Acts 5

Ananaiyasigani Safailagania Anumaya Koti aufina havige humainaꞋe.

Nago kanoa AnanaiyasiꞋe aꞋamo agia SafailaꞋe ani alavelatamogania nago mopaꞋania alu kano neꞋamiꞋana mone ali-mainaꞋe. AliteꞋana AnanaiyasiꞋa kesi nagoꞋa monea agaiꞋa alino fala-kigeno aꞋamoꞋa anima alia monea ago age-maine. AnanaiyasiꞋa nagoꞋa monea alino Aposolo vaya momamine. Amamianagi PitaꞋa agaifena mage hie “Ananaiyasigae SataniꞋa* kefo kagu kagesa kamigeka kagaya ‘MukiꞋa monea mama hane.’ huka nehanagi nagoꞋa monea ali fala-negika Alu Aotage AvamuꞋmofena havige huka ayevataga nehane. Mani mopa kagaika mopagika ‘Alu kanomo alisie.’ huka monea neꞋalika aniꞋa huka kagaika monegi naꞋa higeka ‘Havigea huꞋna ayevataga hugahue.’ huka kagu kagesafinaga nehane? VayaꞋmona ayevataga ohunanagi Anumaya Koti ayevataga humainane.” huno nehie. Higeno AnanaiyasiꞋa ani kea haviteno ailakatino fali-maine. FaligeꞋya neyaꞋvemoꞋya nago kena moliꞋya haꞋya kiteteꞋya aliꞋya komufi mo hevaitenae. HevaitetageꞋya ani kanoma fali-mainea kea mukiꞋa veaꞋmoꞋya haviteꞋya tusiꞋa lagi tagiꞋya amake-mainae. HaenagaꞋa taliꞋa (3) aova haꞋnoma nehiana aꞋamoꞋa ani fali-mainea kea ohavino egeno PitaꞋa agaife mage hie “Manima hanea monea mopaletila hai ani kanoꞋa ali-mainaꞋo?” huno higeno “Tamage ani kanoꞋa al-imainoꞋe.” huno humaine. Higeno PitaꞋa mage huno hie “NaꞋa higetana tanakaya tokaetana kea hutetana ‘Alu Aotage AvamuꞋmona ayevataga hugahuꞋe.’ hutana haꞋane? Agego anaukamoma agoꞋma aliꞋya mo hevaitaya vayala eteꞋya fiate me heti-maineꞋya kagaiꞋenena falisanageꞋya aliꞋya mo hevaigategahae.” huno humaine. 10 Nehigeno aupaꞋa ani aꞋmoꞋa Pita aiyafi ailakatino agoꞋya faiteno faligeꞋya neyaꞋveyagamoꞋya haiꞋya mogayana ani ala ago fali-mainegeꞋya moliꞋya anauꞋamoma hevaitale mo lokaeꞋya hevainatenae. 11 HevainatageꞋya Yisasina amakuꞋama aminaya veaꞋene mukiꞋa ani kema haviya veaꞋmoꞋyaene tusiꞋa lagitagiꞋya amake-maine.

Tokiya avame yaꞋyaga alu ya alu ya humainae.

12 Aposolo vayaꞋmoꞋya mukiꞋa vea amuꞋnopi kasagoꞋya tokiya avame yaꞋyaga hageꞋya age-mainae. AgeteꞋya Yisasina amakuꞋama aminaya veaꞋmoꞋya nagoke amaku amakesale maineꞋya ala mono nomo haupale yasi alisia ya ayekalo humalenea nomo agia Solomoni none ani nopi mukiꞋa kanafina molitalu humai humai nehayane. 13 NehageꞋya nagoꞋa veaꞋmoꞋya kolima haya yafe amakaiꞋenena mo lokaeꞋya uomainagi ani veaꞋmogami amaki alisaga humainae. MukiꞋa veaꞋmoꞋya Yisasi kema haviꞋya amakupi maleꞋya amametitia huteꞋya amakaiꞋene mainae. 15 Tokiya avameꞋyama humainea yafe mukiꞋa kalima hamaeya veala amavaleꞋya kate amateꞋya hagifanale maineꞋya mage hae “PitaꞋma esiana agai amemo me halatu hamaesigeno kanale humategahie.” huꞋya kate momatenae. 16 AmatageꞋya mukiꞋa veaꞋmoꞋya Yelusalemu aupateꞋma hanea kumaꞋyagaleti kalima hamaeya veaꞋnene Satani avamuꞋmoꞋma amakupi fale-mainea veaꞋnene amavaleꞋya ageno mukiꞋa ago alino kanale humatene.

