John 2

Kena kumate nago kanomoꞋa a alimaine.

Tole kana maiteꞋya Kalili hanea kumala Kenae nehaya kumate nago kanomoꞋa a aligahe higeno Yisasina itaꞋamoꞋa anima aꞋma aligahema hia nopi umaine. UmainegeꞋya “Yisasiga kagaiꞋenema tokaeꞋya nemaiya anagakaene eho.” huꞋya ke hageꞋya umainae. UmaineꞋya nenageno nofi alagamo tina haꞋno higeno Yisasina itaꞋamoꞋa Yisasina mage huno hapaiye “Nofi alagamo tina haꞋno hie.” huno hanepaiye. Higeno YisasiꞋa mage hie “AꞋoko ‘NaꞋa maꞋa huo.’ huka nahaꞋopaiyo kagai yana omalene. nagaya tokiyaꞋniꞋa amavelisua kanaꞋa falote ohune.” huno nehie. Nehigeno Yisasina itaꞋamoꞋa kaveꞋma talo talaꞋma huꞋya amamiya veaꞋnehe mage huno hama-paiye “Nago kema hinagetama agai ke akave maleho.” huno hama-nepaiye.

Yuta vayaꞋmogami mono kemoꞋa mage humaine “MukiꞋa kanalela mukiꞋa yana sese hutama ti faleho.” huno humaineane. Ani yafe sikisiꞋa (6) yafa ti keꞋayola vani hataletiꞋa (100) lita hanea keꞋayola anilela hane. Hanegeno YisasiꞋa kaveꞋma talo talaꞋma huꞋya neꞋamamiya veaꞋnehe mage huno hama-paiye “Mani li keꞋayoꞋyakafina hefitama havateho.” huno hama-paigeꞋya hefi havate-mainae. Havatageno “KaveteꞋma kava yagai-mainea kanole osiꞋa hefitama alitama momiho.” huno higeꞋya hefiliꞋya umainae.

HefiliꞋya momigeno ani kaveteꞋma kava yagai-mainea kanomoꞋa ani lina hagotenoꞋa titafa haniamagi haenagaꞋa eteno nofi alagamo ti hapaegeno neno akekeana higeno ani lina ea kamaꞋa oꞋageneamagi hefiꞋyama aliꞋyaꞋma aya veaꞋnemoꞋyage havimainae. KaveteꞋma kava kanomoꞋa aꞋma alia kanohe ke huno mage huno hapaiye. 10 “MukiꞋa vayaꞋyaga hagote kanalela hagaꞋage tina amamigeꞋya mageno amamu higeꞋya haviyama hia tina neꞋamamiya yamagi kagaya hagote kanalela afa li tamiteka haenaga hagaꞋage tina nelamine.” huno nehie.

11 Manima taloma hia tokiya avame yana YisasiꞋa hagote kanale Kalili hanea kumala Kenae huꞋya nehaya kumate ani kavala talo nehuno tusiꞋa ala tokiya hale yamaꞋaene amaveligeꞋya agaiꞋenema tokaeꞋya nemaiya anagaꞋamoꞋya ageteꞋya aliꞋya amakupi maleꞋya amametiti hu-mainae. 12 NaꞋa hu-maletegeꞋya YisasiꞋene itaꞋamoꞋene aganaꞋamoꞋyaene agaiꞋenema tokaeꞋya nemaiya anagaꞋamoꞋyaene Kapaneamu laviꞋya osi kanaꞋa anile mainae.

YisasiꞋa ala mono nopi mone aliꞋya neꞋaliya vaya amanati-talene.

13 Nago ala imua Anumaya KotiꞋma Yuta veayaꞋmogami amakinagomogami amaugafama aligatimainea kanahe amakesa havi havi nehaya imu negiya kana evaꞋyi hugahe higeno YisasiꞋa Yelusalemu haimaine. 14 YisasiꞋa ala mono nopi haino mogeana vayaꞋyagamoꞋya pulumaka afuma sipi sipi afuma namama malenageꞋya veaꞋmoꞋya miya hisaya yafe malenageno YisasiꞋa mokemaine. magi nagoꞋa vayaꞋmoꞋya alu kotega nehanea monea neꞋaliꞋya ani kumateꞋma nehanea monea anonaꞋa amamisaya yafe folomole maleꞋya mopale mainageno momakemaine. 15 Momaketeno nofiteti alifagagi maleneno mukiꞋa vayaꞋma sipi sipima pulumaka afuyakaene mono nopiti ali helafi neꞋataleno monema ayeyahaeꞋma nehaya vayaꞋmogami folomoꞋamiene moneꞋamiene ali helafi-talene. 16 Namayagama miya nehaya vayafe mage huno hamapaiye “Alitama eviho. Mafina nenafa nona tamakaya alitama maketi kumala talo ohiho.” huno nehie. 17 NehigeꞋya agaiꞋaenema tokaeꞋya nemaiya anagaꞋamoꞋya avopima hanea kehe amakesa nehaviye. Ani kea mage huno haneane “Anumaya Koti nofena mukiꞋa kanale magesa havi havi huꞋna nokaꞋa kanaleꞋya huno hanesia yafe aluya huꞋna muse nehue.” huno kaemalenegeꞋya havimainayane.

18 HavimainayamagiꞋya Yuta vayaꞋmoꞋya eteꞋya havinegae “AniꞋama hana kavala ta tokiyaleti nehane? TokiyakaꞋa hane huta havisuna yafe nagola oꞋagenona tokiya avame yana hugeta agamano.” huꞋya nehae. 19 Nehageno YisasiꞋa kenonaꞋamia mage huno hama-paiye “Ma ala mono nona alitama lagape aitaletesageꞋna taliꞋa (3) kanale eteꞋna ani nona aliꞋna hetigahue.” huno nehie. 20 HigeꞋya Yuta vayaꞋmoꞋya mage huꞋya hapaiye “KekamoꞋa kanale ohia ke nehane taliꞋa (3) kanale ani nona aliꞋna hetigahue huka nehanamagi vayaꞋyagamoꞋya foti sikisiꞋa (46) kafufi mani nona kimalenaya none.” huꞋya nehae.

21 HuꞋya hageno YisasiꞋa ani avame kea hiamagi ani mono nofema hiana agaiꞋa augafahe nehie. 22 YisasiꞋma falitenoꞋma he-ti-mainea kanafina agaiꞋenema tokaeꞋya nemaiya anagaꞋamoꞋya ani kema humainea kehena amakesa havimainae. Avopima hanea kene YisasiꞋma humainea kene “Tamage humaineane.” huꞋya amakupi maleꞋya amametiti humainae.

YisasiꞋa mukiꞋa vayamogami amakuꞋafina ago agemaine.

23 Imuma negiya kanale YisasiꞋa Yelusalemu maineno oꞋagenaya tokiya avame yana higeꞋya ageteꞋya mukiꞋa veaꞋnemoꞋya “Tamage nehie.” huꞋya amakupi maleꞋya amametiti humainae. 24 Hayamagi YisasiꞋa mukiꞋa veaꞋnemogami amakuꞋa ago amakea yafe aguꞋa noꞋamamie. 25 NaꞋafene amakupima hanea yana ago age-mainea yafe YisasiꞋa mukiꞋa veaꞋmogamife “Tamakupima hanea yana naha-paiyo.” huno ohune.

Copyright information for `KMU