John 10

YisasiꞋa kanale sipi sipi afumo kava kano maine.

YisasiꞋa mage huno hie “Nagaya tamage-lafa huꞋna tamaha-nepauve nagoꞋa vayaꞋmoꞋya sipi sipi kegiꞋyamo fiatetiꞋma hai ofaleꞋya afalegatiꞋma asaga hu-maiꞋya hai falesaya vayala musufa vaya mainae. Nago kanomoꞋma fiatetiꞋma hai nefalea kanoa sipi sipileꞋma kava neꞋyagaiya kano maine. FiateꞋma yagai-mainea kanomoꞋa ani kanoa ageteno yaki-tegeno fiateti hai falegeꞋya sipi sipiyagamoꞋya alenaga agea havimainaya yafe agaiꞋa sipi sipimogamina amakia hanete hanete hu-maineanagino amakia ayete ayete huno amavaleno kumatega neꞋvie. AmavalenoꞋma kumatega neꞋunofena uhagoteno neꞋvigeꞋya ani kanomona alenaga agema havimainaleti lagiꞋya ani sipi sipimoꞋya akave neꞋvae. Nagi oꞋagenaya vayaꞋmogami amakavela oꞋugahae. Nagi ani kanomona alenaga agema ohavinaya yafe faleꞋya alulega ugahae.” huno hie. YisasiꞋa mani avame kea hama-paiyanagi amakaya havilama huꞋya ohavinae.

Ohaviyanagi YisasiꞋa nagoꞋene eteno mage hu-maine “Tamage-lafa huꞋna tamaha-nepauve nagaya sipi sipimoꞋyama hai falesaya fiana nagaiꞋnige mainoe. Mainoanagi hagoteꞋyama emainaya vayala vayaꞋma nehamaeꞋya musufa yama nehaya vayalagiꞋya sipi sipiyagamoꞋya kema haya kea ohavinae. Ma nagaya fia mainoe. Mainoanagitama nagoꞋa veaꞋmogatama etama nagaipi ehai falesageꞋna tamaku tamamena ali-gatisugetama hai faletama mainetama elavitetama haitetama nehutama nesaya yana aligahae. 10 Musufa kanomoꞋa musufa yana nehuno veala nehamaeno ali haviya hu-ma-tegahe neꞋeanagi nagaya kanaleꞋnale tamahaimu tamamigahe emainoe. Agola haꞋno ohu tamahaimula tamamigahe emainoe.

11 Nagaya kanaleꞋnale sipi sipi kava kano maineꞋna sipi sipiꞋniꞋamogamina amaku amamemaꞋa ali-gatisua yafe faligahue. 12 Nago kanomoꞋa yagaiteno mone neꞋalia kanoa sipi sipimona nefaꞋa omaine. Omaigeno afela kalamoꞋma egenoꞋa ani kanomoꞋa ataleno falegeno ani afela kalamoꞋa sipi sipimogamina akafu amanino mo hamae me hamae higeꞋya faleꞋya atagufeꞋya alulega ute ete nehae. 13 Ani sipi sipileꞋma yagaino maineno monema neꞋalia kanomoꞋa sipi sipiyagahena agesa ohavino amataleno faleno umaine. 14 Nagaya kanale sipi sipi kava kano mainoe. NenafaꞋa aguꞋa namigeꞋna nagaya naguꞋa amugetaꞋa nehuꞋe. NaꞋa hu-mainoꞋa kava huꞋna sipi sipiyagaꞋnimoꞋya amakuꞋa namigeꞋna nagaya naguꞋa neꞋamamue. Nagaya sipi sipiꞋniꞋamogami amaku amamemaꞋa ali-gatisua yafe faligahue. 16 NagoꞋa sipi sipiyagaꞋniꞋa amahaote mainae. Mani sipi sipi kegiꞋyaꞋnifina omainayanagi ani afuyaga amavaleꞋnama esuana alenaga nage nehaviꞋya nagokeꞋage afuyakama maisayana nagokeꞋmoꞋna ani sipi sipiyagalela kava kano maigahue.

17 Nagaya ‘AfaꞋa faligahue.’ huꞋna hua kehena NenafaꞋa tusiya huno hau ayamopafi nehaiye. NaꞋafene? Nahaimula atalesugeno eteno namisigeꞋna he-tisuaꞋyafe nahaimula afaꞋa atalegahue. 18 NagoꞋa vayamoꞋya nahaimula naha-ofalegahae. Nagaya nagaiꞋniꞋage nahaimula atalegahue. NahaimuꞋma atalesua tokiyaꞋniꞋaene ataleteꞋna eteꞋna alisua tokiyaꞋniꞋaene hane. AniꞋama hisua kavaꞋmo kea NenafaꞋa ago naha-pai-maine.” huno hie.

19 Mani kema hia kea Yuta vayaꞋmoꞋya haviteꞋya tolefi ali fako hu-mainae. 20 KasagoꞋyamoꞋya mage hae “Kefo AvamuꞋmo agupi hai-mainegeno aifoꞋnafo nehigi naꞋa higetama keꞋa maitama havimainae?” huꞋya hae. 21 HageꞋya nagoꞋamoꞋya mage hae “Kefo AvamuꞋmoꞋa agupima maineleꞋasina maniꞋa augafa kea ohileꞋasine. Kefo AvamuꞋmoꞋa aulagama asu hu-mainea kanomo aulaga aligali hu-oꞋateleꞋasine.” huꞋya hae.

