Acts 2

Alu Aotage Avamula amakaite elavi-maine.

YisasiꞋa ago falitegeꞋya seveniꞋa (7) sota maiteꞋya vitimo afulea kanahe muse haya imu kiya kanafina mukiꞋa Yisasi veala nago nopi alitalu huꞋya mainae. Mainageno aupaꞋa ikapinagati ala age neꞋaino ala yasimoꞋma huhu huhu nehia kava huno age neꞋaino anima mainaya nopina me hiya humaine. Hiya higeꞋya agayana atamo anefe kana yamoꞋa hamaote hamaote amaugafale mo kaꞋmaemaine. Mo kaꞋmae-mainegeno Alu Aotage AvamuꞋmoꞋa eno mukiꞋamogami amakupina me hiya higeꞋya amakaya aepa heꞋya Alu Aotage AvamuꞋmo hamapaigeꞋya amaku amakesafiti nohaviya kea alu ke alu ke humainae. NehageꞋya ani yupa kasagoꞋya Anumaya Koti kema nehaviya Yuta vayaꞋyaga mukiꞋa kotegati eꞋya Yelusalemu melitalu humainae. Ani vayaꞋmoꞋya ikapinagatiꞋma ala agegefa aigeꞋya haviteꞋya melitalu huꞋya haviyana ani nopima mainaya veaꞋmoꞋya alu ke alu ke maiꞋya nehageꞋya alu kotegatiꞋma emainaya veaꞋmoꞋya mage hae “Nagai ke nehie. Nagai ke nehie.” huꞋya tusiꞋa amamaꞋyo aimainae. AmamaꞋyo neꞋaiꞋya amakesa havi havi huꞋya mage hae “Mani kema nehaya vayaꞋmoꞋya Kalili vaya mainayanagi hanaꞋa huꞋya tagaiti itatimoꞋya nelafaꞋya nehageta nehavuna kefitila hageta nehavune. Tagaya ma kumaꞋyagaleti emainone PatiaꞋene MitiaꞋene Elamiene MesopotemiaꞋene YutiaꞋene Kapatosiene Potusiene EsiaꞋene FiligiaꞋene PamafiliaꞋene Isipiene Sailinia aupaꞋale Lipia kotegatiꞋene Lomuene Kalitiene AlepiaꞋene naꞋa kotegati emainonagi Yuta vayaꞋene Yuta vayaꞋmogami Anumaya KotiꞋamimo ke havilinaya vayaꞋene emainonagi tahaote tahaote ketifiti Anumaya Koti tokiyaleti humainea kavafe tahapai-mainae.” huꞋya hae. 12 HageꞋya mukiꞋa veaꞋmoꞋya tusiꞋa amamaꞋyo neꞋaiꞋya tusiꞋa amakesa nehaviꞋya nagoꞋa veaꞋmoꞋya mage huꞋya hae “Ani kavaꞋmona aepaꞋa naꞋane?” huꞋya hayanagi nagoꞋa veaꞋmoꞋya havigu ke nehuꞋya mage hae “Amakaya havilina vaini nofi alagamo timaꞋa neteꞋya aneginagi nehae.” huꞋya humainae.

PitaꞋa ke huhaleno humaine.

14 PitaꞋa aleveniꞋa (11) Aposolo vayaꞋene heti-maineno ala kefiti mage huno humaine Yuta nafuꞋnaganagatamaene Yelusalemuma mainaya veaꞋnene nago ke tamahapaigahugi haviho. 15 Tamakaya tamakesa haviyana mani veaꞋmoꞋya havilina vaini li neꞋya aneginagi nehae hutama nehafi? AꞋao menia natekefa naeni kiloki nehigi havilina onenae. 16 Onenagi menima agaya yafena nayona Anumaya Koti aune kanomoꞋa YoeliꞋma humainea kemoꞋa mage huno humaineane.

