Acts 17

Tesalonaika vayaꞋmoꞋya PoloꞋene SailasiꞋene hanaegahe humainae.

PoloꞋene anagaꞋamoꞋyaene Amifipolisi kumala mogaseꞋya Apolonia kumala mogaseꞋya Tesalonaika kumate uvaꞋyi humainae. Ani kumatela nagola Yuta vayaꞋmogami mono nona hane. Haneanagino PoloꞋa mukiꞋa kanafima nehia kava huno tagufa (3) Sapati yupa ani mono nopina haino Anumaya Koti kema kae-malenaya autaꞋmafitila aepaꞋa hugafino mage huno hamapaiye “Anumaya KotiꞋma taugafa aligatigahema hutenea kanomoꞋa tusiꞋa agata aigeno fali-maine. Fali-mainefitila eteno heti-maine. Ani Yisasina Anumaya KotiꞋa taugafa aligatigahema hutenea kanomofe tamahanepauve.” huno humaine. HigeꞋya nagoꞋa Yuta vayaꞋmoꞋyaene kasagoꞋya Anumaya Koti agima alisaga nehaya Kaliki vayaꞋene amakima hanea aꞋneyagaene Yisasife haviꞋya amakupi maleꞋya amametiti huteꞋya PoloꞋene Sailasigani anakave tokaeꞋya umainae.

TokaeꞋya umainaya yateti Yuta vayaꞋmogami amaipamoꞋa haviya nehae. HigeꞋya kefo kava nehuꞋya felu mailiteꞋya nehaya vayalagiꞋya vaya atagu nefaya kumapi mainae. MaineꞋya vayaꞋyaga amavaleꞋya melitalu humaleteꞋya ani kumate vayaꞋmogamina amaku amakesa huꞋya ali hetigeꞋya Yesoni note uꞋya nomaꞋa moyenafa huꞋya Pologani Sailasiganina anavaleꞋya alitalu humainaya veaꞋmogami amayapi anategahe haimainae. HaiteꞋya atiyegetayana higeꞋya oꞋanakeꞋya YesoniꞋene nagoꞋa Yisasi anagaꞋene amavayu huꞋya ani kumate kava vayate amavaleꞋya uvaꞋyi huꞋya mage huꞋya hae “Mani vayaꞋmoꞋya mukiꞋa kotega ute ete huꞋya veaꞋmogamina mono kea ali haviya hume hume menia tagai kumate emainae. Emainageno YesoniꞋa nomaꞋafi amavaleno amategeꞋya maineꞋya ala sauve kanotimoꞋa, SisaꞋma humainea kea ali haviya nehuꞋya mage hae ‘Alu sauve kanoti maine. Ani kanomo agia YisasiꞋe.’ huꞋya humainae.” huꞋya humainae. HageꞋya melitaluma humainaya veaꞋmoꞋyaene ani kumate kava vayaꞋmoꞋyaene ani kea haviteꞋya amakesa kuꞋmo huteꞋya “Kina nopima oꞋvisayafena monea tamitetama ugahae.” huꞋya hageꞋya YesoniꞋene nagoꞋa vayaꞋene monea hageꞋya amamitageꞋya amatalageꞋya umainae.

Pologani Sailasigania Pelia kumate uꞋana Yisasi mono kea hamapai-mainaꞋe.

