Acts 24

Yuta kava vayaꞋmoꞋya Filikisi aule Polona kaiyeke hutenae.

FaefuꞋa (5) kanamoꞋa haꞋno higeꞋya mono nopi hagote kava kanomoꞋa AnanaiyasiꞋene nagoꞋa vayatamaene nagola ke havino fatago nehia kanoa TetulusiꞋene Sisalia elaviꞋya emaineꞋya Polona kaiyekema hutegahe haya kea ala Kamani kava kanomona hapaimainae. Hapaigeno haviteno Polofe ke higeno egeno TetulusiꞋa aepa heno Polona kaiyekea huneꞋateno mage huno hie “Kanale Kamani kava kanomoga Filikisigae kagayama kava yagai-mainanafena tagaya kanaleꞋya huta yuna heta mainonageka kasagoꞋya kanale kavakeꞋya huka kasagoꞋya kumateꞋma laya hisana kea hanageta aluya huta musekaꞋa humainonane. NagoꞋa kene hugahe huanagi amusekaꞋa nehunagi menima kahapaisuna kea osi kea havio. Tagayama agonana ma kanoa PoloꞋe tusiꞋa havi kavaꞋyaga nehuno mukiꞋa kumate Yuta veaꞋmogami amuꞋnoꞋamifina hetino ke vaino tu hisaya ke hamanepaino Nasaleti Yisasi kema nehaviya veaꞋmogami ala kanoꞋami maine. Maineno tagaiti ala mono nopi hilato ohunea kava hugahe hianagi mo-tafa huta tagaiti kahegi keleti kaiyekea hutegahe hunanagi ati vayate ala kava kanoa LisiasiꞋa eno tokiyaꞋaleti tayapiti mevaleno umaine. Avaleno emainegi kagaya havigeteka kaiyekema hutesanana mukiꞋama humainona kea agaiꞋa avayafiti aepaꞋa hinageka havigane.” huno humaine. HigeꞋya Yuta vayaꞋmoꞋyaenena “Tamage nehie.” huꞋya nagoꞋene Polona kaiyekea hutenae.

PoloꞋa Filikisitela kea huhaleno humaine.

10 Ala Kamani kava kanomoꞋa Polofe “Kaiyeke huo.” huno ayateti avameꞋname higeno PoloꞋa mage huno humaine kagaya ayaꞋaya kafufima ani nofi vayatela kaiyekema humatenana yafena haviꞋna kolia nohue. Naipa kanale yapiti kenonakalela kahapaisue. 11 Hama-vigesanana kahapaisageka havigane nagaya ayaꞋaya kanagefa Yelusalemua haiꞋna omainogi tuelufuꞋa (12) kana kanoꞋa Anumaya Koti agi alisaga hugahe Yelusalemua haiꞋna mainoe. 12 HaiꞋnama mauvana nagaya ala mono nopi maineꞋna nagoꞋa vayaꞋenena kea oꞋvainoe. “Nagaitela veala melitalu hiho.” huꞋna ohunoe. Mono noꞋyagafiꞋene ala kumapiꞋenena ani kavala hugeꞋya onagenae. 13 Onagenagi menia kaiyekema hunenataya kemona ma vayaꞋmoꞋya “Tamage nehune. Age-mainonanagita aepaꞋa kahapaigahune.” huꞋya hisaya keꞋamia omalegeꞋya nehae. 14 Nehagi nago yafe kea hu-falote huꞋna kahapaisue. Amakayama “Alu kategae.” huꞋya nehaya kama, Yisasi kema nehaviya veaꞋmoꞋya akave nehaya kana, taginagomoꞋya neꞋvaya kate neꞋuꞋna Anumaya Koti agia alisaga nehuꞋna mukiꞋa kahegi kene Anumaya Koti amaune vayaꞋmogami kene haviꞋna nagupi malenoe. 15 Nagupi malenogi amakayama haya kea “Anumaya KotiꞋa fatago huꞋya maineꞋya fali-mainesaya veaꞋnene kefo kava huteꞋya fali-mainesaya veaꞋnene ali hetimategahie.” huꞋna nametitia nehue. 16 Ani yafe Anumaya Koti aulagaleꞋene veaꞋmogami amaulagaleꞋene hilato ohunea kavala ohuꞋna fatago huꞋna maisua yafe kava yagaiꞋna nemauvane.

