John 20

YisasiꞋa fali-mainefiti eteno he-ti-maine.

Sota yupa kola otinegeno Magatala kumate MaliaꞋa natemaꞋa Yisasina he-vai-tenaya komulega umaine. Uno mogeana komumo avayaleꞋma aiso hu-malenaya yafana ago alike-li-talenageno avayalela omalegeno moge-maine. Mogeteno eteno aiya-yeno YisasiꞋma nehaiya kanoene Saimoni PitaꞋene mainaꞋale eno mage huno hana-paiye “Alatimona komufitila ago aliꞋya hanatepi atenae.” huno hana-paiye.

Hana-paigeꞋana haviteꞋana PitaꞋene YisasiꞋma nehaiya kanoene Yisasi komulega umainaꞋe. Anaiya-yeꞋana ani komulega vaꞋaleti YisasiꞋma nehaiya kanomoꞋa Pitana agaseno aupaꞋa komule hagoteno umaine. Uteno mope hu-maineno ageana Yisasina aye-gasagi-tenaya kenaꞋage hanegeno ageanagi anifinaga hai-ofalene. Hai-ofaleno mainegeno Saimoni PitaꞋa akave eaꞋyamo ani komufinaga aupaꞋa hai-fale-maine. Haino mogeana nagoꞋa aye-gasagi-tenaya kena neꞋageno anuteꞋma ki-tenaya kenaene Yisasina augafaleꞋma aye-gasagi-tenaya kenaene nagopi tokaeno omalenegi aote kaiyaga aye-gafage-kino malenegeno haino moge-maine. NeꞋagegeno YisasiꞋma nehaiya kanomoꞋa komuleꞋma hagoteno umainea kanoa anifinaga hai-faleno mo neꞋageno komufitiꞋma he-ti-mainea yafe “Tamage nehie.” huno havino agupi maleno ametiti nehie. Ani kanafina mukiꞋa anagaꞋamoꞋya Anumaya Koti kema kae-malenaya kea havilama ohunae. Ani kemoꞋa mage huno hu-maine “YisasiꞋa fali-mainesifiti he-tigahie.” huꞋya kae-malenaya kemona havilama ohunae. 10 Anakaya YisasiꞋenema tokaeꞋana nemaiꞋa kanolatana anifinagati hati-laviꞋana noꞋanilega eteꞋana umainaꞋe.

Magatala MaliaꞋa Yisasina age-maine.

11 MaliaꞋa ani yafakamo avayale he-tino maineno avi neꞋateno ape huno ani komufinaga aulu heno neꞋage. 12 Ageana tole ensole kanolatana efeꞋage kenaꞋani failiꞋana Yisasi augafama malenaya yate mopale mainaꞋe. Nago kanoa anuma malenalega maigeno nago kanoa aiyama malenalega maigeno hu-mainaꞋageno anake-maine. 13 NeꞋanakegeꞋana Maliafe mage haꞋe “AꞋmogae naꞋa higeka avia neꞋatane?” huꞋana havigaꞋageno MaliaꞋa mage huno hie “AlaniꞋamona aliꞋyama mo malaya kumala oꞋagenoa yafe avi neꞋatoe.” huno hie. 14 Nehuno mai-yahae huno ageana YisasiꞋa he-ti-mainegeno ageanagi augosafina agelama ohune. 15 Agelama ohigeno YisasiꞋa mage hie “AꞋmogae naꞋa higeka avia neꞋatane? Tafe ati neꞋayane?” huno havigegeno MaliaꞋa agesafinaga mage huno hie “Ma kanoa hoyaleꞋma yagai-mainea kano maine.” huno agesafinaga nehavino mage huno hie “MusekaꞋa nehugi kagayama alika umainenukahena malenesana kumafena naha-paigeꞋna molino.” huno hie. 16 Higeno YisasiꞋa mage huno hie “Maliao.” huno higeno ani aꞋmoꞋa maiyahae huno Yuta vayaꞋmogami kefiti mage huno hie “Laponae.” huno hie. Ani kemoꞋa takai kefina “Hu-lave-nelina kanomogae.” huno hie. 17 Higeno YisasiꞋa mage hie “Nenafa mainelega ohainogi natafa ohuka naganaꞋnimogamina mage huka mo hama-paiyo ‘NagaiꞋene tamakaiꞋene Nelafatega haigahe nehue. Nagai Anumaya Kotitegaene tamakai Anumaya Kotitegaene haigahe nehue.’ huꞋka mo hama-paiyo.” huno hie. 18 Higeno Magatala MaliaꞋa viaꞋyamo YisasiꞋenema tokaeꞋya nemaiya anagaꞋamogamina mage huno hama-paiye “Nagaya AlaniꞋamona ago agoe.” huno nehuno “Nage mage huka hama-paiyo.” hunoꞋma hapaiya kea hama-pai-maine.

