Acts 21

PoloꞋa tipi kalefi viaꞋamo Yelusalemu ugahe humaine.

Amataleta tipi kalefi unaꞋamogata Kosi kumate mo faeteta lina takaeta Lotesi uvaꞋyi huta mo faeteta lina lakaeta Patala uvaꞋyi humainone. UvaꞋyi huta nagola hagelipi kalea agonana Fonisia kotega ugahe nehigeta ani lipi kalefi haisaga humaita umainone. NeꞋuta Saipalusi mogonana haoga laya kaiyaga hanegeta neꞋataleta Silia uta tipi kalemoꞋa afenoꞋyaga atalegahe higeta Taiya limo agegayalega lavi-mainone. Anile tatalegeta Yisasife haviꞋya amakupi malenaya anagafe momatiyeta ali falote huteta amakaiꞋene seveniꞋa (7) kana mainonageno Alu Aotage AvamuꞋmoꞋa hamapaigeꞋya haviteꞋya Polofena “Yelusalemua oꞋvuo.” huꞋya hapai-mainae. Hapaitageta amakaiꞋenema mauna kanamoꞋa haꞋnoma nehiana katega ugahe nehunageꞋya mukiꞋamoꞋya aꞋneꞋamiene nafaꞋneꞋamiene tavaleꞋya kumala ataleꞋya vageta ti agegayalega hanea kahaepate mo latalegahe hageta taleꞋya moyeta nunamu humainone. Nunamuna huteta hufalu fala humateta “Maiho.” humateteta tipi kalefi haisaga humaunageꞋya eteꞋya noꞋamilega emainae.

Sisalia kumategati nagola aune kanoa AgapusiꞋa Polona ke hapai-maine

Taili kumala ataleta Tolemesi uvaꞋyi huta Yisasife haviꞋya amakupi malenaya anagala hu falu fala huneꞋamateta amakaiꞋenena nagoke kana kanoꞋa mainone. Maita faeteta amataleta Sisalia uvaꞋyi huta Filipi nopi umainone. Ani FilipiꞋe kanomoꞋa Yisasi ke hamanepaiya kanogino Yelusalemu kave amamite amamite hisaya yafe hapaliꞋya humatenaya seveniꞋa (7) vayapiti kanogita ani kanoene umainone. Umainonageno ani kanomoꞋa foꞋa (4) vele omainaya munaꞋneꞋa mainayanagino Anumaya KotiꞋa avayafiti hamapaiya kea huꞋya amaune laga nehaya munaꞋneyaga mainae. 10 Mainageta lagaya anile tole lagufa kana mainonageno nagola Anumaya Koti aune kanoa AgapusiꞋe nehaya kanoa Yutiati elavi-vaꞋyi humaine. 11 Takaite evaꞋyi huno Polo amuꞋnofila melino agaiꞋa aiya ayate kisalu negino mage huno hie “Alu Aotage AvamuꞋmoꞋa mage huno nahapaiye ‘Yelusalemu mainaya Yuta vayaꞋmoꞋya ma kava huꞋya mani amuꞋnofiꞋmona nefana aiya ayate kisalu kiteꞋya vayaꞋmoꞋya haesageno falisiafe Yuta veaꞋne omainaya vayaꞋmogami amayapi ategahae.’ huno hikeꞋna haviteꞋna mani kavala me nehue.” huno humaine. 12 Higeta anima hia kea haviteta tagaiꞋene ani kumate veaꞋnene mage huta hapaune “Pologa museka nehunagi Yelusalemua ohaiyo.” huta hutenone. 13 Nehunana PoloꞋa mage huno humaine “NaꞋa higetama avia neꞋatetama nagu nagesa ali haviya nehae? Nagaya Anumayanimona Yisasi naguꞋa amitafa humainoafe nagaya nagesa talo tala huꞋna Yelusalemu haisugeꞋya natafa huꞋya nofipi nateteꞋya nahaesageꞋnama falisuana kanalele huꞋna nehue.” huno humaine. 14 Higeta haviteta kenonaꞋa haꞋopaita mage huta humainone “AnumayatimoꞋa havimaineanagino haisia kavala hisie.” huta humainone.

15 Ani kea huteta lagaya ali lalo tala nehuta Yelusalemu haimainone. 16 Haunana nagoꞋa Sisalia lafu-taganaꞋya tagaiꞋene haigeta Yelusalemua hai vaꞋyi hunageꞋya nagola Saipalusi kanomo agia NasoniꞋe agai notega tavaleꞋya vageta umainone. NasoniꞋa nayona Yisasi anagapi maineane.

