Acts 25

PoloꞋa “Ala Kamani kanoa Sisafe keꞋnia havisie.” huno ke humaine.

FesatusiꞋa yagaisia kotega ago evaꞋyi huno tagufa (3) kana maiteno Sisaliati Yelusalemu haimaine. HaigeꞋya mono note kava vayaꞋene Yuta kava vayaꞋene Polofena “Havi kava humaine.” huꞋya hapaiteꞋya mage hae “MusekaꞋa nehunagi taya huka Polona hutegeno Yelusalemu eno.” huꞋya humainae. Amakaya katega kafo maleneꞋya haesageno falisia amakesaleti humainae. Hageno FesatusiꞋa mage huno humaine “PoloꞋa Sisalia nofi nopi mainegeꞋna nagaya osi kana kanoꞋa maiteꞋna anilega ugahe nehugi tamakaitami kava vayaꞋmogatama nagaiꞋene tavi-mainetama agaya havi kavaꞋma humainesiana kaiyekea mo hutegahae.” huno humaine.

FesatusiꞋa eitiꞋa (8) kanao teniꞋa (10) kanafiga Yelusalemua maiteno eteno Sisalia lavino faeteno koꞋma neliana kaiyekema havi nopi umaineno mage hie “Polona avaletama eho.” huno humaine. Kema higeno egeꞋya Yelusalemuti emainaya Yuta vayaꞋmoꞋya avaꞋale maigagi maineꞋya “TusiꞋa havi kava humaine.” huꞋya kaiyekea hutayanagi nagoꞋa aepaꞋa tamage huꞋya hu falote huꞋya haopainae. Haopaigeno PoloꞋa mage huno hie “Nagaya nagoꞋa Yuta veaꞋmogami kahegi kene ala mono nopiꞋenena Lomu ala kava kanoa SisaꞋene ali-haviyana huoꞋatenoe. Tamage huꞋna nago kanomona havi kavala huoꞋatenoe.” huno humaine.

Hianagi FesatusiꞋa masave age aino “Yuta vayaꞋmogamina hamaisifa kava hugahue.” huno Polofena mage huno havige-maine “Kagaya kanale Yelusalemu haisanageꞋna anilega haiꞋna kaiyekekaꞋa haviꞋna fatago hugatesufio?” huno havige-maine.

10 Higeno PoloꞋa mage huno hie “Menima SisaꞋa kaiyeke nehavia nopi heti-mainesugeka anile kaiyekeꞋnia haviteꞋasine huꞋna nehue. Kagaya ago havilinane nagaya Yuta vayapina nago kanomona havi kavala huoꞋatenoe. 11 NahaesageꞋna falisua kefo kavaꞋma humainoleꞋasina kanalelagiꞋna faluleꞋasinagi manima hunataya kaiyekemoꞋa tamage huno aepaꞋama omalesigekahena amayapina onateganagi ala kanoa Sisa ayapi natesanageno ani kaiyekea hunatesie huꞋna nehue.” huno humaine. 12 Higeno FesatusiꞋa agaiꞋa Kanisole vayaꞋene kea kea huteno mage hie “SisaꞋa kaiyekea hunatesie huka hanafe Sisatega ugane.” huno humaine.

FesatusiꞋa Polofe Yuta vayaꞋmogami ala sauve kanoꞋamia Agalipana havige-maine.

13 NagoꞋa kanamoꞋa haꞋno hutegeno ala sauve kanoa AgalipaꞋene asaꞋamoꞋa PeniasiꞋene Fesatusina hu falu fala hutegahe Sisalia evaꞋyi humainaꞋe. 14 EvaꞋyi huteꞋana ayaꞋaya kanagefa mainaꞋageno FesatusiꞋa Polo kaiyekea sauve kanoa Agalipana hanepaino mage huno hie “FilikisiꞋma mainea kanafina nago kanoa nofi nopi mainegeno FilikisiꞋa anifi ataleno umaine. 15 UmaineanagiꞋna Yelusalemu haiꞋna mainogeꞋya mono note kava vayaꞋene Yuta kava vayaꞋene agaifena nahapaiꞋya ‘Kaiyekea huteteka hanageke yana amio.’ huꞋya humainae. 16 HageꞋna mage humainoe ‘Tagaya Lomu vayaꞋmogata ma auꞋava kava nehunane. Nago kanomoꞋa kaiyeke hutesia vayala amaule mainesageꞋya kaiyekea hutetesageno anonaꞋamile ‘Kagaya kaiyekema hugataya kea huo.’ huta hagoteta hisunageno hinageta haviteta fatago hugahune huta humainonane.’ huꞋna hamapai-mainoe.

