Acts 15

KasagoꞋya veaꞋmoꞋya Yisasina amakuꞋa aminaya veaꞋmoꞋya Yelusalemu melitalu humainae.

PoloꞋene PanapasiꞋene Atioku kumate Yisasi anagaꞋene mainaꞋageꞋya nagoꞋa vayaꞋmoꞋya Yutiati elaviꞋya mage huꞋya hamapaiye “MoseseꞋma ‘Tamakoya anoꞋya taga hiho.’ huno humainea kea akave omalesayana Anumaya KotiꞋa tamaku tamamena aliokatigahie.” huꞋya humainae. HageꞋana PoloꞋene PanapasiꞋene “AꞋao, tamakaya havige nehae.” huꞋana amakaiꞋene tusiꞋa ke vaiteꞋya ani kema fatago hisaya yafe PoloꞋene PanapasiꞋene nagoꞋa vayaꞋene mo hamavigegahe Aposolo vayategaene mono note kava vayategaene humatageꞋya Yelusalemu haimainae.

Yisasi anagaꞋmoꞋya humatageꞋya katega vayana Fonisia kotegaene Samelia kotegaene alu kumate kumate ute ete huꞋya Isaleli veaꞋne omainaya veaꞋmoꞋya amakuꞋa aiyahae huꞋya Yisasina amakuꞋa aminaya kea amafuꞋamakanagamina hamapaigeꞋya haviteꞋya tusiꞋa muse humainae. Muse hageꞋya Yelusalemu uvaꞋyi hageꞋya alitaluma humainaya Yisasi anagaꞋmoꞋyaene Aposolo vayaꞋene soka vayaꞋyagaene falu fala humatageꞋya mukiꞋa Anumaya KotiꞋa anakaiꞋene tokaeno humainea kavafena hamapai-mainaꞋe. HamapaiꞋageꞋya nagoꞋa Falasia vayala Yisasina amakuꞋa aminaya vayaꞋmoꞋya mage huꞋya humainae “Isaleli veaꞋne omainaya veaꞋmoꞋya Yisasina amakuꞋama aminesayana aniꞋa hutama amakoya anoꞋya taga hiho. Mosese kahegi kemo akave maleho huta kahegi malesune.” huꞋya humainae.

HageꞋya ani kema humainaya ke fako hugahe Aposolo vayaꞋene soka vayaꞋmoꞋyaene melitalu humainae. Melitalu humaleteꞋya kasagoꞋya ke-yeso maiꞋya hutageno PitaꞋa hetino mage huno humaine nafuꞋnaganagatama tamakaya havimainae nayona Anumaya KotiꞋa tamakaipiti nagaifena “Kagayae.” huno “Isaleli veaꞋne omainaya veaꞋmogamina Yisasi kanale mono kea hamapaisanageꞋya haviteꞋya aliꞋya amakupi maleꞋya amametiti hugahae.” huno humaineane. Anumaya KotiꞋa taguꞋafina ago agelama huno agemainea kanogino ageana “Ani veaꞋmoꞋya amakuꞋa ago namitafa hageno tagaiꞋma Alu Aotage AvamuꞋmoꞋma taminea kava huno ani veala amamine. NagoꞋke avamete huno Alu Aotage Avamula amamine. Yisasifenema huꞋya haviꞋya amakupi malenayafene huno amakupima hanea kefo yaꞋamia ago aye haꞋmi-talene. 10 Ago aye haꞋmi-talenegi naꞋa higetama Anumaya KotiꞋma humainea kavafena ‘Afa ya kana yane.’ hutama tusiꞋa kanaꞋage yana alitama Yisasina amakuꞋa aminaya veatela malegahe nehae. Nayona taginagomoꞋya MoseseꞋma taminea kea akavela omalenayane tagayaenena menia akave malesuna tagamula omalene. 11 Omaleneanagi ‘AnumayatimoꞋa Yisasi ali kayone hulateno kefo yatihe huno faliteno tagu tamena aligatimaine.’ huta tametiti nehunanagi ani yateti Isaleli veaꞋne omainaya veaꞋmogami amaku amamena ago aligatimaine.” huno humaine.