PoloꞋa Yelusalemu hai vaꞋyi humaine.

17 Yelusalemua hai vaꞋyi hunageꞋya tafu-taganaꞋya tusi muse huꞋya ali falu fala hulateꞋya lavale-mainae. 18 LavaleꞋya vageta mo faeteta PoloꞋa tagaiꞋene Yemesi agegahe neꞋunageꞋya mukiꞋa soka vayaꞋyaga anile emainae. 19 Ageno PoloꞋa “Mainafio.” huno hu falu fala huneꞋamateno Anumaya KotiꞋma aya higeno Yuta vea omainaya veaꞋmogami amuꞋnopi ali-mainea aliꞋyafe hamapailama huno hamapaiye.

Kava vayaꞋmoꞋya Polofe “Ala mono nopi vuo.” huꞋya hapai-mainae.

20 PoloꞋma hia kea haviteꞋya Anumaya Koti agia alisaga huꞋya Polofe mage huꞋya hae “KasagoꞋya tauseniꞋa veaꞋmoꞋya Yisasife haviꞋya amakupi maleꞋya amametiti nehaya Yuta veapiti Yelusalemu mainaya veaꞋmoꞋya Mosese kahegi kema akave malesaya amaku amakesa humainae. 21 NehuꞋya kagayama mukiꞋa Yuta vea omainaya veapi mainaya Yuta vayaꞋmogamife ‘Mosese kahegi kea neꞋataletama nafaꞋnetamimogami amakoya anoꞋya laga ohutama nayoma Yuta vayaꞋmoꞋya mainaya auꞋava yana atale ho.’ huka humainana kehena hamapaigeꞋya ago havimainae. 22 Havimainagi kagayama evaꞋyi humainana kema havinuꞋya hisageta na kava hugahune? 23 Nago yafe kahapaigahe hunagi kahapaisuna kavala akave huo. FoꞋa (4) vayala Anumaya Koti aulagafina hulokiya vaiꞋya kea humalenaya vayala manile mainae. 24 Mainayanagika mukiꞋa vayaꞋmoꞋya kagaifema agoꞋma havimainaya kehema ‘Havige nehae.’ huꞋya hisayafena kagaife ‘Anumaya Koti kahegi kemo akave nemale.’ huꞋya hu-gatesayafena ani foꞋa (4) vayala amavaleka amakaiꞋenena Anumaya Koti aulagafina oniꞋyaꞋage yama omalesia kavala huka kagaikaꞋa monea miya hisanageꞋya amayolagefa laga humatesae. 25 Yuta vea omainaya veaꞋma Yisasife haviꞋya amakupi maleꞋya amametiti nehaya veaꞋmogamife tagaya nayona avona kaeta huhaꞋya gi-malenona kea mage huta humainone ‘Fali-mainaya veafe amakisana vaiꞋya atupa kave alisaga huꞋya malesaya kavela oneho. KolamoꞋa agusafinaga hanesia afuene kolaꞋenena oneho. AꞋne munaꞋne amavayu nehisaya yana ataleho.’ huta ago avona kaeta hamapai-mainone.” huꞋya humainae. 26 Hageno PoloꞋa faeteno ani foꞋa (4) vayala amavaleteꞋya amaugafaene amakuꞋaene sese nehaya kava huteꞋya ala mono nopi haigeno PoloꞋa mono nopi mainaya kava vayafe mage huno humaine “Laugafaene taguꞋaene Anumaya Koti aulagafina oniꞋyaꞋage otahaisia kava huta sese huteta maineta ma yupa eta tahaote tahaote Anumaya Kotina sipi sipia heta amigahune.” huno humaine.

Yuta vayaꞋmoꞋya Polona mono nopi atafa humainae.