17 HugeꞋya male melitalu huꞋya mainageꞋna faeteꞋna aupaꞋa kaiyeke humate nopi uꞋna ‘Polona avaletama eho.’ huꞋna humainoe. 18 HugeꞋya kaiyekema hutaya vayala hetiꞋya aepa heꞋya agaila kaiyekea hutayanagi ‘NaꞋa kefo kavala humaine.’ huꞋna nagesama havua kefo kavafena ohunae. 19 Ohunagi amakaiꞋami monoꞋamihekeꞋya agaiꞋenena ke neꞋvaiꞋya nagola fali-mainea kanoa, YisasiꞋe, kanomofe, PoloꞋa ‘Ani kanoa afaꞋa hetino maine.’ huno higeꞋya ke vai-mainae. 20 HigeꞋna ‘HanaꞋa huꞋna ani kemo aepaꞋa haviꞋna fatago hisue?’ huꞋna huteꞋna mage huꞋna havige-mainoe ‘Kanale Yelusalemua haisanageꞋna kaiyekekaꞋa haviteꞋna fatago hugatesufio?’ huꞋna havige-mainoe. 21 Havigogeno PoloꞋa ‘Mainesugeno ala kava kanomoꞋa kaiyekeꞋnia havisie.’ huno higeꞋna ‘Kanalelagi nofi nopi atesugeno mainesigeꞋna Sisate hutegahue.’ huꞋna humainoe.” huno hie. 22 Higeno AgalipaꞋa Fesatusife mage huno humaine “Nagaya ani kanomo kea havigahue.” huno higeno “Kanalelagi egamaga keꞋa havigane.” huno humaine.

23 HigeꞋya mo faeteꞋya kotigeꞋya Agalipagani Penaisigania kanale konagali kena faiteꞋana kaiyeke havi nopi vaꞋageꞋya ati vayate kava vayaꞋmoꞋyaene ani kumate kava vayaꞋmoꞋyaene tokaeꞋya ani nopi hai-mainageno FesatusiꞋa Polofe ke higeꞋya avaleꞋya emainae. 24 Ageno FesatusiꞋa mage huno humaine “Ala Sauve kanomoga, Agalipagaene mukiꞋa melitalu humainaya vayaꞋene haviho. Ma ma agaya kanomofe mukiꞋa Yuta vayaꞋmoꞋya Yelusalemuene ma kumateꞋene maineꞋya tokiyaꞋage kefiti mage huꞋya nahapaiye ‘Mani kanoa kaiyeke huteka haegeno falino.’ huꞋya ala kefiti humainae. 25 HageꞋna nagayama agoana mani kanomoꞋa nagola falisia kefo kavala ohune huꞋna hugeno PoloꞋa ‘Lomu ala Sauve kanomo kaiyekeꞋnia havigahie.’ huno higeꞋna ‘Kanalelagika ugane.’ huꞋna humainoe. 26 Huanagi ani kanomoꞋa falisia kefo kavaꞋma humainea kemoꞋa omalegeꞋna ‘Na keleti kaiyekea huto.’ huꞋna ala Sauve kanomotega autaꞋma kaesugeno visia keꞋnia omalegeꞋna tamakaite avaleꞋna neꞋogi ala kava kanomoga Agalipaga mani kanomo kaiyekea havilama huka havisanageꞋna avona kaeꞋna atalesue huꞋna tanakaite avaleꞋna neꞋoe. 27 Nagaya havuana nofi kanoa hutesugeno vinageꞋna kaiyekema hutesaya kema kaeꞋna oꞋamisuana haviya hugahie huꞋna nehue.” huno humaine.

Copyright information for `KMU