Yuta vayaꞋmoꞋya Yisasina kame hu-tenae.

22 Nayona mono no kimaleteꞋya fita yaki-mainaya kanahe muse nehaya imu Yelusalemu ki-mainae. Ani imua yasi neꞋalia kanale negiyanagino ani kanalela YisasiꞋa Anumaya Koti nopi umaineno Solomoni yasi neꞋalea nona aye-nagali-malenea kaiyaga neꞋvie. 24 MukiꞋa Yuta veaꞋmoꞋya meliꞋya amuꞋno huteꞋya maineꞋya mage hae “Tagu tagesamoꞋa tole-lole nehuno taipamoꞋa kanaꞋage nehigi. Menia hu-falote huka taha-paiyo kagaya Anumaya Koti hu-ga-tegeka emainana kano mainano?” huꞋya hae. 25 Havigageno YisasiꞋa mage huno hie “Nagaya agoꞋma tamaha-pai-mainogi nagaifena havitama tamakupi maletama tamametiti nohae. Nenafa naminea tokiya yateti aliꞋyana alugetama agayana ani yana nagaya Anumaya Koti hu-na-tegeꞋna emainoa kano mainoa yafe tama-ve-lianagi nagai sipi sipima omaiya yafe havitama tamakupina nomalae.

27 Nomalayanagi nagai sipi sipiyagamoꞋya nagaila alenaga mage haviteꞋya nakave malageꞋna nagaya amakaila ago amake-mainoe. 28 AmaketeꞋna maige maige hisaya hamaimula ago amaminoanagiꞋya ofaligahae. Nagaila ago nayapi mainayanagino nago kanomoꞋa memavayu ohugahie. 29 NenafaꞋa ani sipi sipiyaga naminea kanogino mukiꞋa yana amakase-mainea kano mainea yafe alu kanomoꞋa Nenafa ayapitila haofalegahie. 30 NenafaꞋene nagaiꞋniene nagoke mainoꞋe.” huno hie.

31 HigeꞋya Yuta vayaꞋmoꞋya nagoꞋene yafa kaꞋyo aliꞋya haesaya kava nehae. 32 Nehageno YisasiꞋa mage huno hama-paiye “Nagaya mukiꞋa Nenafa naminea tokiya avame yana tamakai tamaulagafina ago hu-mainogi nagoke avameꞋyana hana avameꞋya hua yamo notamahaigetama nagaila yafatetila nahaegahena nehae?” huno hama-vige. 33 Hama-vi-gegeꞋya “Tokiya avame yama hu-mainana yafene huta yafatetila okahaegahunagi kagaya ma mopafi afa kano mainekagi ‘Anumaya KotiꞋene nagoke mainoꞋe.’ hukama hanana Anumaya Kotina kalana ategana kema hana yateti kagaila yafa kaꞋyotetila kahaegahena nehune.” huꞋya hae.

34 Hageno YisasiꞋa mage hie tamakaitami mono kema kae-malenaya kemoꞋa mage hu-maineane

“Anumaya KotiꞋa mage hie ‘Tamakaitami Anumaya Kotigatama mainae.’ huno hie.” huꞋya kae-malenayane.
35 Ani Anumaya Koti kea kae-malenaya ke hanege hanege huno tamageꞋage hugahie. Anumaya Koti kema agoꞋma hama-paiya vayafena “Anumaya Kotigatama mainae.” huno hu-maineana nagaya Nenafafena “Nenahaiya kano mainane huno hu-na-tegeꞋna ma mopafina emainoema.” huꞋna nehuana naꞋa higetama “Nagaya Anumaya Kotina neꞋamoꞋnae.” huꞋnama hua kehena “Anumaya Kotina hu-haviya hu-neꞋatane.” hutama hu-nena-tae? 37 “Nagaya Nenafa aliꞋyama oꞋaluleꞋasina nagaifena havitama tamakupi maletama tamametiti ohaleꞋasinagi kanale kava haleꞋasine. Nagaya kema hu-mainoa kehema havitama tamakupima omalenutamahena aliꞋyama ali-mainoa aliꞋyafena havitama tamakupi maletama tamametiti hiho. NaꞋa hisayana NenafaꞋa nagaiꞋene maigeꞋna nagaya aniꞋa huꞋna agaiꞋene mainoꞋema huꞋna hua kea havilama hutama havigahae.” huno nehie.

39 HigeꞋya nagoꞋene atafa huꞋya nofi hu-tegahe hayanagi amakaseno ago umaine. 40 Uteno YisasiꞋa eteno Yotani lina mo lakaeno YoniꞋma lima fale-ma-tenea kumate mo maine. 41 Mo mainegeꞋya mukiꞋa veaꞋmoꞋya melitalu huꞋya maineꞋya mage hae “YoniꞋa keꞋama alino lokiya vaisia yana nagola malegeta oꞋagenonagi ma kanomofena mukiꞋa kema hu-mainea kemoꞋa tamage-lafa hu-maine.” huꞋya hae. 42 MukiꞋa ani kumate veaꞋmoꞋya Yisasifena haviꞋya amakupi maleꞋya amametiti hu-mainae.

Copyright information for `KMU