Acts 26

PoloꞋa agaiꞋma kaiyekema hutaya kea huhaleno Agalipana hapai-maine.

AgalipaꞋa Polofe mage huno hapaiye “Kagaya kekaꞋa huo.” huno higeno PoloꞋa ayana haꞋya huno kaiyeke hutea kenonaꞋa mage huno humaine.

Agalipaga, ala sauve kanomogae, menia kagai kaule hufalote huꞋna Yuta vayaꞋmoꞋyama kaiyeke hunatenaya kemo anonaꞋa hisua yafena muse nehue. Yuta vayaꞋmogatama nehuna kavaꞋene ke neꞋvauna aepaꞋa kagaya ago age-mainanafene huꞋna tusiꞋa muse nehue. NaꞋa humainanafe musekaꞋa nehugi kagaiteꞋma hisua kehena kasalola okahaenageka ako huka maineka havio.

NafaꞋnema mainolegati Silisia mainoanagiꞋna haenagaꞋa Yelusalemuma elavi-mainoana ani nofi veamoꞋya kama vai-neꞋayoa yana Yuta veaꞋmoꞋya nage-mainae. Nayona nagaya Falasia vayaꞋmogami kahegi kema akave malogeꞋya nage-mainaya yafema kahapaisugeꞋyahena ani kea kahapaigahae. Kahapaigahagi nayoma taginagomogamifema Anumaya KotiꞋa “Nago yana hulamategahue.” huno hulokiya vai-malenea keleꞋma nametiti hua yateti menia kaiyekea hunatageꞋna heti-mainoe. Anima hulokiya vai-malenea kelefena mukiꞋa tuelufuꞋa (12) Yuta nofi veaꞋmoꞋya amametitia nateꞋene kegeꞋene ani yama hulatesiafene huꞋya Anumaya Koti agia ayeme ayeme neꞋvae. NeꞋvageꞋna Agalipaga, ala sauve kanomogae, nagaya aniꞋa huꞋna nametiti hua yateti Yuta vayaꞋmoꞋya kaiyekea maiꞋya hunenatae. NaꞋa higetama nagaya “Anumaya KotiꞋa fali-mainaya veala ali hetimatene.” huꞋnama hua kehena “Havige nehie.” hutama nehae?

Nayona nagaya “Nasaleti Yisasi agia aliꞋna mopafi atalesugeno lavisie.” huꞋna alu kava alu kavala humatenoe. 10 Mono note kava vayaꞋmoꞋya “NaꞋama huo.” huꞋya hunatageꞋna Yelusalemu maineꞋya Yisasina amakuꞋa amitafa humainaya veaꞋmogamina amavaleꞋna nofi mo humatenogeꞋya kaiyekema humataya yupa “HamaegeꞋya faliho.” huꞋna humainoane. 11 Yisasi veaꞋmogamina “Kalaisifena kamuge hatagetama vaimateho.” huꞋna nehuꞋna kasagoꞋya mono nopi kaꞋyona mo neꞋamamiꞋna nahai-vaiꞋna Yuta veaꞋne omainaya vayaꞋmogami kumapina moli-haviya huneꞋamatoane.

PoloꞋa agaiꞋa Yisasina aguꞋa aiyahae huno aminea keꞋa humaine.

12 Ani kava hisuafe ala mono note kava vayaꞋmoꞋya hunatageꞋna Tamasigusi ugahe umainoe. 13 Ala Sauve kanomogae, yagemoꞋa amuꞋnokaꞋno higeꞋna katega nehaugeno ikapinagati tusiꞋa vasa yamoꞋa, yagemona agaseno ala yakefa, huno aivasa higeꞋna age-mainogeꞋya nagaiꞋma navagi hageta hauna vayaꞋene aivasa lahau-maine. 14 Higeta lagaya mopafi asaga hu-lavita tagoꞋya aye-maineta havugeno Yuta vayaꞋmogami kefiti mage hie “Sologae Sologae naꞋa higeka nagaila ali haviya nehane? AniꞋama hanana avela hanegeno kagaikaꞋa kagata neꞋaiye.” huno humaine. 15 HigeꞋna mage huꞋna hue “Ala kanomogae kagaya lagae?” huꞋna hugeno mage hie “Nagaya YisasiꞋnae ali-haviya maikama hunatana kanomoꞋnagi hetio. Kagaila hugatesugeka nagai aliꞋyana alika nagaiꞋma nagana yafeꞋene haenagama kavelisua yafeꞋene hamapaisanafene huꞋna kagaitela evaꞋyi nehue. 17 Nehuafe Yuta veaꞋne omainaya veaꞋmogamitega hugategahugi haenagama ali haviya hugatesaya Yuta vayapitiꞋene Yuta veaꞋne omainaya vayaꞋmogami amayapitiꞋene kavaleꞋna kaugafa aligatigahue. 18 Yuta veaꞋne omainaya veaꞋmogamina asuma humainea amaulaga alika kaligali humatesanageꞋya haniki-mainea yapima mainaya yana neꞋataleꞋya amakuꞋa aiyahae huꞋya vasa yapi maisaya yafe hunegatoe. Satani kava yagai-mainea yapina neꞋataleꞋya amakuꞋa aiyahae huꞋya Anumaya Koti kava yagai-mainea yapi maisaya yafe hunegatoe. Nagaife haviꞋya amakupi maleꞋya amametiti hisageꞋna kefo yaꞋamia aigeꞋamateꞋna atalemateteꞋna alu aotage anagaꞋniene amavaleꞋna amatesugeꞋya maisae huꞋna hunegatoe.” huno humaine.

