John 3

YisasiꞋa NikotimasiꞋene kea kea hu-mainaꞋe.

Nago Falasia kanoa Yuta vayate ala kava kanoꞋamimo agia NikotimasiꞋe. Nago kegela ani kanomoꞋa Yisasite eno mage huno hie “Humave-nelina kanomoga tagaya ago havimainone kagaya humaveli hama-veli nehana kanomoga Anumaya KotiꞋa hu-gategeka emainane. Kagaya oꞋagenaya tokiya avame yana nehane. Anumaya KotiꞋa kagaiꞋene omaineleꞋasina aniꞋa kavala ohateꞋasine. Ani yafe tagaya ago havimainone Anumaya KotiꞋa hu-gategeka emainane.” huno hie.

Higeno YisasiꞋa mage huno hie “Tamage-lafa huꞋna kaha-nepauve anafinaga kanomoꞋma nago kanoma haegafa huno oꞋatesiana Anumaya KotiꞋma kava yagai-mainea kumala oꞋagegahie.” huno hie. Higeno NikotimasiꞋa mage huno hie “Alopa kanomona hanaꞋa huno ateleꞋasine? ItaꞋamo aipafinaga eteno hai falesigeno nagoꞋene eteno atesie huka nehapio?” huno havinege.

Havigegeno YisasiꞋa mage huno hie “Tamage-lafa huꞋna kaha-nepauve titetiꞋene Anumaya Koti Alu Aotage AvamuꞋmotetiꞋene oꞋatesiana Anumaya KotiꞋma kava yagai-mainea kumatela oꞋugahie. Amaugafama hanea veaꞋmoꞋya augafa hanesia nafaꞋne amategahayanagi Anumaya Kotina Alu Aotake AvamuꞋmoteti atesia kanomona Alu Aotage AvamuꞋmoꞋa haimula amigahie. Nagaya mani kema hua kea ‘NagoꞋene eteka nato huka huo.’ huꞋna hua kehena havika kamaꞋyoa aika atali ohuo. YasimoꞋa agaiꞋa hau yate alino visia yana kaulagamoꞋa oꞋagene. AfaꞋa uhuhu uhuhu hia keꞋa haviteka hanategatiꞋma aepa heno falote hia kaꞋene vaiyea kaꞋene oꞋagenane. YasimoꞋma hia avamete huno Anumaya Kotina Alu Aotake AvamuꞋmoꞋa nago kanomona neꞋateana noꞋagone.” huno hie. Higeno NikotimasiꞋa mage huno havige “Ani yana hanaꞋa huno falote hugahie?” huno havinege.

10 Havigegeno YisasiꞋa mage huno hie “Kagaya Isaleli veaꞋne hu-maveli hamaveli nehana kano mainanagi naꞋa higeka ohavinane? 11 Tamage-lafa huꞋna kaha-nepauve age-mainona yafe kaha-nepauve havilinona yafe kaha-nepauvanagi mani kea tamakaveꞋno hu-neꞋatae. 12 Nagayama ma mopale yafe ago kaha-nepauvanagi ‘Tamage nehane.’ huka havika kagupi maleka kametiti nohanagi ikapinaga yafema kaha-paisugeka hanaꞋa huka havika kagupina maleka kametitia hugane? 13 Nago kanomoꞋa ikapinaga ohainegi nagaya ikapinagati emainoa kanoa vayaꞋmo natenea kanomoꞋna nagaiꞋniꞋage ikapinagatila ma mopafina elavi-mainoe.

14 MoseseꞋa kaꞋme kotega maineno osifaꞋvea talo huteno yosale malegaꞋmaeno alisaga hu-mainea kavala menia aniꞋa huꞋya ikapinagati emainoa kanoa vayaꞋmo natenea kanomonina navaleꞋya alisaga hugahae. 15 Alisaga hisageno mukiꞋa veaꞋmoꞋya ‘Tamage nehie.’ huꞋya amakupi maleꞋya amametiti hisaya veaꞋmoꞋya agola maige maige hisaya hamaimula aligahae.”

16 Anumaya KotiꞋa aiya nagoke nafaꞋneꞋa maineanagi ma mopafi veaꞋnehe tusiya huno hau ayamopafi haigeno ani aiya nagoke nafaꞋneꞋa hu-tegeno elavino emaine. Emainegeta tagaya nagoke nagokeꞋmogata agaife tagupi maleta tametiti hisunana haniki-mai yapi tegelege nehia atafina oꞋugahunanagita agola maige maige hisuna tahaimula aliteta maigahune. 17 Anumaya KotiꞋa nafaꞋneꞋamona mopale veaꞋne kaiyeke hu-mateno nofi hu-matesia yatela hu-tegeno omenegi mopafi veaꞋne amaku amamemaꞋa ali-gatisiafene huno hu-tegeno emaine.