12 PitaꞋa mani kea hianagi mukiꞋama alitalu humainaya vayaꞋmoꞋya nago ke kanoꞋa ohunae. OhageꞋana PanapasiꞋene PoloꞋene Isaleli veaꞋne omainaya veaꞋmogami amuꞋnopi Anumaya KotiꞋma anakai anayapima tokiyaꞋage avame yama humainea yafena hamapaiꞋaꞋageꞋya havimainae. 13 Nehavigeno YemesiꞋa hetino mage huno humaine “NafuꞋnaganagatama nagai kea haviho. 14 Anumaya KotiꞋa ehe kanafima Isaleli veaꞋne omainaya veala amaya hugahe viaꞋyamo ani veapitila agaiꞋa veaꞋne maisaya yafene huno amavale-maine. Saimoni PitaꞋa ago tahapaigeta havimainonagi ani kea Anumaya Koti amaune vayaꞋmoꞋya mage huꞋya nayona kae-malenayane

16 ‘Mani kanamoꞋa haꞋno hisigeꞋna nagaya Anumaya KotiꞋna Teviti nofi anagala nago no kana hu-mainayanagiꞋya tagapema ailavisayana nagaya eteꞋna aliꞋna hetigahue. Ali-haviya hutalenaya nona eteꞋna kigahue. 17 Alisaga hugahuanagi mukiꞋa veaꞋnemoꞋya nagaifena natiyegahae. Isaleli veaꞋne omainaya veaꞋnemogamina nagaya ago hapali-malenoa veaꞋmoꞋya nagaife haviꞋya nati-yegahae. Nagaya Anumaya KotiꞋna ago nayona tamahapaugetama havimainaya kavafe mani kea nehue.’ huno aune kanoꞋamoꞋa kae-maleneane.
19 Ani yafe nagayama havua nagesamoꞋa mage nehie Isaleli veaꞋne omainaya vayapiti Yisasina amakuꞋa amitafa humainaya veaꞋmogamina kana yana oꞋamamisune. 20 Avo kaeta ‘Mage hutama hiho.’ huta hamapaisune ‘Fali-mainaya veafe ‘Anumayati mainae.’ huꞋya amakisana neꞋvaiꞋya malenesaya kavela onesae. AꞋne munaꞋne amavayu nehisaya kavala ataleho. KolamoꞋa agusafinaga hanesia afuene kolaꞋenena oneho.’ huta hamapaisune. 21 Nayona aepa heꞋya mukiꞋa kotega Yuta vayaꞋmogami mono nopina mukiꞋa Sapati yupa Mosese kea hapaliꞋya nehaviyane. Nehaviyanagi haviteꞋya akaveꞋma malenuꞋyahena akave malegahae.” huno humaineane.

Isaleli veaꞋne omainaya vayapiti Yisasina amakuꞋa aminaya veaꞋnefi mani avona kaeꞋya amaminae.

22 Aposolo vayaꞋene soka vayaꞋene Yisasi anagaꞋaene mukiꞋa alitalu humaineꞋya kea haviteꞋya “Kanalele.” huꞋya amakaipiti tole kanolatana hesaga huteꞋya hunatageꞋana PoloꞋene PanapasiꞋene Atioku kumate umainae. Anima hunataya kanolatana kava kanolataꞋami mainaꞋe. Anakia Yutasi PasapasiꞋene SailasiꞋene hunatageꞋana umainaꞋe. 23 Avona kaeteꞋya ani kanolatamogani anayapina maleteꞋya mage huꞋya kae-malenae.