10 AupaꞋa ani kege kanoꞋa Yisasi anagaꞋmoꞋya Pologani Sailasiganina hunatageꞋana Pelia kumate vaꞋaꞋyamogani Yuta vayaꞋmogami mono nopi mo haifale-mainaꞋe. 11 Pelia mainaya veaꞋmoꞋya Tesalonaika kumate mainaya veala amakaseꞋya kanale amaku amakesaene veaꞋne mainageno PoloꞋa Yisasi kea hamapaigeꞋya haviteꞋya aluya huno nehamaiye. HaviꞋya amakupi maleteꞋya mukiꞋa kanafina “Tamage nehifi havige nehie?” huꞋya Anumaya Koti kema kae-malenaya kefina hapaliꞋya ati ayemainae. 12 NaꞋa nehuꞋya kasagoꞋya Yuta vayaꞋmoꞋyaene kasagoꞋya Kaliki aꞋneyaga amakima hanea aꞋneyagaene kasagoꞋya Kaliki vayaꞋyagaene Yisasifena haviꞋya amakupi maleꞋya amametiti humainae. 13 Amametiti hayanagi Tesalonaika mainaya Yuta veaꞋmoꞋya haviyana “PoloꞋma Anumaya Koti kema Pelia kumate veaꞋma hamapaiye.” huꞋya haya kea haviteꞋya anile evaꞋyi huꞋya alitalu humainaya veaꞋmogami amaku amakesa meli haviya humainae. 14 Ali haviya hageꞋya Yisasi anagaꞋmoꞋya aupaꞋa Polona hutageno hageli kahaepatega tavigeꞋana Sailasigani Timotigania anile Pelia mainaꞋe. 15 MainaꞋageꞋya avagi huꞋya umainaya vayaꞋmoꞋya Polona Atenisi avaleꞋya umainageno PoloꞋa mage huno hamapaiye “Sailasigani Timotiganife ‘Tanakaya aupaꞋa hutana nagaitega eꞋo.’ hutama hanapaiho.” huno hamapaigeꞋya ataleꞋya umainae.

PoloꞋa Atenisi kumate mono ke huhaleno humaine.