27 Ani seveniꞋa (7) kanamoꞋa haꞋno hugahe nehigeꞋya nagoꞋa Esiati Yuta vayala elaviyaꞋamoꞋya PoloꞋa ala mono nopi mainegeꞋya megeteꞋya mukiꞋa alitalu humainaya veaꞋmogami amaipa ali haviya huꞋya ali hetimateteꞋya Polona atafa humainae. 28 Atafa huteꞋya mage hae “Isaleli vayaꞋmogata laya hiho. Ma kanomoꞋa mukiꞋa kumate vayaꞋmogamina mage huno humave-nelie ‘Isaleli vayaꞋene Mosese kahegi kene mono noꞋamiene afa yaꞋyaga hane.’ huno nehuno nagoꞋa Yuta vea omainaya vayala Kaliki kotegati vayala ma ma nagalu humalenea nopina amavaleno egeꞋya mani nona ali haviya nehageno oniꞋyaꞋage nehie.” huꞋya humainae. 29 NaꞋafene nago yupa PoloꞋa TalofimusiꞋene ala kumapi vaiyateti nehaꞋageꞋya age-mainayanagiꞋya TalofimusiꞋa Efesusiti kano maineanagiꞋya amakesafinaga havige nehuꞋya “PoloꞋa ani Yuta vea omainea kanoa tagaila ala mono notifi avaleno haimaine.” huꞋya havige humainae. 30 HageꞋya mukiꞋa ani kumate veaꞋmoꞋya ani kema haviya kemoꞋa amaipa ali hetigeꞋya amaiyayeꞋya molitalu huteꞋya Polona atafa huꞋya mono nopinagatila avayu vaye nehageꞋya ani mono nomo fitayaga mukiꞋa aliꞋya kimainae.

Lomu ati vayaꞋmoꞋya Polona Yuta vayaꞋmogami amayapiti movaleꞋya emainae.

31 Polona ago maiꞋya nehayageno Lomu ati vayate kava kanomoꞋa mukiꞋa Yelusalemu veaꞋmoya ke vaiꞋya tusiꞋa lu maiꞋya nehae huꞋya haya kea havimaine. 32 Haviteno ati kava vayaꞋaene ati vayaꞋyagaene amavalegeꞋya amaiyayeꞋya amakaite elaviꞋya ageꞋya ani vayaꞋmoꞋya ala kava kanoene ati vayaꞋaene ageꞋya ageteꞋya Polona nagoꞋene ohaeꞋya ataleꞋya mainae. 33 AtaleꞋya mainageno ati vayate kava kanomoꞋa Polona metafa huno “Tole seni nofiteti aiya ayate kisalu kiho.” huno nehuno alitalu humainaya vayafe mage huno hamavige “Mani kanoa taꞋe? Hana augafa havi kava higetama ani kavala nehae?” huno hamavige-maine. 34 HamavigegeꞋya nagoꞋa vayaꞋmoꞋya nagoꞋa kea nehageꞋya nagoꞋa vayaꞋmoꞋya alu kea nehageꞋya maiꞋya tusiꞋa keyeso haya kemona aepaꞋa havilama ohuno ati vayaꞋmogamife mage hie “Lagaiti lokiyaꞋage nopinaga avaletama viho.” huno humaine. 35 HigeꞋya mukiꞋa veaꞋmoꞋya amakave keyeso hume hume neꞋuꞋya mage hae “Haesageno falisie.” huꞋya hume hume neꞋvageꞋya ani nomo fiate avaleꞋya vageꞋya mukiꞋa vayaꞋmoꞋya tusiya huꞋya tu hisaya kava hayakehe ati vayaꞋmoꞋya Polona avalesaga huꞋya anale avaleliꞋya umainae.

PoloꞋa agaiꞋa ametiti yamo aepaꞋa hu falote huno hamapaimaine.

37 Ati vayaꞋmoꞋya tokiyaꞋage nopinaga avaleꞋya haigahe nehageno PoloꞋa ati vayate kava kanomofe mage huno humaine “Nago kea kahapaigahe nehuana kanalepio?” huno havigegeno ati vayate kava kanomoꞋa mage hie “Kagaya Kaliki kea havilinano? 38 Kagaya Isipiti kanogika mukiꞋa vayafena ‘Kamani vayaꞋene tu hugahune.’ huka huteka tu huge huge nehaya vayala fo tauseniꞋa (4,000) vayala kaꞋme kotega amavaleka umainana kano mainane huꞋna nagesa nehavugi kagaya ani kano mainapio?” huno havige. 39 Higeno PoloꞋa mage huno humaine “Nagaya Yuta kano mainoe. Silisia kotega agi hanea kumala Tasusie kuma aepaꞋnia hane. Museka nehugi nagaya alitalu humainaya veaꞋmogamina nago kea hamapaisufio?” huno havige-maine. 40 Havigegeno “Kanalelagi hamapaiyo.” huno higeno PoloꞋa ani nomo fiate heti-maineno kema aepa hegahena “AfaꞋa maiho.” huno ayana alisaga higeꞋya alitalu humainaya vayaꞋmoꞋya kea ohuꞋya mainageno PoloꞋa amakaiꞋami kea Hipalu kefiti Yuta vayaꞋmogamina hamapai-maine.

Copyright information for `KMU