Aposolo vayala amavaleꞋya kina nopi amatenageno ensole kanomoꞋa memavaleno kumatega amatene.

17 Mono noteꞋma hagote kava kanomoꞋene agaiꞋenema lokaeꞋya mainaya vayaꞋene Satiusi vayaꞋmoꞋyaene amaipa haviya humateteꞋya Aposolo vayala amatafa huꞋya amavaleꞋya kina nopi momatenae. 19 Amatenageno ani kegela Anumayamo ensole kanomoꞋa eno fita me yakino anifiti amavaleno kumatega neꞋuno mage huno hie “Tamakaya utama ala mono nopi hetitama veaꞋmoꞋyama haegafa huꞋya agola maige maige hisaya hamaimula alisaya kea hamapaiho” huno humaine. 21 HigeꞋya haviteꞋya natekefafi hetiꞋya uꞋya ala mono nopi veaꞋmogamina mo hamanepaiye. Hamanepaigeno ala mono note hagote kava kanomoꞋene agaiꞋenema lokaeꞋya nemaiya vayaꞋene ani kea ohaviꞋya neꞋataleꞋya Kanisole vayafeꞋene Isaleli nofi vayatamaenefe moge hageꞋya ageno ati vayafe “Kinama humatenona vayala momavaletama eho.” huꞋya hamapaimainae. 22 Me hageꞋya ati vayala kina nopi mogayana omaigeꞋya neꞋataleꞋya eteꞋya mage mo hae “Tagaya mogonana fita tokiyaꞋage alokileti hemaleneꞋya vayala kava yagaiꞋya kumate hetimainageta fita mo yakiteta kina nopima mogonana omainae.” huꞋya me humainae. 24 MehageꞋya ala mono note kava vayaꞋyagaene mono note ati kava kanoene mani kea haviteꞋya tusiꞋa amakesa havi havi huꞋya mage hae “HanaꞋa huꞋya kina nopitila fanane humainae? HanaꞋa humainea ya falote hugahie.” huꞋya hae. 25 Hageno nago kanomoꞋa mage huno me hamapaiye “Haviho kina nopima amataya vayala ala mono nopi hetiꞋya maineꞋya veaꞋmogamina humave-neliye.” huno me hie. 26 Me higeꞋya mono note ati kava kanomoꞋene ati vayaꞋaene uꞋya “Havigu amakai kema havimainesaya veaꞋmoꞋya yafateti tahaesageta falisunagi.” huꞋya amaikootiꞋya ako huꞋya amavaleꞋya emainae.

Aposolo vayaꞋmoꞋya kolia ohuꞋya kanisole vayaꞋmogami amaufina kea hufalote humainae.

