Acts 7

SitiveniꞋa Kanisole vayaꞋmogami amaufi kea huno falote humaine.

Ala mono note hagote kava kanomoꞋa Sitivenifena mage huno havige “Mani kema hugataya kea tamage nehao?” huno havige. Higeno SitiveniꞋa mage huno humaine nenafagatamaene naganaꞋni-mogatamaene haviho. TaginagomoꞋa ApalahamuꞋe yaufa Halani kotega oꞋuno Mesopotemia kotega mainegeno tokiya hale yamaꞋaene Anumaya KotiꞋa Apalahamute efalote humaineane. Efalote huteno mage huno hapaiye “Kagaika mopakaꞋaene vayakamogamiꞋenena neꞋamataleka kavelisua mopalega vuo.” huno humaineane. Higeno ApalahamuꞋa anile Kalatia vayaꞋmogami mopa neꞋataleno Halani kotega umaineno anilega nefaꞋa falitegeno Anumaya KotiꞋa eteno hutegeno tamakayama menima mainaya mopalela emaineane. Emaineanagi Anumaya KotiꞋa agaiꞋa atafa hisia mopa nago atupa kanoꞋa ani mopa nagoke aiya malesia mopa oꞋaminegi “HaenagaꞋa kamigahue. Ani mopa atafa hulinesanageꞋya kagaipiti falote hisaya nafaꞋneyagamoꞋya aligahae.” huno hianagi ani kanafina ApalahamuꞋa namo kano maineane.* Maineanagino Anumaya KotiꞋa agaifena mage humaineane “KagaikaꞋa kaginagomoꞋya Isaleli nofiꞋma omainaya vayaꞋmogami mopale visageꞋya ani vayaꞋmoꞋya amatafa huꞋya ‘AliꞋyatia aliho.’ huꞋya tusi yate ali haviya humatesageꞋya ani mopalela fo hataletiꞋa (400) kafu maigahae.* Maigahayanagi amatafama huꞋyama ‘AliꞋyatima aliho.’ huꞋya humainaya vayaꞋmogamina nagaya kaiyeke humateteꞋna aliꞋna haviya humatesugeꞋya kagai kaginagomoꞋya ani kotegatila eteꞋya ma mopale emaineꞋya nagai nagia alisaga hugahae.” huno humaineane. Anumaya KotiꞋa mage huno humaine “Nagai anagaꞋma maisaya yafe hagelafita maisuna kavala nafaꞋnekamogamina amakoya anoꞋya taga huo.” huno higeno ApalahamuꞋa Aisakina nafaꞋneꞋa ateteno napa eitiꞋa (8) kana maiteno agoya anoꞋya taga humaineane. HaenagaꞋa AisakiꞋa nafaꞋneꞋa Yekopuna ategeno YekopuꞋa haenagaꞋa tuelufuꞋa (12) nafaꞋneyaga tagai taginagomogamina amatene. Ani Yosefena nepuꞋamoꞋya Yosefefe tusiꞋa amaipa kafa heteteꞋya avaleꞋya alu vayaꞋmogami neꞋamamiꞋya mone aligeꞋya Isipi kotega avaleꞋya vayanagi Anumaya KotiꞋa agaiꞋene maineno kanama haiya yana alitaleno kanale agu agesa amigeno Isipi sauve kanoa, Felona, aulagale hetigeno FeloꞋa muse huno “Hagote kava kano maineka nagai noꞋyagaene mukiꞋa Isipi kotega kava yagaigane.” huno hutene. 11 Hutetegeno mainegeno Isipi kotegaene Kenani kotegaene nagola tusiꞋa kafu haya kana efalote higeꞋya tototimogamina kaveꞋamia omalegeꞋya tusiya huno amakala lemainae. 12 Amakala legeno YekopuꞋa “Isipi koteꞋma kavela hanema.” huꞋya haya kea haviteno nafaꞋneyagaꞋa hagoteno humategeꞋya kaveꞋma hanelega umainae. 13 HaenagaꞋa eteꞋya anile vageno YosefeꞋa “Nagayae tamakanatamimoꞋna mainoe.” huno higeno FeloꞋa Yosefe afamofena havimaine. 14 Havitegeno YosefeꞋa nefafena YekopufeꞋene mukiꞋa anagaꞋa seveti faefuꞋa (75) anagaꞋaene ke higeꞋya Isipi kotega umainageno YekopuꞋa anile faligeꞋya nafaꞋneyagaꞋaene tototimoꞋya fali-mainayane. 