John 18

YutasiꞋa Yisasina avaleno kame vaya amayapi atene.

YisasiꞋa ani kea Anumayamotega havigeteno tuelufuꞋa (12) anagaꞋaene hati-laviꞋya Kitaloni lina mo laꞋkaeꞋya umainae. Atu kaiyaga nago olivi yosa kali-malenaya hoya hanegeꞋya YisasiꞋa agaiꞋaenema tokaeꞋya nemaiya anagaꞋamoꞋyaene ani hoyafinaga umainae. Umainayanagi mukiꞋa yupa YisasiꞋa tuelufuꞋa (12) anagaꞋamoꞋyaenena ani hoyafinaga molitalu huꞋya nemaiya yafe YutasiꞋa, agesiꞋma huno Yisasina kamema hu-tesia kanomoꞋa, ani hoya ago age-maineane. Age-maineanagino YutasiꞋa viaꞋyamo ala mono note kava vayateꞋene* Falasia vayateꞋene vigeꞋya mono note ati vayaꞋene Lomu ati vayaꞋene amigeno amavaleno ani hoyafinaga kaꞋniꞋene lamu kaꞋniꞋene tu hisaya yaꞋene aliꞋya emainae.

Ayanagi YisasiꞋa mukiꞋa augafaleꞋma falote hugahema hia yana ago haviteno amakaite viaꞋyamo mo hama-vige “Tamakaya tafe atineꞋayae?” huno hie. HigeꞋya kenonaꞋa mage huꞋya hae “Nasaleti Yisasife ati-yeta neꞋone.” huꞋya hageno YisasiꞋa mage hie “Nagaya ma mainoe.” huno higeno agesiꞋma huno Yisasina kamema hu-tea kanoa, YutasiꞋa, ani vayaꞋene tokaeno maine. Mainegeno YisasiꞋa “Nagaya ma mainoe.” hunoꞋma hia yafe amakavelegati eteꞋya valega mo fae-laka-ti-mainae.

Fae-laka-ti-tageno YisasiꞋa nagoꞋene eteno hama-vige “Tafe ati neꞋayae.” huno higeꞋya amakaya nehuꞋya “Nasaleti Yisasife ati neꞋayone.” huꞋya hae. Hageno YisasiꞋa kenonaꞋamia mage hie “Nagaya ago tamaha-nepauve nagaya ma mainoe huꞋna nehue. Tamakaya nagaifema nati neꞋayenutamahena ma ma nagaiꞋenema mainaya vayala amatalegeꞋya afaꞋa viho.” huno hie. YisasiꞋa agoꞋma hu-mainea kea mage huno hu-maineane “Naminana veala nagoke kanoꞋa ata-oꞋayegahie.” huno hu-maineane. Anima hu-mainea kemoꞋa falote huno tamagema hisia yafe YisasiꞋa “AmatalegeꞋya viho.” huno hu-maine.

10 Higeno Saimoni PitaꞋa ayaꞋaya naepeꞋa ali-lianagino alisagino ala mono note hagote kava kanomo aliꞋya kanoꞋa, Malakusina, ai-koligeno tamaga kaiyaga agesa aifa-kali-talegeno asaga hu-lavi-maine. 11 Ai-fakaligeno YisasiꞋa Pitafena hapaino “AyaꞋaya naepekaꞋa tafugepi vaiyo. Naugafaene nagu name nagata aisia yaniꞋa satuꞋage hia tima hanea masu keꞋayola NenafaꞋa naminegi nagaife onesie huka nehano?” huno hie.

Yisasina Anasite avaleꞋya umainae.

12 Lomu ati vayaꞋene ala kava kanoꞋamiene mono note ati vayaꞋene Yisasina atafa huꞋya nofi ki-mainae. 13 Nofi k-iteteꞋya hagoteꞋya Anasite avaleꞋya umainae. AnasiꞋa Kaiyafasina aꞋamona nefa maineanagino KaiyafasiꞋa ani kafufina ala mono note hagote kava kano maineane. 14 KaiyafasiꞋa Yuta vayafe mage huno hama-pai-maineane “Kanalele nagoke kanomo mukiꞋa veaꞋmogamitefe huno falisie.” huno hu-maineane.

PitaꞋa Yisasifena “OꞋagenoa kanoe.” huno hu-maine.