16 Vageno PoloꞋa anakava maineno ageana Atenisi kumatela kasagoꞋya yafateti talo humalenaya afa anumayayaga malenageno mogeteno aipamoꞋa tusiꞋa haviya humaine. 17 AipamoꞋa haviya higeno Yuta vayaꞋmogami mono nopi haino Yuta veaꞋnene Anumaya Koti agi alisaga nehaya Yuta vea omainaya veaꞋnene Anumaya Koti kea huhaleno amakaiꞋene huge havige humaine. MukiꞋa kanafina veaꞋne atagu nefaya kumapi maineno anifima mainaya veaꞋmogamina Anumaya Koti mono kea hamanepaino huge havige humainae. 18 HamanepaigeꞋya nagoꞋa Epikuliaene* Sitoikiene* ala havi haviꞋya alilinaya vayaꞋamimoꞋyaene ke oꞋvai oꞋvai nehageꞋya alitalu humainaya veaꞋmoꞋya haviteꞋya nagoꞋamoꞋya Polofe mage huꞋya hae “Ma kanomoꞋa na ke huliteno nehie?” huꞋya nehageꞋya nagoꞋamoꞋya PoloꞋma YisasifeꞋene fali-mainefiti hetimainea kanale mono kema hamapaiya kehe mage huꞋya humainae “Alu kumate anumayahe nehifi?” huꞋya humainae. 19 HuteꞋya agai ke havigahe Aleopagusi Kanisole vayate avaleꞋya uteꞋya Polofe mage huꞋya havigae “Kagayama haegafa kema hamapaina kea havigahe nehunagi tahapaiyo. 20 KekaꞋama havunana aluꞋa augafa kema hanageta havuna kemo aepaꞋa havisune huta nehune.” huꞋya humainae. 21 MukiꞋa Atenisi mainaya vayaꞋene yoka emainaya vayaꞋene mukiꞋa kanafina haegafa kema hisaya ke havisaya yafena tusiya huno nehamaiya vayalagiꞋya alu kavala ohisaya amakesa nehae. 22 Hageno PoloꞋa Aleopagusi kanisole vayaꞋmogami amuꞋnopi hetino mage huno humaine Atenisi mainaya vayaꞋmogatama nagaya agoana tamakaya aluya hutama afa anumayamo mono kea tokiyaꞋage hutama nehaya vaya mainae. 23 MainageꞋna nagaya vaiyatete nehuꞋna agoana yafateti talo humalenaya afa anumayamogami amakima alisaga nehaya afa anumayatamimona ageteꞋna nago yafa folamole mogoana ani yafatela mage hutama kae-malenae “OꞋagenona anumayamogae.” hutama kae-malenageꞋna agoa kanomofe “OꞋagenona kanomo agima alisaga nehune.” hutama kae-malenaya kanomofe aepaꞋa hugafiꞋna tamahapaigahugi haviho. 24 Anumaya KotiꞋa ma mopaene mukiꞋa mopafima hanea yaꞋene talo humalenea kanogino mukiꞋa ikapinaga yaꞋene mopafi yaꞋene kava yagai-mainea kanogino veaꞋmoꞋya amayateti kimalenaya nopina nomaiyane. 25 Tagaya tayapitila nago yana haꞋomaegahune. AgaiꞋa mukiꞋa veaꞋmogami hamaimuꞋene mukiꞋa yama amaminea kanogita hanaꞋa huno nago yamaꞋa omaleneanagita aya hugahune? 26 Anumaya KotiꞋa nagoke tototimona hagoteno talo humaleteno ani kanofiti mukiꞋa ma mopale mainaya nofi veala ali falote humatene. Humateteno “Ma kote kote maiho.” huno amateteno kasagoꞋya vaya maisaya kanaꞋamiene agaiꞋa humatene. 27 Amakaya Anumaya Kotina amaku amigahena ati yege yege huꞋya Anumaya Koti aepaꞋa havisae huno ani kavala humaineane. Tamage agaya alulega omaigi tagaiꞋene nagoke nagokeꞋmogatiene tokaeno maine. 28 Maineanagita agaiꞋage tahaimula tamigeta vaiyatete huta mainone. Ani kehe nagoꞋa tamakai avoma agelinaya vayaꞋmoꞋya mage huꞋya humainae “TagaiꞋenena agaiꞋa lategeta nafaꞋneyagaꞋa mainone.” huꞋya humainayane. 29 Higeta tagaya agaiꞋa latenea nafaꞋneyaga mainone. Havigu lagaya ma lagesa havisunagi “Anumaya Koti aepaꞋa tagesafitila yafatetiꞋene kapaletiꞋene kanileta yafatetiꞋene kanaleꞋya huta talo humalenaya augafa kanoe.” huta ohisune. 30 Nayona Anumaya Koti aepaꞋa mukiꞋa veaꞋmoꞋya ohavinayanagino Anumaya KotiꞋa kasagoꞋya kea ohuneane. Nagi menia mukiꞋa ma mopale veafena tokiyaꞋage ke huno mage hie “TamakuꞋa aiyahae hutama nagaitega eho.” huno humaine. 31 Anumaya KotiꞋa mukiꞋa ma mopale veaꞋmogamina fatago huno kaiyekema humatesia kanafina ago hapalino ani kaiyekeleꞋma yagaisia vemona ago ali hetitene. Ani vemofe “VeaꞋmoꞋya havilama huꞋya havisae.” huno fali-mainefitila ali hetitene huno humaine. 32 HigeꞋya “Fali-mainefiti ago ali hetitenema.” hia kea haviteꞋya nagoꞋa veaꞋmoꞋya kigi huꞋya akaya atageꞋya nagoꞋa veaꞋmoꞋya mage hae “NagoꞋene mani kea hugeta havimano.” huꞋya humainae. 33 Nehageno PoloꞋa neꞋamataleno umaineanagi nagoꞋa veaꞋmoꞋya agai akave neꞋuꞋya Yisasife haviꞋya amakupi maleꞋya amametiti hu-mainae. Amametiti humainaya veapitila nago kanomo agia TionisiusiꞋe Aleopagusi kanisole kano maineane. Nago aꞋmo agia TamalisiꞋene nagoꞋa veaꞋnene amametitia humainae.

Copyright information for `KMU