16 FaligeꞋya eteꞋya aliꞋya Sekemu kumala, ApalahamuꞋa moneleti Hamolo nafaꞋneyagamogami mopa miya higeno amigeno ali-mainea mopafi mo hevaitenae. 17 Anumaya KotiꞋa Apalahamufema hulokiya vai-malenea kemoꞋa fatago huno efalote hisia kanamoꞋa aupa higeꞋya tagai taginagomoꞋya Isipi kumatela falote huꞋya kasago humainageno alu sauve kanoa, Yosefefena oꞋagenea kanomo, eteno sauvea alino humaineane. 19 Falote huno maineno tagai nofi vayala ayemavataga huno huhaviya huneꞋamateno “NafaꞋneya-gatamia hamaesunageꞋya faligahae.” huno tokiyaꞋage ke humaineane. 20 Higeno ani kanafina Mosesena itaꞋamoꞋa atetegeno Anumaya KotiꞋa hau-mainea nafaꞋnegino itaꞋamogani nefagania taliꞋa (3) ikana noꞋanifinaga kava huꞋana ataꞋageno mainaꞋe. 21 Kava huteteꞋana kumate atenaꞋageno Felo munaꞋmoꞋa ani nafaꞋnea avaleno agaiꞋa nafaꞋne kana huno yagai-maine. 22 Yagaiteno avo nopi ategeno Isipi vayaꞋmoꞋyama havilinaya yana Mosesena huve-ligeno aliteno tusiya huno tokiyaꞋa haneteno kanale kea nehuno nehia kano maine. 23 Maineanagino fotiꞋa (40) kafu huteno mage hie “Isaleli vayaꞋnimogamina momakegahue.” huno agesa havimaine. 24 Haviteno mogeana nago Isipi kote kanomoꞋa Isaleli kanomona aiko-neligeno MoseseꞋa moli-neꞋataleno anonaꞋa ani Isipi kote kanoa haegeno fali-maine. 25 Faligeno MoseseꞋa ma agesa havimaine “VayaꞋnimoꞋya mage huꞋya hugahae ‘Anumaya KotiꞋa Mosese ayapiti taugafa aligatigahie.’ huꞋya hugahae.” huno agesa havianagi vayaꞋamoꞋya ani amakesa ohavinae. 26 Ohavigeno MoseseꞋa faeteno mogeana tole Isaleli kanolatana tu nehaꞋageno monaketeno moli-neꞋanataleno mage huno hie “Nenafugatanae tanakaya nagoke konagalata mainaꞋagi naꞋa higetana tua nehaꞋe?” huno hie. 27 Higeno anima tuma aepa henoꞋma aganaꞋamoma aiko-lia kanomoꞋa Mosesena ayetu-nefeno mage huno hie “Kagaila tagaite kava kano maika kaiyeke fatago hu kano maiyo kea ta kahapaigeka aniꞋa nehane? 28 Kagayama egama Isipi kanoma hayana kava huka nahaegahe nehano?” huno hie. 29 Higeno ani kema hia kehe MoseseꞋa faleno Mitiani kotega mo maineno ala aliteteno maineno haenagaꞋa tole ne nafaꞋnelata anatene. 30 Anilegama maiyana fotiꞋa (40) kafu maiteno MoseseꞋa kaꞋme kotega Sainai agoꞋyafi haino mainegeno nago osi yosalela ala ata anefela nelea yapiti nago ensole kanomoꞋa evaꞋyi higeno age-maine. 31 Ageteno amaꞋyo neꞋaino agelama hisue huno nehuno avate neꞋegeno AnumayamoꞋa anileti age aino mage huno hie “Nagaya kaginagomogamina Anumaya KotiꞋami mainoe. ApalahamuꞋagi AisakiꞋagi Yekopugami Anumaya KotiꞋami mainoe.” huno higeno MoseseꞋa atali talu huteno ani yama nagoꞋene agesia yafena tusi koli huno oꞋagene. 33 Koli nehigeno AnumayamoꞋa mage huno hie “Mamona alu aotage mopa nagaiꞋniꞋa mopagika kaiya anona asagika maletekao. 34 Nagayama nagai nofi vayaꞋma Isipi nemaiya veaꞋnimoga-mina ali haviyama humataya kavala ago age-mainoe. Avima atayana ago havimaineꞋna amaugafa aligatigahe emainogi. Kagaya eno Isipi kotega hugategahue.” huno Mosesefena hapai-mainea ke huno SitiveniꞋa hamapai-maine.