15 Saimoni PitaꞋene nagola YisasiꞋenema tokaeno nemaiya kanoꞋene* Yisasina akave anatiꞋana umainaꞋe. NeꞋvaꞋageno mono note kava kanomoꞋa ani YisasiꞋenema tokaeno nemaiya kanomona ago age-mainea yafe agaya YisasiꞋene ala mono note kava kanomo no kegiꞋya kovefinaga hai-fale-maine. 16 Haigeno PitaꞋa fiate he-tino mainegeno anima YisasiꞋenema tokaeno nemaiya kanomoꞋa fiateꞋma yagai-mainea munaꞋmofena mo hanepaino Pitana avaleno emaine. 17 NeꞋegeno fiateꞋma yagai-mainea munaꞋmoꞋa Pitafena mage huno havige “Kagaya mani kanomona tuelufuꞋa (12) vayapiti kano mainano?” huno havigegeno “AꞋao nagaya ani vayapiti kanoa omainoe.” huno hapaiye. 18 TusiꞋa yasimo higeꞋya aliꞋya vayaꞋene ati vayaꞋene ata kae-taleꞋya he-tiꞋya tota huꞋya mainageno PitaꞋa amakaiꞋene atale he-tino augafa tota huno maine.

Ala mono note kava kanomoꞋa Yisasina kaiyeke hu-tene.

19 Ala mono noteꞋma hagote kava kanomoꞋa Yisasifena “KagaiꞋenema tokaeꞋya nemaiya anagakaheꞋene kagayama hu-ma-veli mainana keheꞋene naha-paiyo.” huno havinege. 20 Havigegeno YisasiꞋa mage hie “Nagaya mukiꞋa veaꞋmogamina fufute hama-nepauvane. MukiꞋa yupa Yuta veaꞋnea melitaluma haya mono nopiꞋene ala mono nopiꞋene hama-nepauvane. Fala-kiꞋna hama-opainoe. 21 NaꞋa higeka nagaila nahavi-negane? Nagai kema nehaviya vayafena hama-nepauva kehena hama-vigo. Nagayama hama-pai-mainoa kea ago havilinae.” huno hie. 22 Higeno nago ati kanomoꞋa he-tino maineleti YisasiꞋma mani kema nehiana augosafi ai-ko-nelino mage hie “NaꞋa higeka kagaya ala mono note hagote kava kanomo aulagafina mani kea nehane?” huno hie. 23 Higeno YisasiꞋa kenonaꞋa mage hie “Kefo kema hu-mainesugekahena nagaya kefo kema hua kea hu-falote huka naha-paiyo. Nagayama kanale kema hu-mainesugekahena naꞋa higeka nai-ko-neline?” huno hie. 24 HigeꞋya nofiꞋma kitaya nofila kalu he-oꞋa-teneꞋya AnasiꞋa ala mono note hagote kava kanoa, Kaiyafasitega hu-tegeꞋya avaleꞋya umainae.

PitaꞋa nagoꞋene Yisasifena avane hu-maine.

25 NeꞋvageno Saimoni PitaꞋa atale maineno ata lota huno mainegeꞋya agaife mage huꞋya hae “KagaiꞋenena mani kanomona tuelufuꞋa (12) vayaꞋamopiti kano mainano?” huꞋya hageno PitaꞋa avane huno mage hie “AꞋao nagaya ani kanoa omainoe.” huno hie. 26 Higeno ala mono noteꞋma hagote kava kanomo aliꞋya kanoꞋamona, PitaꞋma agesama ai-fakali-talegeno asaga hu-lavi-mainea kanomo anagapiti kanomoꞋa mage huno hie “Kagaya YisasiꞋene hoyafina mainaꞋageꞋna kage-mainoe.” huno hie. 27 Higeno PitaꞋa nagoꞋene avane huno “AꞋao nagaila onagenane.” huno higeno aupaꞋa kokolemoꞋa age ai-maine.

Yisasina Pailatite avaleꞋya umainae.