YisasiꞋa aleveniꞋa (11) anagaꞋamogamite evaꞋyi hu-maine.

19 YisasiꞋa fali-mainefitiꞋma he-ti-mainea Sotamona hanipinaga Yisasina aleveniꞋa (11) anagaꞋamoꞋya Yuta vayafena koliꞋami huꞋya fita kiꞋya tokiyaꞋage hu-maleteꞋya nopinaga alitalu huꞋya mainae. Mainageno YisasiꞋa evaꞋyi huno amuꞋnoꞋamifi me he-ti-maineno mage hie “TamaipamoꞋa falu nehinagetama maiho.” huno hama-paiye. 20 Hama-paiteno akaiꞋma ayapima nilima he-malenaya afuguꞋene haopafina kevema aye-mainaya afuguꞋene amave-neliye. Amave-ligeꞋya aleveniꞋa (11) anagaꞋamoꞋya AlaꞋamimona ageteꞋya amakuꞋamoꞋa tusiꞋa muse hia kava hae. 21 Hageno YisasiꞋa nagoꞋene mage hie “TamaipamoꞋa falu nehinagetama maiho. NenafaꞋa hu-na-tenea augafa kava huꞋna nagaya tamakaila hu-nela-matoe.” huno hie. 22 Mani kema nehunoꞋa haimula fu huno neꞋamamino mage huno hie “Tamakaila Alu Aotage Avamula nelamamugi avaleho. 23 NagoꞋa veaꞋmogamina ai-geꞋama-tetama kefo yaꞋamima atale-ma-tesayana Anumaya KotiꞋa aniꞋa huno ani kefo yaꞋamia ai-geꞋama-teno atale-ma-tegahie. Kefo yaꞋamima ai-geꞋama-tetama atale oꞋamatesaya veaꞋmogamina Anumaya KotiꞋa kefo yaꞋamia ai-geꞋama-teno atale oꞋama-tegahie.” huno hama-paiye.

TomasiꞋa Yisasina age-maine.

24 YisasiꞋma amakaite evaꞋyima hu-mainea yupa aleveniꞋa (11) anagaꞋafitila nago kanoa amakaiꞋenena omaine. Ani kanoa, TomasiꞋe, nago agia TitimasiꞋe, tagai kefina kuyave nafaꞋne, ani kanoa omaine. 25 OmainegeꞋya amakaya “Tagaya Alatimona age-mainone.” huꞋya hane-paigenoꞋa TomasiꞋa mage hie “Yisasina nilima he-malenaya afuguꞋma oꞋageꞋna, naginagoma nilimo kapima omaleꞋna haopafima keve honomuꞋma aye-malenaya afugupima nayama oꞋvainuꞋnahena mani kea aliꞋna nagupina maleꞋna nametitia ohugahue.” huno hie.

26 SeveniꞋa (7) kana maiteꞋya Yisasina aleveniꞋa (11) anagaꞋamoꞋya eteꞋya ani nopi mainageno TomasiꞋa amakaiꞋene maine. Fita kiꞋya tokiyaꞋage hu-malayanagi YisasiꞋa evaꞋyi huno amuꞋnoꞋamifi me he-ti-maineno mage hie “TamaipamoꞋa falu nehinagetama maiho.” huno hie. 27 Tomasifena mage hie “Kaginagoa male me maleka nayapi nafugula ago. Kayana nahaopaleꞋma hanea nafugupina vaika ago. Ageteka tole kagesama havina kagesa neꞋataleka nagaifena havika kagupi maleka kametiti huo.” huno hie. 28 Higeno TomasiꞋa mage hie “Kagaya AlaniꞋamogae Anumaya KotiꞋnimoga mainane.” huno hie. 29 Higeno YisasiꞋa mage hie “Kagaya agoꞋma nagana yafe kagupina maleka kametitia nehananagi onagenesaya veaꞋnemoꞋyama haviꞋya amakupi maleꞋya amametitima hisaya veaꞋmoꞋya tusiꞋa muse hugahae.” huno hie. 30 YisasiꞋa aleveniꞋa (11) anagaꞋamogami amaulagafina aluꞋa aluꞋa tokiya avameꞋyaꞋyaga hu-maineanagi ani yana mukiꞋa mani autaꞋmafina okaenoe. 31 Okaenoanagi manima kae-maloa kea tamakaife huno YisasiꞋa, Anumaya Kotina nafaꞋneꞋamoꞋa, tagu tamema ali-gatisia kano maine hutamama havitama tamakupi maletama tamametitima hisaya yafe kae-malenoane. Ani yafe havitama tamakupi maletama tamametiti hisayana Yisasi agileti agola maige maige hisaya tamahaimula aligahae huꞋna kae-malenoe.

Copyright information for `KMU