35 Mani Mosesefena nayona mage huꞋya humainae “Kagaila kava kano maineka kaiyekea ali fatago hugane huꞋya kea ta kahapaigeka aniꞋa nehane?” huꞋya amakaveꞋno hutenae. Anima amakaveꞋno hutaya kanomona osi yosaleꞋma vaꞋyima humainea ensole kanomoꞋa aya higeno Anumaya KotiꞋa kava humateno amaugafama aligatisia yafe huteneane. 36 Hutegeno MoseseꞋa Isipi kotega umaineno ani kotegati amavaleno fotiꞋa (40) kafu Isipi kumateꞋene haesa titeꞋene kaꞋme kotegaene kasagoꞋya tokiya avame yaꞋyaga humaineane. 37 Ani MoseseꞋa Isaleli veaꞋmogamife mage huno hamapai-maine “Anumaya KotiꞋa tamakai vayapiti nagayama huaꞋya huno aune laga hisia kanoa avaleno hetitegahie.” huno hamapai-maineane. 38 Ani MoseseꞋa kaꞋme kotega maineno mono kema havigahema melitalu humainaya taginagomoꞋyaene maiteno Sainai agoꞋyafi haitegeno nago ensole kanomoꞋa evaꞋyi huno Anumaya Kotina tahaimuꞋma lamisia mono kea Mosesena hapaigeno MoseseꞋa taginagomogamina hamapai-maineane.

39 Hamapai-mainegi taginagomoꞋya “Mosese kea akave omalegahune.” huꞋya amakaveꞋno huteteꞋya Isipi kotega eteꞋya visaya amakesa nehaviꞋya Elonife mage huꞋya humainae “Kategama lavaleno visia yana Anumaya Kotitima maisia yana talo hulato. MoseseꞋa, Isipi kotegatiꞋma lavalenoꞋma emainea kanoa hanatepi vigeta noꞋagone.” huꞋya humainae. 41 Mani kea huteꞋya nagola pulamakamo nafaꞋnea amayateti talo humaleteꞋya “Anumaya Kotitia ma maine.” huꞋya anima amayatetiꞋma talo humalaya yafena tusiꞋa muse huꞋya afua heꞋya kaeteꞋya aliꞋya mominae. 42 Ani kavaꞋma haya yafena Anumaya KotiꞋa akaveꞋno humateteno amatalegeꞋya yagema kaꞋnefiꞋma ikama naꞋa yama hanea yate “Anumayati mainae.” huꞋya muse nehuꞋya amakuꞋa amitafa huꞋya ani yaꞋayagamogami amaki alisaga humainaya yafe Anumaya Kotina aune vayaꞋmoꞋya kae-malenaya autaꞋmafina mage huꞋya humainae “Tamakaya Isaleli nofi veaꞋmogatama fotiꞋa (40) kafu kaꞋme kotega umainetama pulamakaene sipi sipiene hetama kae salaꞋmana humainayanagi nagaifena muse hutama mani kavala nehafi alu kanomofe musena nehae? 43 TamaꞋa omalenea Anumayamona agiꞋa Molekifena tusiꞋa muse hutama agai agi alisaga hisaya nona kitetama alitama utama tamaꞋa omalenea Anumayamona agia Lefanifena tusiꞋa muse hutama kaꞋnefi kana yana talo hutama ani augafa yaꞋyagale musena hutama tamakula amitafa hutama amakia alisaga nehae. NaꞋama haya yafe kame vayaꞋmoꞋya humatesugetama kotamilegatila tamavaleꞋya Papiloni kola agasetama ame kaiyaga umaigahae.” huno humaineane.