Tagaya Aposolo vayaꞋene soka vayaꞋene mani avona kaeta Isaleli veaꞋne omainaya vayapitiꞋma Yisasife havitama tamakupi maletama tamametiti nehaya tafu-taganagatama Atioku kotegaene Silia kotegaene Silisia kotegaene mainaya veaꞋmogatama “Felugae.” huta avona kaeta nelamamune.
24 Tagayama havunana nagoꞋa vayaꞋmoꞋya tagaipitila nagoꞋa tamakesa kuꞋmo hutama tole lamakesa havisaya augafa kea mo lamahapaiyanagi tagaya “Ani kea hiho.” huta hu-oꞋama-tenone. 25 Hu-oꞋamatenonafene huta melitalu hageta kea huta haꞋya kiteta tole kanolatana tagaipitila tahau tayamopafi nelahaiya kanolata hunatonageꞋana AnumayatimoꞋa, Yisasi Kalaisina agai ke hamanepaiꞋa yateti hanaesageꞋana falisaꞋa yafena anamaꞋyoa oꞋai kanolatane, PanapasiꞋene PoloꞋene tamakaitega ugahe nehaꞋe. 27 YutasiꞋene SailasiꞋene hunatesunageꞋana tamakaitega humainona kea anavayafiti mo lamahapaigaꞋe. 28 Alu Aotage AvamuꞋmoꞋa tagaiꞋene mainegeta kea kea huteta “Kanalele nagoꞋa kana yana amayoꞋnalela omalegahunagi ma yamaꞋage akave malesae. Fali-mainaya veafe amakisana vaiꞋya atupa kave alisaga huꞋya malesaya kavela oneho. KolamoꞋa agusafinaga hanesia afuene kolaꞋenena onesae. AꞋne munaꞋne amavayu nehisaya kavala ohisae. Ani kavaꞋma ohisayana kanaleꞋya huꞋya maigahae. Ketia male me haꞋno hie.” huꞋya kae-malenae.

30 Kae-maleteꞋya humatageꞋya Atioku laviꞋya Yisasi anagaꞋmogamina molitalu humateteꞋya mani avona amamigeꞋya hapaliꞋya haviteꞋya humainaya kehena tusiꞋa muse humainae. 32 Muse hageꞋana YutasiꞋene SailasiꞋene Anumayamo aune kanolata maineꞋana ayaꞋaya kea amaku amamema alilokiya vaisaya kea hamapai-mainaꞋe. 33 Ani kea huteꞋana ayaꞋaya kanagefa amakaiꞋenena maiteꞋana eteꞋana vaꞋageꞋya ali falu fala hunatetageꞋana hunatenaya vayatega eteꞋana umainaꞋe.

35 VageꞋana PoloꞋene PanapasiꞋene Atioku maineꞋana nagoꞋa veaꞋnene ailokaeꞋana Yisasi kea hamanepaiꞋana mainaꞋe.

PoloꞋene PanapasiꞋenena nagoke anaipalela omainaꞋe.

36 NagoꞋa kana maiteꞋana PoloꞋa Panapasifena mage huno humaine “EtetaꞋa mukiꞋa kumate Yisasi mono ke hamapai-mainoꞋa kumate ute ete hutaꞋa tafu-taganaꞋya kanaleꞋya huꞋya mainafi haviya huꞋya mainafi utaꞋa mogesuꞋe.” huno humaine. 37 Higeno PanapasiꞋa “Yoni Maki avale-linetaꞋa ugahuꞋe.” huno hianagi PoloꞋa mage hie “AꞋao, ani kanomoꞋa hagoteno taꞋagaiꞋenema viana Pamafilia kumate mo nelaꞋataleno aliꞋyana oꞋalino umaineane.” huno humaine. 39 HigeꞋana ani yateti tolefi aliꞋana fako huꞋana anahaote anahaote umainaꞋe. PanapasiꞋa Makina neꞋavaleno tipi kalefi haisaga humaiꞋageno Saipalusi anavaleno umaine. 40 VaꞋageno PoloꞋa anonaꞋa Sailasina avalegeꞋya afuꞋaganaꞋya Anumayamotega havigeꞋya mage hae “Kategama visaꞋana AnumayamoꞋa kayone hulanateteno tanaya hisie.” huꞋya hageꞋana umainaꞋe. 41 Silia kotegaene Silisia kotegaene ute ete huꞋana Yisasi anagaꞋmogamina amaku amamena ali lokiya vaimateꞋana amaya humainaꞋe.

Copyright information for `KMU