PoloꞋa agaiꞋama Yisasi kema hamapaino vaiye-mainea kavafe Agalipana hapai-maine.

19 Agalipaga, ala Sauve kanomogae ani kema higeꞋna ikate age-mainoa yafenagiꞋna akave malenoe. 20 HagoteꞋna Tamasigusi uteꞋna anileti Yelusalemua uaꞋyamoꞋna anileti mukiꞋa Yutia kotega ute ete huꞋna Yuta veaꞋne omainaya veateꞋene mage huꞋna hamapai-mainoe “Kefo yatamia neꞋataletama tamakuꞋa aiyahae hutama Anumaya Kotitega etama kanale auꞋava yana hisageꞋya tamakuꞋama aiyahae hisaya yana agesae.” huꞋna hamapai-mainoe. 21 Mani kema hamapai-mainoa keleti ala mono nopi mainogeꞋya Yuta vayaꞋmoꞋya natafa huꞋya nahaesageꞋna falisua kavala hunatenae. 22 Hunatenagi Anumaya KotiꞋa mukiꞋa yupa naya higeꞋna menia hetiꞋna maineꞋna ala kava vayaꞋene osi vayaꞋenena tamahanepauve. MoseseꞋene Anumaya Koti aune vayaꞋene “NaꞋa yana maꞋa yana falote hugahie.” huꞋya humainaya keꞋage hamapai-mainoe. 23 Mage huꞋya humainayane “Anumaya KotiꞋma taugafa aligatigahema hutenea kanomoꞋa augafa agata aisigeno faligahie. Fali-mainesifiti mukiꞋa veala amakaseno uhagote-lamateno hetiteno hale yamaꞋa hanesia kea Yuta veaꞋnene Yuta veaꞋne omainaya veaꞋnene hamapaigahie.” huꞋya humainayane huno humaine.

PoloꞋa Agalipafe “Anumayafena havika kagupi maleka kametiti huo.” huno hapaimaine.

24 PoloꞋa na ke higeno FesatusiꞋa ala kefiti mage huno hie “Pologae aifoꞋnafo ke maika nehanagi alu avo alu avoma maika nehapalina yaꞋyagamo aifoꞋnafo kavala hugatene.” huno humaine. 25 Higeno PoloꞋa mage huno hie “Fesatusigae, ala kava kanomogae, aifoꞋnafo kea nohugi kelamage nehue. 26 Nehugi nagayama hua kemoꞋa ala Sauve kanomoga Agalipagae havilinanageꞋna hufalote huꞋna nehue. Nagaya havuana mukiꞋa ani kavala falakiꞋya ohunagi ani kavala ago age-mainane. 27 Ala Sauve kanomoga, Agalipagae, kagaya Anumaya Koti amaune vayaꞋmogami kea ago havika kagupi maleka kametiti nehano? E, kagupina ago alika malana yana nagaya ago havilinoe.” huno hapaiye. 28 Higeno AgalipaꞋa mage huno hie “Menima hana keleti aupaꞋa nagaya Yisasife haviꞋna nagupi malegahue huka nehano?” huno humaine. 29 Higeno PoloꞋa mage huno hie “Aupa kana kanoꞋafi ayaꞋaya kana mainesanano nagaya hua augafa kava huka Yisasife havika kagupi malesanafe Anumayamotega ke huꞋna havi-negoe. KagaifekeꞋya mani kea nohugi mukiꞋa ma kanaleꞋma maineꞋya nagai kema nehaviya veaꞋnenefe nagaya mainoa augafa kava huꞋya maisae huꞋna Anumayamotega havinegogi nofipi maisaya yafena nonahaiye.” huno humaine.

30 HigeꞋya ala Sauve kanoa AgalipaꞋene nago kava kanoa FesatusiꞋene PenaisiꞋene amakaiꞋenema mainaya veaꞋnemoꞋya hetiꞋya alule umaineꞋya kea kea mohu mehu huteꞋya mage hae “Mani kanomoꞋa nofila huteteꞋya haesageno falisia augafa kefo kavala ohune.” huꞋya humainae. 32 Hayanagi AgalipaꞋa Fesatusina mage huno hapaiye “Mani kanoa, PoloꞋe, ‘SisaꞋa kaiyekeꞋnia havisie.’ hunoꞋma ohuneleꞋasina ‘Nofipitila atalegeno vino.’ huꞋna huleꞋasine.” huno humaine.

Copyright information for `KMU