27 AmavaleꞋya ayaꞋamoꞋya Kanisole vaya amuꞋnopi me hetimatetageno ala mono note hagote kava kanomoꞋa mage huno hie. 28 “Tagaya Yisasife nagoꞋene veaꞋmogamina hamapaitama humaveotiho” huta tamakaila tamaumonola ago malonanagi tamakaya mukiꞋa Yelusalemu nemaiya veaꞋmogamina mani kea hamapaitama tagaifena ‘Ago Yisasina hae-malenaya vaya mainae.’ hutama hamapai-mainae.” huno hie. 29 Hianagi PitaꞋa nagoꞋa Aposolo vayaꞋene mage huꞋya nehae “Ma mopafi vayaꞋmogami kemona akave omalegahunagi tagaya Anumaya Koti kemo akave malegahune. 30 Tamakaya Yisasina nagoke yafaga yosale asai-malageno fali-maineanagi Tototimo Anumaya KotiꞋa fali-mainefiti ago ali hetitene. 31 Ali hetiteteno avalesaga huno tamaga ayatega ategeno hagote kava kanoa tagu tamema aligatimainea kanoene mainea yafe tagaya Isaleli veaꞋmogata taguꞋa aiyahae hisuna tagesa tamisigeta taguꞋa aiyahae hisunageno aigetateno kefo yatia atalelategahie. 32 Tagaya mani kea hisuna vaya mainonageno Alu Aotage AvamuꞋmoꞋa aniꞋa huno mani kea humaine. MukiꞋa Anumaya Koti kema akave malenaya veaꞋmogamina Anumaya KotiꞋa Alu Aotage Avamula ago amamine.” huno hie. KamalieliꞋa kanisole vayaꞋmofe mage huno hie “Aposolo vayaꞋmogamina ako hutama amateho.” huno humaine. 33 HageꞋyama mani kema haviya yafe amaipa amakata aiꞋya Aposolo vayala hamaesageꞋya falisaya amakesa nehaviye. 34 Hamaegahayanagi nagola Falasia kanomo agia KamalieliꞋe* mono humave-nelia kanogino Yuta vayaꞋmogami Kanisolefi mainegeꞋya mukiꞋa veaꞋmoꞋya agima alisaga nehaya kanogino ani kanomoꞋa hetino mage huno hie “Tahaote kea hugahunagi Aposolo vayala humategeꞋya kumatega hati-lavisageta kea hisune.” huno hie. 35 HigeꞋya hati-laviꞋya vageno mage huno Kanisole vayaꞋmogamife hie “Isaleli vayaꞋnimogatama mani vayaꞋmogamina nago yama humategahunema hinutama tamakesa havilama hutetama aniꞋa hiho. 36 Nayona nago kanomo agia TeutasiꞋe evaꞋyi huno ‘Nagaya tokiyaꞋniꞋa hanea kano mainoe.’ huno higeꞋya fo hataletiꞋa (400) vayaꞋmoꞋya akavela vayanagi kamani kava vayatimoꞋya ago hayageno faligeꞋya akaveꞋma neꞋvaya vayala atagufeꞋya ute ete hageno aliꞋyamaꞋamoꞋa afa ya kana humaine. 37 Agai akavelega amakima negayaya kanafina YutasiꞋe Kalili kanomoꞋa evaꞋyi huno kea hamapaigeꞋya nagoꞋa vayala akave neꞋvageno kava vayatimoꞋya Yutasina ago hayageno faligeꞋya akaveꞋma neꞋvaya vayala atagufeꞋya ute ete humainae. 38 NaꞋa humainaya yafe menia tamahapauve mani vayala amatalegeꞋya viho. Anima nehaya kea amakaiꞋami mopale vayaꞋmogami kema hanesigenoꞋa afaꞋa haꞋno hugahianagi Anumaya Koti kema hanesigetama tamakayama ali haviyama hisaya amukotamia omalene. Havigu lamakaya Anumaya Kotina kame hutetama agaiꞋene tu hutesagi.” huno humaine. 40 HigeꞋya Kamalieli ke haviꞋya “Tamage hane.” huteꞋya Aposolo vayafe ke hageꞋya ageꞋya nofi kaꞋyoteti haifu amamiteꞋya amaumono nemaleꞋya mage hae “Yisasifena nagoꞋene veaꞋmogamina hamaopaiho.” huꞋya humateteꞋya amatalageꞋya umainae. 41 Ani Kanisole vayala amataleꞋya neꞋuꞋya “Anumaya KotiꞋa ago tamatea kava nehae.” huno tagaifena nehuno “Yisasi agima neꞋayaya yafe tamakaye hisifa kavala hisagetama amukotamia hanegahie.” huno humainea yafe tusiꞋa muse hume hume umainae. 42 MukiꞋa yupa ala mono nopiꞋene veaꞋmogami nopiꞋene mukiꞋa veaꞋmogamina Yisasifena hamapai-mainae. “Yisasina Anumaya KotiꞋa taugafa aligatigahema hutenea kanoe.” huꞋya hamapai-mainae.

Copyright information for `KMU