28 Yisasina Kaiyafasi nopinagati Lomu kamanile ala kava kanomoꞋa kaiyekema hu-neꞋamatea note kegeꞋafiti avaleꞋya umainae. Yuta vayaꞋmogamina mono keꞋamimoꞋa mage huno hu-maine “Afa vayaꞋene tokaetama maisayana amakai kava hutama kefo vaya mainaya yafe ala imu kavela onegahae.” huno hu-mainea yafe Yuta vayaꞋmoꞋya ala imu kaveꞋma mo nesaya yafenagiꞋya ani nopina ohainae. 29 Kumatega mainageno PailatiꞋa, Lomu kamanile ala kava kanomoꞋa, amakaite eno mage huno hama-vige “Tamakaya naꞋane keleti mani kanoa kaiyekea hu-tegahae?” huno hie. 30 HigeꞋya kenonaꞋa mage huꞋya hapaiye “Mani kanomoꞋma kefo kavaꞋma ohuneleꞋasipa avaleta kagaitela omoteꞋasine.” huꞋya hae. 31 Hageno PailatiꞋa eteno mage huno hama-paiye “Tamakaya avaletama tamakaitami mono keleti kaiyekea hu-teho tamakaitami yane.” huno hie. HigeꞋya Yuta vayaꞋmoꞋya mage huꞋya hu-mainae “Kagaya kamanimoga huka taumono malenana kemoꞋa nago kanoa haegeno ofalino.” huka hu-mainane* huꞋya hae. 32 Nayona YisasiꞋa mage huno hu-maine “Nagayama falisua yana yafaga yosale nahaeꞋya nasaesageꞋna faligahue.” huno hu-maineane. Lomu kamani vayaꞋmoꞋyage vayala yafaga yosalela hamaeꞋya asaigeꞋya fali-mainae. YisasiꞋa agoꞋma hu-mainea kemoꞋa falote huno tamage hisia yafe Yuta vayaꞋmoꞋya mani kea hu-mainae.

33 Hageno PailatiꞋa ataleno kaiyekema hu-neꞋama-tea nopinaga haino maineno Yisasife ke higeno vigeno mage huno havige “Kagaya Yuta veaꞋnogami sauve kano mainano?” huno havige. 34 Havigegeno YisasiꞋa kenonaꞋa mage hie “Kagaya kagu kagesafiti mani kea nehapi ifi nagoꞋa vayaꞋmoꞋya nagaifena kaha-paigekahe nehano?” huno eteno havige. 35 Havigegeno PailatiꞋa kenonaꞋa mage huno havige “Nagaya Yuta kano mainogeka nehano? Kagai nofi vayaꞋene ala mono note kava vayaꞋene kavaleꞋya nagaite neꞋaya yafena kagaya na havi kava hu-mainane huꞋna kahavi-negoe.” huno hie.

36 Higeno YisasiꞋa kenonaꞋa mage hie “Nagaya kava yagaisua kumala ma mopafina omalene. Inagi ma mopafima kava yagaisua kumaꞋniꞋama haneleꞋasipa aliꞋya vayaꞋnimoꞋya kamea hageꞋya nagaila navaleꞋya Yuta vayaꞋmogami amayapina onataleꞋasine. Inagi nagaya kava yagaisua kumaꞋniꞋa ma mopafina omalene.” huno hie. 37 Higeno PailatiꞋa mage huno hie “Ala sauve kano mainoe huka nehano?” huno higeno YisasiꞋa kenonaꞋa mage hie “Kagaya nagaife ala sauve kano mainane hukama hana kea tamage nehane. Nagaya itaꞋnimoꞋma natenelegatiꞋma emaineana ke-lamaꞋage hu-falote hisua yafe ma mopafina emainogi ke-lamama haviꞋya amakupi malenaya veaꞋmoꞋya nagayama hua kea nehaviye.” huno hie. 38 Higeno PailatiꞋa Yisasife mage hie “Ani ke-lamage kea naꞋane ke?” huno nehuno PailatiꞋa hati-lavino kumatega viaꞋyamo Yuta vayate mage huno mo hama-paiye “Kefo kavaꞋma hia yana ati ayegetoana omalene. 39 Tamakaya mukiꞋa yupa ala imuma kigahena naha-vigageꞋna nago kanoa kina nopitila afaꞋa avaleꞋna nelamamuanagi na yafe nelamahaiye Yuta veaꞋmogatamina sauve kanotamia afaꞋa atalesugeno visio?” huno hama-vige. 40 Hama-vigegeꞋya ala kefiti mage huꞋya hae “Agaila neꞋataleka Palapasina tamisane.” huꞋya hu-mainae. PalapasiꞋa vaya nehamaeno musufa yamaꞋage hume hume nehaiya kano mainea kanohe hu-mainae.

Copyright information for `KMU