17 Anumaya KotiꞋa mage huno humaine “Mani kanamoꞋa aupaꞋama haꞋno hugahema hisia kanafina nagaya Alu Aotage AvamuꞋnimona mukiꞋa veaꞋnemogamina amamigahue. AmamisugeꞋya tamakai nafaꞋnemoꞋene munaꞋnemoꞋene Anumayamo avayafiti hamapai-mainea kea hisageꞋya neyaꞋvetamimoꞋya himona kana yaꞋyaga feluga neꞋagesageꞋya kosunatamimoꞋya himona agegahae. 18 He, nagaya Alu Aotage Avamula aliꞋya veaꞋnimogamina vene aꞋnene amamisugeꞋya Anumayamo avayafitiꞋma hamapai-mainea kea tamahapaigahae. 19 Nagaya ikateꞋene ma mopafiꞋene tokiya avameꞋyama hisua yana kolaꞋene ataene halinaene tamaveligahue. 20 Tamavelitesugeno yagemoꞋa ayesu hinageno ikaꞋmoꞋa kolamaꞋage hisigeno AnumayamoꞋma esia kanafina tusiꞋa tokiyaꞋaene hale yamaꞋaene efalote hugahie. 21 EfaloteꞋma hinageꞋya mukiꞋa veaꞋmoꞋya Anumayamo agi neꞋayeꞋya ‘Kalagi ailato.’ huꞋya nehisageno Anumaya KotiꞋa amaku amamena aligatigahie.” huno kae-maleneane.
22 Isaleli vayaꞋmogatama nago kea tamahapaigahugi haviho “Nasaleti YisasiꞋe, Anumaya Kotitegati emainea kano maine.” hutama havisaya yafe Anumaya KotiꞋa aya higeno tusiꞋa tokiya avame yana tamakaipina ago ali falote higetama age-mainae. 23 Agayanagi Anumaya KotiꞋa nayona havino “NaꞋa maꞋa hugahue.” huno haꞋya kimaleteno tamayapi ategetama Anumaya KotiꞋa hutenea kava hutama ani kanoa, Yisasina, kefo vayaꞋene yafaga yosalela nilia hetama asaitetama hayageno fali-maine. 24 Falimaineanagi falimainea yamoꞋa atafa huno atakalo ohune. Anumaya KotiꞋa anima agata yama alino falimainea yapitila kalu heno ali hetitene. 25 Nayona TevitiꞋa YisasiꞋma falimainesifitiꞋma alino heti-tesia yafena mage huno humaineane

“MukiꞋa kanafina AnumayaniꞋamoꞋa nagaiꞋene maineno tamaga nayategama mainea yafena kolia ohugahue.
26 NagaiꞋenema nemaiya yafena nagu nafaꞋnemoꞋa tusiꞋa muse nehigeꞋna agia alisaga nehue. Yoka faliteꞋna hetigahue huꞋna nametitia nehue. 27 Anumaya Kotigae ‘Alu aotage kanoe.’ huka hunatenana kanomonia naugafa kasalisia yafe fali-mainaya veaꞋne mainaya kumatela natalesanageꞋna oꞋvisua yafe nametitia nehue. 28 Kagaya agola maige maige hisua kana ago navelinageꞋna age-mainoafe kagaiꞋenema maisua yafena aluya huꞋna musena hugahue.” Teviti mani kea humaineane.
29 PitaꞋa nagoꞋene mage hie “Nenafugatama hufalote huꞋna tamahapaisue taginagomoꞋa TevitiꞋa ago faligeꞋya hevaitenae. Hevaitenaya komua tagai amuꞋnopi hanegi akaiꞋahe mani kea ohuneane. 30 Ohunegi Anumaya KotiꞋa agaife mage huno hulokiya vaino kea humaineane ‘Kagai kaginagomopiti nago kanomoꞋa hetino eteno kagai kumate veaꞋnea kava yagaimategahie.’ huno humaineane. Humaineanagi TevitiꞋa Anumaya Koti aune kano maineanagino KalaisiꞋa, Anumaya KotiꞋma taugafa aligatigahe hutenea kanoa, fali-mainefiti hetigahie huno aune laga huno mage huno humaine. Kalaisife ‘AugafaꞋa kasalisia yafe fali-mainaya veaꞋne nemaiya kumatela oꞋategane.’ huno humaineane. 32 Ani kanoa, Yisasina, Anumaya KotiꞋa fali-mainefiti eteno ago alino hetitegeta age-mainona yafe tamahanepaune. 33 Anumaya KotiꞋa ali hetiteno avalesaga huno agaiꞋa tamaga aya kaiyagaꞋa uhagote mainaya vaya mainalega ateteno ‘Tamamigahue.’ hunoꞋma humainea kanoa, Alu Aotage AvamuꞋa, amigeno aliteno YisasiꞋa ani Alu Aotage Avamula eteno lamigeta mani kavala hunagetama neꞋagae. 34 TevitiꞋa mage huno humaineane Anumaya KotiꞋa AnumayaniꞋamofena mage huno humaine ‘Tamaga nayatega uhagote mainaya vaya mainalega mopale emainesanageꞋna kame vayakaꞋa kaiyafi amatesugeꞋya ani kame vayaꞋmoꞋya kagaifena ago tagasane.’ huꞋya hugahae.” huno humaineane.

