga mainane. Meni kanoꞋa nagaya NegafaꞋna mainoe.” huno kae-maleneane.
34 YisasiꞋa fali-mainefiti ago ali hetiteneafe eteno falino komufinaga mo okasalisiafene huno nayona Anumaya KotiꞋa mage huno humaineane

“Tevitina ‘HaꞋno ohu manua kanale manu kamigahue.’ huꞋna humainoa manua tamakaila tamamigahue” huno humaineane.
35 Ani yafe nago kemoꞋa nago autaꞋmafina mage huno hu-maineane

“Kagaya kanaleꞋya huka huyogi-malenana aliꞋya kanokamona Anumayamoga atalesanageno augafamoꞋa komufinaga okasaligahie.” huno humaineane.
36 Mani kea Tevitifena ohune. TevitiꞋa ma mopale mainea kanafina Anumaya Kotina haiya kava humaineanagino faligeꞋya totoꞋamogami hevaimatenaya matimatipi augafamoꞋa kasali-maineanagi Anumaya KotiꞋa Yisasina fali-mainefiti ali hetitenea kanomo augafamoꞋa okasaline. 38 Ani yafe nafuꞋnaganagatama havilama hutama haviho ani kanomoꞋma hulatenea kavafe Anumaya KotiꞋa kefo yatamia aigetamateno atalelamatene huta tamahanepaune. 39 MoseseꞋma kahegi malenea kemona akave malesunageno Anumaya KotiꞋa kefo yatia aigetateno atalelategahie hutama tamametiti hisayana aigetamateno ataleotamategahigi Yisasife havitama tamakupi maletama tamametiti hisageno YisasiꞋma fali-mainea yateti Anumaya KotiꞋa mukiꞋa kefo yatamia aigetamateno atale-lamategahie. 40 Amaune vayaꞋmoꞋya mage huꞋya kae-malenae

“Tamakaya kamuge hatagetama vaineꞋamataya veaꞋmogatama tamakaya mainaya kanafina nagaya Anumaya KotiꞋna tusiya huꞋna tokiyaꞋage avame yana hugahue. Ani yafe veaꞋmoꞋya tamahapaisagetama ‘Tamage nehae.’ hutama ohugahae ani yafe tamamaꞋyoa ainagetama faligahae.” huꞋya kae-malenayane. Mani amaune vayaꞋma kae-malenaya kea tamakaite evaꞋyi hugahigi kaꞋye ho. huno humaine.
42 PoloꞋa mani kea huteno PanapasiꞋene hati-laviꞋana ugahe nehaꞋageꞋya alitalu humainaya veaꞋmoꞋya mage hae “Nago Sapati yupa ani monola nagoꞋene me lahapaiꞋo.” huꞋya humainae. 43 NehuꞋya monola haꞋno higeꞋya hati-laviꞋya mukiꞋa Yuta vayaꞋene Anumaya Koti kema nehaviya anagala Yuta vea omainaya veaꞋnene Pologani Panapasigania anakave neꞋvageꞋana mage huꞋana hamapaiꞋe “TokiyaꞋage hutama Anumaya KotiꞋa kayone hulamatesia yama tamaminea yapi maiho.” huꞋana humainaꞋe.

44 Nago Sapati yupa mukiꞋa ani kumate veaꞋmoꞋya Anumayamo ke havigahe melitalu humainae. 45 Melitalu huꞋya mainageꞋya Yuta vayaꞋmoꞋya ageteꞋya amaipamoꞋa haviya higeꞋya PoloꞋma hia kehena “Havige nehie.” huꞋya hu-haviya hutenae. 46 Hu-haviya hunatayanagi Pologani Panapasigania tokiyaꞋage kea mage huꞋana haꞋe “Tamakaya Yuta veaꞋmogatamina hagotetaꞋa Anumaya Koti kea tamahapaigahe huꞋanagi mani kemona tamakaveꞋno hutetama ‘Agola maige maige hisuna tahaimu alisuna yafena notahaiyanagita oꞋaligahune.’ hutama haya yafe tamakaila tamataletaꞋa Isaleli vea omainaya veaꞋmogamina mo-hama-paigahuꞋe. 47 NaꞋa hisuꞋafene huno AnumayamoꞋa mage huno lahapai-maineane

‘Isaleli vea omainaya veaꞋmogamina aye-halematesayafene huꞋna ago hulamatenoe. MukiꞋa mopaene mopaene mainaya veaꞋmogamina amaku amamena aligatisuafene hutama hamapaigahae.’ huno humaineane.” huꞋana humainaꞋe.
48 NehaꞋageꞋya Isaleli vea omainaya veaꞋmoꞋya mani kea haviteꞋya tusiꞋa muse huꞋya Anumayamo kea alisaga humainae. NaꞋa nehuꞋya Anumaya Kotina haigenoꞋma “Agola maige maige hisaya tamahaimula aligahae.” huno hapali-malenea veaꞋmoꞋya mani kea haviteꞋya aliꞋya amakupi maleꞋya amametiti humainae. 49 Amametiti hageno Anumayamo kemoꞋa mukiꞋa kotega ute ete humaine. 50 Ute ete humaineanagi Yuta vayaꞋmoꞋya ala amakima hanea aꞋneyaga mono kema nehaviya aꞋneyagamogami amaipaene kava vayaꞋmogami amaipaene huꞋya ali hetigeꞋya aepa heꞋya Pologani Panapasiganina ali haviya-hunateteꞋya ani kumategati ananati-talenae. 51 Ananati-talageꞋana anakaya “Mani kavala havi kava nehae.” huꞋana ani kumapiti kugukege yana anaiyafitila aifopo huneꞋataleteꞋana Aikoniamu umainaꞋe. 52 VaꞋanagi Yisasi kema haviꞋya amakupi malenaya veaꞋmoꞋya tusiꞋa muse hageno Alu Aotage AvamuꞋmoꞋa amakupina hiya humaine.

Copyright information for `KMU