44 TaginagomoꞋya kaꞋme kotegama mainagenoꞋa Anumaya KotiꞋa “Ma kava huka talo huo.” hunoꞋma Mosesena huveli-mainea kavala huno mono nona kenaleti talo humaleteno kimalenegeno Anumaya KotiꞋa ani nopi eno amakaiꞋene me lokaeno kelamage kea hamapai-maineane. 45 HaenagaꞋa MoseseꞋa falitegeꞋya taginagomoꞋya ani yuguletiꞋma kimalenaya mono nona aliꞋya YosuaꞋene Yuta vea omainaya veaꞋnene tua huteꞋya mopaꞋamia ali-mainae. Anumaya KotiꞋa taginagomogami amaulagafima Isaleli nofiꞋma omainaya veaꞋmoꞋya ani mopaletila amanatigeꞋya ani yuguletiꞋma kimalenaya mono nona aliꞋya ani mopafi eꞋya me malageno anile hanegeno TevitiꞋa falote humaineane. 46 Anumaya KotiꞋa Tevitina kanaleꞋya huno haꞋmaegeno TevitiꞋa mage humainene “Yekopu Anumaya Kotiga kanale nona kigatesue.” huno hianagi ani nona okinegi haenagaꞋa nafaꞋneꞋamoꞋa Solomoni ani nona kimaleneane. 48 Kianagi analeꞋma mainea Anumaya KotiꞋa veaꞋmoꞋya amayatetiꞋma kimalenaya nopina nomaiye. NaꞋama humainea yafena nagola Anumaya Koti aune kanomoꞋa mage huno humaineane

49 “Anumaya KotiꞋa mage hie ‘Ikapinaga nagaiꞋniꞋa kava yagaisua siaꞋnia hanegi maifaluma hisua yafe naiya maleꞋna maisua yana mopa hanegi hana augafa no kinategahae? Hana kumate maisue? Nagaya mukiꞋa yana ikapinagama hanea yaꞋene ma mopaleꞋma hanea yaꞋene talo humalenoe.’ huno humaine.” huno humaineane.
51 Tamakaya kea ohavi veaꞋne mainetama tamaku tamakesafinaga “Anumaya Koti kea ohavigahune.” hutama Alu Aotage AvamuꞋmona tamakaveꞋno hutetetama tamakinagomoꞋya nehaya kavaꞋage nehae. 52 TamakinagomoꞋya mukiꞋa Anumaya Kotina amaune vayaꞋamogamina ali haviya humatenae. “Kanale Fatago Kanoa egahie.” huꞋya amaune vayaꞋmogamina tamakinagomoꞋya ago hamayageꞋya falimainayanagi tamakaya ani Kanale Fatago Kanomona ago agesi hutama hayageno fali-maine. 53 Ensole vayaꞋmoꞋya ayaꞋamoꞋya kahegi kea ago tamahapaiyanagi tamakaya tamage hutama akavela nomalae. Mani kea SitiveniꞋa huno humaine.

Sitivenina yafa kaꞋyoteti hayageno fali-maine.

54 HigeꞋya anileꞋma mainaya veaꞋmoꞋya SitiveniꞋma hia kemona haviteꞋya amaipamoꞋa tusi amakata aiteno hamai-vaigeꞋya amavaya mumu mama humainae. 55 NaꞋa nehageno Sitiveni agupina Alu Aotage AvamuꞋmoꞋa hiya higeno ikapinaga aulu heno ageana Anumaya Kotina tokiya hale yamaꞋaene YisasiꞋa Kotina tamaga ayatega heti-mainegeno age-maine. 56 Ageteno mage huno hie “Agegeho nagaya agoana ikamoꞋa ago aihalegeno ikapinagati emainea kanoa vayaꞋmo atenea kanomoꞋa Anumaya Kotina tamaga ayatega heti-mainegeꞋna nagaya neꞋagoe.” huno hie.

57 Huno hianagi melitaluma humainaya veaꞋmoꞋya agai kea ohavisaya yafe amayateti amakesa ailineleꞋya ala kenake nehuꞋya tusiꞋa ke neꞋvaiꞋya aiko-ligahe motafa humainae. 58 Motafa huꞋya avayu huꞋya kumategati malaga hagaꞋyu hutaleneꞋya yafa kaꞋyoteti hagaꞋyu huꞋya aiko-neliꞋya “Fatago kava nehune” huꞋya hisaya yafe siotaꞋamia asagiꞋya kava kanoa, Solo* aiyafi mo-malenae. 59 MaleteꞋya yafa kaꞋyoteti aiko-neligeno SitiveniꞋa Anumayamotega havigeno mage huno hie “AnumayaniꞋamoga Yisasigae nagu namemaꞋa kagai kayapi nemaloe.” huno hu-maine. 60 Mani kea nehuno aleꞋya ayeno ala kegefafiti Anumayamotega mage huno hie “Anumayamogae mama kefo kavaꞋma nehaya yaꞋamimona anonaꞋamia hu-oꞋama-to.” huno nehuno anile fali-maine.

Copyright information for `KMU