18 Emaineanagi nagoꞋa veaꞋmoꞋya Yesasifena amakupi maleꞋya amametiti haya veala Anumaya KotiꞋa kaiyeke huno nofila hu oꞋama-tegahianagi nagoꞋa veaꞋmoꞋya Anumaya Kotina aiya nagoke nafaꞋnehe haviꞋya amakupi omaleꞋya amametiti nohaya yafe Anumaya KotiꞋa ago kaiyeke hu-ma-teteno ago nofi hu-ma-tene. 19 Kaiyekema hu-mate yamo aepaꞋamoꞋa maꞋa hu-maine, aye hale-ma-te kanoa ma mopafina ago emainegeꞋya veaꞋmoꞋya kefo yana nehuꞋya hani yapi maisaya yafe muse huꞋya hale yafena nohamaiya yafe Anumaya KotiꞋa ago kaiyeke hu-ma-tene. 20 MukiꞋa kefo kava huge huge nehaya veaꞋmoꞋya hale yafena nohamaigeꞋya “Hale yapima visunageꞋya kefo yatia age-falote hugahae.” huꞋya hale yapina nomae. 21 Tama kava nehaya veaꞋmoꞋya hale yapima neꞋeya mage nehae “Anumaya KotiꞋa taya higeta kanale yana hu-mainonafe mukiꞋa veaꞋmoꞋya agesae.” huꞋya nehae.

Mono tima fale-ma-te YoniꞋa Yisasifena hu-falote huno hu-maine.

22 NaꞋa hu-maleteno YisasiꞋene agaiꞋaenema tokaeꞋya nemaiya anagaꞋene Yutia umaineꞋya nagoꞋa kana umaiteꞋya veaꞋnea mono tina fale-ma-tenae. 23 Fale-ma-tegeno YoniꞋa Ainonie nehaya kumate maineno aniꞋa huno veaꞋnea fale-ma-tene. Ainoni kumala Salimie nehaya kumaꞋmo aupate hane. KasagoꞋya tiꞋyaga anilega haneanagiꞋya veaꞋmoꞋya ete ete hageno tina fale-ma-tene. 24 Yonina avaleꞋya nofipina oꞋatenageno ani lina fale-ma-tene.

25 Yonienema tokaeꞋya nemaiya anagaꞋene nago Yuta kanoene mono tima fale yamo auꞋava yafe mohu mehu huꞋya ke vai-mainae. 26 Ke vai-maleꞋya Yonitega mage huꞋya mo hane-paiye “Hulave nelina kanomoga Yotani limona ame haupalega kagaiꞋenema mainegeka agaifema taha-pai-mainana kanomoꞋa menia agaiꞋa tina fale neꞋa-ma-tegeꞋya mukiꞋa veaꞋmoꞋya agaitega utele nehae.” huꞋya hae.

27 Hageno YoniꞋa mage huno hie “Anumaya KotiꞋa nagoꞋa veaꞋmogamina nago yana oꞋamamineleꞋasina oꞋalileꞋasine. 28 Tamakaya agoꞋma hu-mainoa kea havilinae. Mage huꞋna hu-mainoe ‘Nagaya Anumaya KotiꞋma taugafa ali-gatigahe hu-tenea kanoa omainogi nagaya uhagoteꞋna neꞋvisugeno agaya haenaga egahie.’ huꞋna hu-mainoe. 29 Nago vemoꞋa aꞋma aliana agaiꞋa a maineanagi ayama hu-mainea kanomoꞋa agava huno aꞋma ali-mainea kea haviteno tusiꞋa muse nehie. AniꞋama hia avamete huꞋna Yisasitega veaꞋma neꞋvaya yafena nagaya tusiꞋa muse nehue. 30 Yisasi agimoꞋa nagaila nagaseno ala huno haigahianagi nagai nagimoꞋa afete tavigahie.” huno hie.

Ikapinagati emainea kanohe hama-nepaiye.

31 YoniꞋa mage huno hie “Anafinagati elavi-mainea kanomoꞋa mukiꞋa yana amakase-maineanagi ma mopaletiꞋma efalote hu-mainea kanomoꞋa ma mopale kano maineno mopale yafeke kea nehie. Ikapinagati elavi-mainea kanomoꞋa mukiꞋa yana amakase-maine.

32 Ikapinagati elavi-mainea kanomoꞋa age-mainea yafeꞋene havimainea yafeꞋene hama-nepaiyanagi nagoꞋa veaꞋmoꞋya ani kea haviꞋya amakupina nomalae. 33 Nomalagi nagoke nagoke veaꞋmoꞋya hu-mainea kea haviꞋya amakupima malaya yafe ‘Anumaya KotiꞋa tamageꞋage kano maine.’ huꞋya hu-lokiya neꞋvaiye. 34 Anumaya KotiꞋa hu-tenea kanomona Anumaya KotiꞋa Alu Aotage Avamula nago haupa nago haupa huno oꞋaminegi mukiꞋa hiya huno aminegeno Anumaya Koti kea nehie. 35 Higeno nefaꞋa nafaꞋneꞋamofena tusiꞋa muse nehuno mukiꞋa kava yagaisia yana ayapi malene.

36 NagoꞋa veaꞋnemoꞋya nafaꞋneꞋamofema ‘Tamage nehie.’ huꞋya amakupi maleꞋya amametitima hayana agola maige maige hisaya hamaimula ago ali-mainayanagi nagoꞋa veaꞋmoꞋya nafaꞋneꞋamoꞋma hia kema akaveꞋma omalesayana ani hamaimula oꞋaligahae. Anumaya KotiꞋa ani veaꞋmogamina aipa haviya hu-mateno kaiyeꞋkea ago hu-neꞋamate.”

Copyright information for `KMU