TevitiꞋa YisasiꞋma humainea kava huno ikapinaga haino omainegi mani kea agaiꞋahena ohunegi Kalaisife humaineane.

36 “Ani yafe Isaleli vayaꞋmogata havilama huta havisune. Ani Yisasina tamakayama yafaga yosalela nilia hetama asai-malenaya kanomofe Anumaya KotiꞋa mage huno humaine ‘Ani kanomoꞋa Anumaya maineanagi nagaya hutogeno emainea kano maine.’ huno humaine.” huno nehie. KasagoꞋya ve aꞋmoꞋya amakuꞋa aiyahae hageꞋya tina falematenae. 37 PitaꞋma hia kemoꞋa amakupi ayegeꞋya haviteꞋya PitaꞋene nagoꞋa Aposolo vayaꞋenefe mage huꞋya hae “Nelafugatama menia hanaꞋa hisune?” huꞋya hae. 38 Hageno PitaꞋa mage huno hie “Tamakaya mukiꞋamogatama tamakuꞋa aiyahae hutama egeta Yisasi Kalaisi agile tina falelamatano. AniꞋama hisagenoꞋa Anumaya KotiꞋa aigetamateno kefo yatamia atalelamateno Alu Aotage Avamula tamamigahie. 39 ‘Tamamigahue.’ huno humainea kea tamakaife nehigi tamakayaene nafaꞋnetamiene Yuta vea omainaya veaꞋnenefe mani kea huno mukiꞋa Anumaya KotiꞋa kema humatesia veaꞋmogamife ‘Tamamigahue.’ humaineane.” huno Pita mani kea humaine. 40 PitaꞋa mani kea nehuno alu ke alu ke huno kanaꞋye kanaꞋye huno mage huno hie “Meni kanafima mainaya veaꞋmoꞋya tusiꞋa kefo kava maiꞋya nehagi havigu tamakaya kefo kava huyafenagi atalegeno Anumaya KotiꞋa tamaku tamamena aligatino.” huno humaine. 41 HigeꞋya nagoꞋa veaꞋmoꞋya tali tauseniꞋa (3,000) veaꞋmoꞋya mani kea haviteꞋya aliꞋya amakupi maleꞋya amametiti hageꞋya ani yupa lina falematenae. Yisasife amakupi nemalaya veaꞋmoꞋya tokaeꞋya kanale kava nehae. 42 Lina falematageꞋya amakaya mukiꞋa yupa nago amaku amakesa haviꞋya Aposolo vayaꞋmogami kea haviꞋya hameꞋya maya kofa huꞋya nete nete nehuꞋya Anumayamotega muse huꞋya nunamuna nehae. 43 NehageꞋya mukiꞋa veaꞋmoꞋya tusiꞋa amamaꞋyo neꞋaigeꞋya Aposolo vayaꞋmoꞋya kasagoꞋya tokiya avame yana nehae. 44 MukiꞋa Yisasi kema haviꞋya amakupi maleꞋya amametitima humainaya veaꞋmoꞋya nagoke amaku amakesa haviꞋya mukiꞋa yaꞋyagaꞋamihena “NagaiꞋnige yane.” huꞋya ohunagi “MukiꞋa yana lagaiti ya hane.” huꞋya nehae. 45 Mopaene afenoꞋyaꞋamienema hanea veaꞋmoꞋya atalageno alu kanomoꞋa miya higeꞋya monea aliteꞋya fako hute hute huꞋya kaveꞋamima omalenea veala amaminae. 46 MukiꞋa kanafina nagoke amaku amakesa haviꞋya ala mono nopina neꞋuꞋya alu nopina alu nopina uꞋya hameꞋya maya kofa huꞋya kaveꞋene nete nete nehuꞋya muse huꞋya Anumaya Koti agia alisaga nehageꞋya mukiꞋa veaꞋnemoꞋya ageteꞋya “Kanale kava nehae.” huꞋya nehageno AnumayamoꞋa nago kanafina nago kanafina nagoꞋa veaꞋnea amaku amamena aligatiteno “Nagai ke nehaviya veaꞋene maiho.” huno humatene.

Copyright information for `KMU