17 MainoanagiꞋna ayaꞋaya kafua alule mainoanagi menia Yuta nafuꞋnaganagamina nagoꞋa mone amamisuafene huꞋna Anumaya Koti muse yaꞋene amigahe Yelusalemua hai-mainoe. 18 Naugafaene naguꞋaene sese huteꞋna ala mono nopi haiꞋna amiteꞋna mainogeꞋya nage-mainae. NagaiꞋenena nagoꞋa vayala me-litalu huꞋya keyesoa ohageꞋna mainoe. 19 Mauvanagi nagoꞋa Esiati Yuta vayaꞋmoꞋya eꞋya me nage-mainae. Amakayake nagaifena “Havi kava nehie.” huꞋya humainaya ke kagai kaulagale me hunateho. 20 OmesageꞋyahena ma ma mainaya vayaꞋmoꞋya nagayama Kanisole vaya amauleꞋma heti-mainoa yupa “Havi kava humaine.” huꞋya humainesaya yafena me kahapaiho. 21 Kahapaigahagi nagaya ma yamaꞋage amakai amuꞋnoꞋamifina hetiꞋna humainoe “VeaꞋma fali-mainesafitila hetigahae.” huꞋna humainoa keleti meni kanafina kaiyekea hu-nenatae huno humaine.

22 Higeno FilikisiꞋa Yisasi kema nehaviya veaꞋmoꞋya haya kea havimaineanagino mage huno hie “Haile. Ati vayate ala kava kanoa LisiasiꞋa elavino esigeꞋna kaiyeketamia fatago hulamategahue.” huno humaine. 23 Huteno ati vayate kava neꞋyagaiya kanomofe ke higeno egeno mage hie “Polona avaleka nofi nopina mo hutegananagi tokiyaꞋage huka nofila hu oꞋateka atalenegeꞋya nefuꞋya kavela afaꞋa memiꞋya aya hisae.” huno humaine.

FilikisiꞋa Polona tole kafu nofila hutene.

24 NagoꞋa kanamoꞋa haꞋno hutegeno FilikisiꞋene aꞋamoꞋa Yuta ale agia TalusilaꞋene aꞋageno FilikisiꞋa Polofe ke higeno eno Yisasi Kalaisife haviꞋya amakupima maleꞋya amametiti nehaya kea mehanapai-maine. 25 Mage huno hanapaiye “Fatago hutana mainetana tanaku tanakesale kava yagai hetofa hutana maiꞋo.” Anumaya KotiꞋa haenagama kaiyeke humatesia ke nehigeno FilikisiꞋa koli nehuno mage huno humaine “Haile. Menia nenataleka eteka vuo. Haenaga aliꞋyaniꞋa omalesigeꞋna nagoꞋene kekaꞋa havigahue.” huno humaine. 26 Nehuno agesa mage huno havie “Poloma atalesugenoꞋa nagoꞋa mone namisifi?” huno agesa nehavino mukiꞋa yupa agaifena ke higeno egeꞋana kaiyekea huꞋana mainaꞋe.

27 Hume neꞋaꞋageno tole kafumoꞋa haꞋno hutegeno Filikisi aliꞋyateꞋma anonaꞋa alimainea kava kanomo agia Polisiusi FesatusiꞋe. FilikisiꞋa masave ageꞋaino “Yuta vayaꞋmogamina hamaisia kava hugahue.” huno Polona nagoꞋene nofi nopina atalegeno maine.

Copyright information for `KMU